15 قىركۇيەكتە قازاقستاندا مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعى بىرلەسىپ ۇيىمداستىرعان اۋقىمدى رەسپۋبليكالىق «JARQYRA» كاستينگى ءوتتى، - دەپ حابارلايدى Aqshamnews.kz.
كاستينگ 11:00-دەن 19:00-گە دەيىن ەلىمىزدىڭ 19 قالاسىندا جەتەكشى مادەنيەت مەكەمەلەرىنىڭ الاڭدارىندا قاتار ءوتتى. وعان 18 جاستان اسقان مىڭنان استام تالانتتى ۇمىتكەر قاتىستى. كاستينگكە وبلىس ورتالىقتارىنىڭ تۇرعىندارىمەن قاتار، اۋىل-اۋدان ازاماتتارى دا كەلدى. بۇل - جوباعا دەگەن زور قىزىعۋشىلىقتى جانە قازاقستاندىقتاردىڭ كينەماتوگرافيا سالاسىندا ءوزىن-وزى جۇزەگە اسىرۋعا دەگەن ىنتاسىن ايقىن كورسەتتى.
«JARQYRA» جوباسى – ۇلتتىق كينونى دامىتۋعا باعىتتالعان ماڭىزدى قادام. ول جاڭا ەسىمدەردى ىزدەپ تابۋعا، ەلدىڭ بولاشاق اكتەرلەر بۋىنىن قالىپتاستىرۋعا جول اشادى. جوبانىڭ جۇزەگە اسۋى مەملەكەت باسشىسىنىڭ مادەني ساياساتتى جاڭعىرتۋ جونىندەگى تاپسىرمالارى اياسىندا جۇرگىزىلىپ وتىرعان جۇيەلى جۇمىستاردىڭ جانە مادەنيەت جانە اقپارات ءمينيسترى ايدابالايەۆانىڭ قولداۋىنىڭ ارقاسىندا مۇمكىن بولدى.
ۇمىتكەرلەر دە ءوز اسەرلەرىمەن ءبولىستى. تالدىقورعاننان كەلگەن قاتىسۋشىنىڭ ايتۋىنشا، بۇل كاستينگ ول ءۇشىن كوپتەن كۇتكەن ەرەكشە وقيعاعا بولدى: «مەن كوپتەن بەرى كينودا ءوزىمدى سىناپ كورگىم كەلەتىن. كاستينگ جايلى ەستىگەن ساتتە-اق قاتىسۋعا بەل بۋدىم. ەندى ءوز قالامىزدا ءدال وسىنداي بىرەگەي مۇمكىندىكتەردىڭ بار ەكەنى قاتتى قۋانتادى».
شىمكەنت قالاسىنىڭ تۇرعىنى دا كاستينگتىڭ جوعارى دەڭگەيدە ۇيىمداستىرىلعانىن اتاپ ءوتىپ، ءىس-شارانىڭ جىلى ءارى دوستىق اتموسفەراسىن ەرەكشە باعالادى. ونىڭ ايتۋىنشا، كاستينگكە قاتىسۋ – بولاشاقتا قاجەت بولاتىن قۇندى تاجىريبە.
ىرىكتەۋ ناتيجەسىندە ۇمىتكەرلەردىڭ انكەتالارى مەن بەينەماتەريالدارى www.kazakhcinema.kzرەسمي سايتىنداعى اكتەرلەردىڭ ونلاين-بازاسى بولىمىنە ورنالاستىرىلادى. بۇل بازا پروديۋسەرلەر مەن كينوكومپانيالار ءۇشىن جاڭا جۇزدەردى بولاشاق فيلمدەرگە تابۋعا ىڭعايلى اشىق پلاتفورماعا اينالادى.
كينو ورتالىعىنىڭ باسقارما ءتوراعاسى قۇرمانبەك جۇماعالي: ««JARQYRA» كاستينگى – جاي عانا ىرىكتەۋ ەمەس. بۇل – دارىندى جاستارعا ۇلكەن كينوعا العاشقى قادام جاساۋعا بەرىلگەن ناقتى مۇمكىندىك. بۇگىن ءبىز ايماقتاردا شىعارماشىلىق الەۋەتى زور كوپتەگەن جاستار بار ەكەنىنە كوز جەتكىزدىك. ولاردىڭ جولى ءدال وسى جەردەن باستالۋى مۇمكىن. ءبىر كەزدەرى سامال ەسلياموۆا، گۋزەل جان نەمەسە مارات ابىشيەۆتىڭ وسىلاي باستالعان. مۇنداي وقيعالار جاڭا بۋىنعا شابىت بەرىپ، ۇلگى بولا الادى» دەپ اتاپ ءوتتى.
ايتا كەتەيىك، مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن بۇگىندە 118 ءفيلمنىڭ ءوندىرىسى اياقتالدى. ونىڭ ىشىندە 34 دەبيۋتتىك جوبا بار. كوپتەگەن كارتينالار قازاقستاندىق كورەرمەننىڭ ىقىلاسىنا بولەنىپ قانا قويماي، ەلىمىزدەن تىس جەرلەردە دە كينوسىنشىلاردىڭ جوعارى باعاسىنا يە بولدى.