بەلگىلى كومپوزيتور التىنبەك قورازبايەۆ 75 جاسقا تولدى.
رەسپۋبليكا سارايىندا قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، انشى-كومپوزيتور التىنبەك قورازبايەۆتىڭ 75 جاس مەرەيتويىنا ارنالعان شىعارماشىلىق كەشى ءوتتى، دەپ حابارلايدى اlmaty-akshamy.kz.
الماتى قالاسى اكىمدىگىنىڭ قولداۋىمەن ۇيىمداستىرىلعان شىعارماشىلىق كەشتى ءانشىنىڭ قۇرداسى تۇڭعىشباي جامانقۇلوۆ پەن شاكىرتى توقتار سەرىكوۆ جۇرگىزدى.
اۋەزدى ءان كەشى مەملەكەت باسشىسى قاسىم-جومارت توقايەۆتىڭ جانە الماتى قالاسىنىڭ اكىمى ەربولات دوسايەۆتىڭ اتىنان جولدانعان قۇتتىقتاۋ حاتتاردى وقىپ، مەرەيتوي يەسىنىڭ يىعىنا شاپان جابۋمەن باستالدى.
ونەر مەن مادەنيەت سالاسىن وركەندەتۋدە ەلەۋلى ۇلەس قوسىپ كەلە جاتقان كورنەكتى كومپوزيتور، بەلگىلى قوعام قايراتكەرى التىنبەك قورازبايەۆتىڭ مەرەيتويلىق كونسەرتىنە ونەرسۇيەر قاۋىممەن بىرگە قازاقستان رەسپۋبليكاسىنىڭ مادەنيەت جانە سپورت ءمينيسترى اسحات ورالوۆ، پرەمەر-مينيستردىڭ ورىنباسارى التاي كولگىنوۆ، الماتى قالاسى اكىمىنىڭ ورىنباسارى ارمان قىرىقبايەۆ، سونداي-اق ونەر تارلاندارى مەن زيالى قاۋىم وكىلدەرى كەلدى.
كەش بارىسىندا ۇلكەن ەكراننان ءانشىنىڭ حالىق اراسىندا كەڭىنەن تانىلعان اندەرىنىڭ دۇنيەگە كەلۋ تاريحىنا توقتالا وتىرىپ تۇسىرىلگەن «اق دەگەلەك» دەرەكتى فيلمىنەن ۇزىندىلەر كورسەتىلدى. ماقپال ءجۇنىسوۆا، باعدات سامەدينوۆا، «مۋزارت» توبى، توقتار مەن بەيبىت، الما امانجولوۆا، الىشەر كارىموۆ، ەرنار ايدار، تورەعالي تورەالى، قىرعىزستاننان كەلگەن انشىلەر جانە وزگە دە ەسترادا انشىلەرى الماتى اسپانىن انگە بولەپ، التىنبەك قورازبايەۆتىڭ «اي-حاي، 25!»، «ساعىندىم كەنەن اتامدى»، «اگۋگاي، دومبىرا»، «ساعىندىم الماتىمدى»، «اقمونشاقتى اۋىلىم»، ت.س.س. كوپتەگەن اندەرىن ناقىشىنا كەلتىرە ورىندادى. ال ءاسانالى ءاشىموۆ اتامىزدىڭ ۇلى – كىشى اسانالىگە ارناپ ايتقان «قۇلىنىم» ءانى تىڭدارماننىڭ كوڭىلىن تولقىتتى. ءان اياقتالعاننان سوڭ مەرەيتوي يەسىن قۇتتىقتاعان ءاسانالى اعا:
«قازاقتا اعاسىنىڭ كيىمىن ءىنىسى كيەدى. مەن مىنا شاپانىمدى وزىڭە سىيلايمىن»، - دەپ ءوزى يىعىنا جامىلىپ شىققان شاپانىن قاعىپ-قاعىپ جىبەرىپ، مەرەيتوي يەسىنىڭ يىعىنا جاپتى. اكتەرلىك شەبەرلىكپەن ايتىلعان ادەمى ءازىل كورەرمەننىڭ دۋ قول شاپالاقتاۋىنا ۇلاستى.
ساعىنىشقا تولى، ليريكالىق اندەر جازعان، ءوزىنىڭ قوڭىر ۇنىمەن حالىقتىڭ جۇرەگىنە جول تاپقان التىنبەك قورازبايەۆتىڭ ونەردەن ويىپ الار ورنى بولەك. ونىڭ شىعارماشىلىعىندا قازاق حالقىنىڭ باسىنان كەشكەن تاۋقىمەتى وزىنە لايىق بەينەسىن تاپقان. وتكەن عاسىردا ەلگە تەز تاراعان «قارا شال»، «قارا كەمپىر»، «قارا پيما» اندەرى بۇل سوزىمىزگە دالەل. سازگەردىڭ كونسەرتىندە «قارا شال» ءانىنىڭ جەلىسىمەن دايىندالعان «قارتتار ءۇيى» جايىنداعى كورىنىس تە كورەرمەنگە ەرەكشە اسەر ەتىپ، ءتىپتى، كەيبىرىنىڭ كوزىنە جاس الدىردى.