الدار كوسە - بۇل قازاقتىڭ روبين گۋدى ىسپەتتەس. جارلىلارعا قول ۇشىن سوزۋ، ساراڭ بايلاردى ايلاكەرلىكپەن تاقىرعا وتىرعىزۋ ونىڭ كۇندەلىكتى شارۋاسى.
اباي اتىنداعى قازاق ۇلتتىق وپەرا جانە بالەت تەاترىندا المابەك مەيىربەكوۆتىڭ مۋزىكاسىنا جازىلعان، بالالارعا ارنالعان، قازاق اۋىز ادەبيەتى ارقىلى قالىڭ كوپشىلىككە تانىس «الدار كوسە» ەرتەگىسى بويىنشا ساحنالانعان بالەتى كورسەتىلەدى، دەپ حابارلايدى Almaty-akshamy.kz.
اباي اتىنداعى قازاق ۇلتتىق وپەرا جانە بالەت تەاترىنىڭ ساحناسىندا ءسان-تۇرلى بوياۋ، قيمىل مەن مۋزىكا ءبىر ارناعا توعىسقان جارقىن تۋىندى كورەرمەن قاۋىمدى عاجايىپتار الەمىنە جەتەلەپ اكەتەتىنى ءسوزسىز: الا-قۇلا ءومىر بۇلتارىستارىنا قاراماستان، ۇلكەن جۇرەگى بار كىشكەنتاي الدار جايلى باياندايتىن بۇل وقيعا ماحاببات پەن جاناشىرلىقتىڭ عالامات كۇشىن كورسەتەدى.
تەاتردىڭ ساحناسىندا 30 جىلدان استام ۋاقىت بۇرىن كورنەكتى قازاق بالەتمەيستەرى مەنتاي تلەۋبايەۆ قازاق كومپوزيتورى المابەك مەيىربەكوۆپەن بىرگە «الدار كوسە» بالەتىن باستاعان ەدى. وكىنىشكە وراي، بالەتتىڭ مۋزىكاسى اياقتالماي قالعان. اراعا 30 جىل سالىپ، اتالمىش بالەتتى كورەرمەن نازارىنا ۇسىنۋ كورنەكتى بالەتمەيستەر مەنتاي تلەۋبايەۆتىڭ ۇلى ءارى ءىزباسارى، جاپونيا بالەت تەاترىنىڭ جەتەكشى بالەت ءسوليسى، بالەتمەيستەر، مايلەن تلەۋبايەۆتىڭ ەنشىسىنە بۇيىردى.
ا.مەيىربەكوۆتىڭ عاجاپ اۋەزدى مۋزىكاسى قويۋشى-رەجيسسەر مايلەن تلەۋبايەۆتىڭ قيالىنداعى بارلىق كەيىپكەرلەر مەن سيۋجەتىن كەرەمەت سۋرەتتەيدى. مۋزىكاسى جاڭا قويىلىمنىڭ ءمان-ماعىناسىنىڭ تەرەڭدىگىن اشۋعا، كەيىپكەردىڭ كوڭىل-كۇيىن كورەرمەنگە جەتكىزۋدە ايرىقشا ورىن الادى. جاڭا قويىلىم مۋزىكانىڭ العاشقى اۋەنى ەستىلگەن ساتتەن ءوزىنىڭ سۇلۋلىعىمەن كورەرمەن كوڭىلىن باۋراپ الادى. دەكوراسيالار مەن كوستيۋمدەر ۇلتتىق ناقىشتى بەينەلەسە، حورەوگرافياسى مەن ارتىستەردىڭ اكتەرلىك شەبەرلىگى ەرتەگىنى ناعىز عاجايىپ الەمگە جەتەلەيدى.
جاڭا جىل قارساڭىندا ءوز كورەرمەندەرىمىزدى، اسىرەسە، كىشكەنتاي كورەرمەندەرىمىزدى اسەرلى ءىس قيمىلدان قۇرىلعان ناعىز وتباسىلىق سپەكتاكلگە شاقىرامىز.