مەكتەپ تاماقتانۋىنا ۇلتتىق تاعامداردى ەنگىزۋ – بالا دەنساۋلىعىن ساقتاۋداعى ماڭىزدى قادام
بىشكەكتە تمد ەلدەرىنىڭ «مەكتەپتەگى تاماقتانۋ – جالپى دامۋدىڭ باعىتى» تاقىرىبىندا ءبىرىنشى حالىقارالىق فورۋم ءوتتى. وعان قازاقستان رەسپۋبليكاسىنىڭ وقۋ-اعارتۋ ءبىرىنشى ۆيسە-مينيسترى ناتاليا جۇمادىلدايەۆا قاتىستى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
ونىڭ ايتۋىنشا، وڭىرلەردە شىعارىلعان وتاندىق ونىمدەردى پايدالانا وتىرىپ، مەكتەپ تاماقتانۋىنا ۇلتتىق تاعامداردى ەنگىزۋ – بالالار دەنساۋلىعىن ساقتاۋداعى ماڭىزدى قادامداردىڭ ءبىرى. وسى ماقساتتا مينيسترلىك ۇلتتىق سالاۋاتتى تاماقتانۋ ورتالىعىمەن بىرلەسىپ، استانانىڭ التى مەكتەبىندە «ۇلتتىق مەكتەپ اسحاناسى» پيلوتتىق جوباسىن جۇزەگە اسىرۋدا. جاڭا ۇلگىدە مەكتەپتەگى تاماقتانۋ مادەنيەتىن قالىپتاستىرۋ بويىنشا كەزەڭ-كەزەڭىمەن شارالار كەشەنى قاراستىرىلعان.
«ءاربىر مەكتەپ وقۋشىلاردىڭ «سالاۋاتتى ءومىر سالتىن ۇستاناتىن مەكتەبىنە» اينالۋى ءتيىس. مەكتەپتىڭ كەز-كەلگەن قىزمەتى ساۋىقتىرۋ-پەداگوگيكالىق باعىتتا بولادى. «ۇلتتىق مەكتەپ اسحاناسى» جوباسى ۇلتتىق تاعام مادەنيەتىن قالىپتاستىرۋعا جانە مەكتەپتىڭ اس مازىرىنە 50 ۇلتتىق تاعامدى ەنگىزۋگە مۇمكىندىك بەرەدى. بۇل كوپ عاسىرلىق ءداستۇر بويىنشا جاسالعان ءمازىر، ەجەلدەن كەلە جاتقان تاجىريبەنىڭ ناتيجەسى»، - دەدى ناتاليا جۇمادىلدايەۆا.
ەستەرىڭىزگە سالا كەتەيىك، بيىلعى جىلدىڭ قىركۇيەك ايىنان بەرى 1،6 ميلليوننان استام بالا تەگىن ىستىق تاماقپەن قامتىلدى، ونىڭ ىشىندە 1،4 ميلليون بالا 1-4 سىنىپ وقۋشىلارى جانە 200 مىڭنان استامى الەۋمەتتىك وسال توپ ساناتىنداعى 5-11 سىنىپ وقۋشىلارى.
ساپالى تاماقتانۋدى ۇيىمداستىرۋ ماقساتىندا مينيسترلىك ءبىلىم بەرۋ ۇيىمدارىنداعى بالالاردىڭ تاماقتانۋ نورمالارىن قايتا قارادى. اتاپ ايتقاندا، اس مازىرىنە وڭىرلەردە وندىرىلگەن وتاندىق ونىمدەردى ەنگىزۋ نورماسى قوسىلدى. براكەراجدى كوميسسيالاردىڭ جانە ۆەدومستۆوارالىق ساراپشىلىق توپتاردىڭ مۇشەلەرىنە ارنالعان مونيتورينگتىك توپتاردىڭ قىزمەتىنىڭ ءتارتىبى تۋرالى زاڭنامالىق نورمالار بەكىتىلدى.
مەكتەپتەردە تاماقتانۋ مادەنيەتىن قالىپتاستىرۋعا ەرەكشە كوڭىل بولىنۋدە. اتاپ ايتقاندا، سانيتارلىق تازالىق پەن گيگيەنانى ساقتاۋ، داستارحان سەرۆيروۆكاسى جانە دۇرىس تاماقتانۋدى ناسيحاتتاۋ. ءبىلىم بەرۋ ۇيىمىنا جەتكىزىلگەن بارلىق ونىمدەردىڭ سانيتارلىق دارىگەرلەردەن قورىتىندىلارى بولۋى كەرەك، ال تاماقتى براكەراجدى كوميسسيالار باقىلايدى. ولاردىڭ قاتارىندا اتا-انالار مەن قامقورشىلىق كەڭەس، سونىمەن قاتار مەكتەپ اكىمشىلىگى مەن مەديسينا قىزمەتكەرلەرى بار.
فورۋم بارىسىندا جەتەكشى حالىقارالىق ينستيتۋتتاردان، مامانداندىرىلعان ءبىلىم بەرۋ سالاسىنداعى ساراپشىلار مەن جەكە سەكتوردان قۇرالعان فورۋمعا قاتىسۋشىلار مەكتەپتەگى تاماقتانۋدىڭ تيىمدىلىگى مەن ساپاسىن ارتتىرۋ جونىندە پىكىر الماستى.