تۇركىستان وبلىسىندا ءوز بالاسى ۇرىپ ولتىرگەن اقساقالدىڭ دەنەسى قارا جەر قوينىنان قايتا قازىپ الىندى، - دەپ حابارلايدى اqshamnews.kz ءتىلشىسى "كتك" تەلەارناسىنا سىلتەمە جاساپ.
ەكسگۋماسيا جاسالعان مايىتكە ماماندار سوت-مەديسينالىق ساراپتاما جۇرگىزىپ، مارقۇمنىڭ ناقتى نەدەن كوز جۇمعانىن انىقتاماقشى.
بۇل وقيعا شاردارا اۋدانىنداعى قوسسەيىت اۋىلىندا بولعان ەدى. جۇرەگى جانە ومىرتقاسى اۋىراتىن اقساقالدى ءوز بالاسى بالاعاتتاپ، سوققىنىڭ استىنا العان. بۇل جاعدايدى كورشىسى جاسىرىن تەلەفونعا ءتۇسىرىپ، الەۋمەتتىك جەلىگە جاريالاعان بولاتىن. قاۋقارسىز قارياعا كەلىنى دە قول كوتەرىپ، اۋىر سوزدەر ايتقانى انىقتالدى.
كەيىن كەلىنىنەن، بالاسىنان وڭباي تاياق جەگەن اكە كوز جۇمدى. وسىدان كەيىن شاردارانىڭ ايتۋلى اساباسى ءارى مەشىتتە ازانشى بولعان وزبىر قاماۋعا الىندى. ونىڭ ايەلىنە دە پوليسەيلەر «ۇرىپ-سوعۋ» بابىمەن ءىس قوزعاعان. ەندى سوت-مەديسينالىق ساراپتاما مارقۇمنىڭ ۇلى مەن كەلىنىنىڭ قولىنان ولگەنىن راستاسا، كۇدىكتىلەردىڭ جازاسى اۋىرلاۋى مۇمكىن.