اۋقىمدى جيىن 14–16 مامىر كۇندەرى وفلاين جانە ونلاين فورماتتا ءوتىپ جاتىر.
كونگرەسكە قازاقستان مەن شەتەلدەن كەلگەن جەتەكشى دارىگەرلەر، عالىمدار، دەنساۋلىق ساقتاۋ سالاسىنىڭ ساراپشىلارى قاتىسۋدا.
ۇيىمداستىرۋشىلار مەرەيتوي قوناقتارىن ۇلتتىق مۋزىكامەن، ءداستۇرلى قوناقجايلىقپەن قارسى الدى.
جيىن باستالار ساتتە ورتالىقتا قىزمەت ەتكەن مارقۇم ارىپتەستەرءدى ءبىر مينۋت ۇنسىزدىكپەن ەسكە الدى. ودان كەيىن ورتالىقتىڭ تاريحىنان سىر شەرتەتىن قىسقامەتراجدى دەرەكتى فيلم كورسەتىلدى.
كونگرەستىڭ اشىلۋ سالتاناتىن ورتالىقتىڭ باسقارما ءتوراعاسى، م.ع.ك.، قاۋىمداستىرىلعان پروفەسسور، MBA يەگەرى گۇلفايرۋز ورازبايەۆا جۇرگىزدى. العاشقى قۇتتىقتاۋ ءسوزدى ق ر دەنساۋلىق ساقتاۋ ءمينيسترى اقمارال النازاروۆا ونلاين فورماتتا جولدادى.
سالتاناتتى شارادا مەديسينا عىلىمدارىنىڭ دوكتورى، پروفەسسور، قازاقستاننىڭ ەڭبەك سىڭىرگەن قايراتكەرى نينا كايۋپوۆا، سەنات دەپۋتاتى اينۇر ارعىنبەكوۆا، ءماجىلىس دەپۋتاتى گۇلدارا نۋرۋموۆا، اكادەميك، ق ر پرەزيدەنتى جانىنداعى ۇلتتىق عىلىم اكادەمياسىنىڭ مۇشەسى، قازاقستان رەپرودۋكتيۆتى مەديسينا قاۋىمداستىعىنىڭ پرەزيدەنتى ۆياچەسلاۆ لاكشين، سونداي-اق وزبەكستان، قىرعىزستان جانە باسقا ەلدەردەن كەلگەن شەتەلدىك ساراپشىلار قۇتتىقتاۋ ءسوز سويلەدى.
پلەنارلىق وتىرىستاردا زاماناۋي اكۋشەرلىكتىڭ وزەكتى ماسەلەلەرى؛ انا مەن بالا دەنساۋلىعىن قورعاۋداعى عىلىمي جانە ءبىلىم بەرۋ ۇردىستەرى؛ رەپرودۋكتيۆتى مەديسيناداعى جاساندى ينتەللەكت؛ الا تۋۋ كورسەتكىشىن ارتتىرۋ جولدارى؛ ورتالىقتىڭ حالىقارالىق ىنتىماقتاستىقتاعى ءرولى تۋرالى ماسەلەلەر تالقىلاندى.
كونگرەسس اياسىندا شەبەرلىك ساباقتارى، عىلىمي مەكتەپتەر، نەوناتولوگيا، گەنەتيكا، ۋدز، رەپرودۋكتيۆتى دەنساۋلىق بويىنشا سەسسيالار وتۋدە. سونىمەن قاتار مەديسينالىق قۇرال-جابدىقتار مەن فارمونىمدەردىڭ ارنايى كورمەسى ۇسىنىلعان.
پروفەسسور نينا كايۋپوۆا ءوز سوزىندە: «ءبىزدىڭ ورتالىقتان 47 دوكتور دايىندالدى. بۇل – قازاقستان عىلىمىنا قوسىلعان ۇلكەن ۇلەس. ەڭ باستىسى – بۇل ءومىر سىيلايتىن ماماندىق. اق حالاتتى جاندار ءاربىر انا مەن اكەنىڭ قۋانىشىنا سەبەپشى بولا الادى»، – دەپ اتاپ ءوتتى.
ايتا كەتەيىك، انا مەن بالا ساۋلىعى جولىنداعى جارتى عاسىرلىق ەڭبەكتىڭ، عىلىم مەن تاجىريبە ۇندەستىگىنىڭ سيمۆولىنا اينالعان مەرەيتويلىق شارا ءۇش كۇن – 14، 15، 16 مامىرعا دەيىن جالعاسادى.
رەپرودۋكتيۆتى دەنساۋلىق – ۇلت بولاشاعىنىڭ كەپىلى
ۆياچەسلاۆ لاكشين، اكادەميك، ق ر ۇعا مۇشەسى، قازاقستان رەپرودۋكتيۆتى مەديسينا قاۋىمداستىعىنىڭ پرەزيدەنتى:
– بۇل ورتالىق – ەلىمىزدەگى اكۋشەرلىك-گينەكولوگيالىق قىزمەتتىڭ كوشباسشىسى. رەپرودۋكتيۆتى دەنساۋلىق – انا مەن بالا ساۋلىعىنىڭ نەگىزى. ءقازىر ەلىمىزدە انا ءولىمى 7–8 ەسەگە ازايىپ، شىعىس ەۋروپا دەڭگەيىنە جەتتى. فەتالدىق حيرۋرگيا، ەكو تەحنولوگيالار قولجەتىمدى. جىل سايىن 6 مىڭنان استام ءسابي ەكو ارقىلى دۇنيەگە كەلەدى. «اڭساعان ءسابي» باعدارلاماسى اياسىندا 30 مىڭ پروسەدۋرا ورىندالىپ، 11 مىڭ بالا تۋىلدى. الايدا اسىرەسە اۋىل تۇرعىندارى ەكو جايىندا تولىق اقپاراتتانباعان. مەملەكەت ەسەبىنەن 18 كلينيكادا ەكو تەگىن جاسالادى.
سونىمەن قاتار، ەرلەردىڭ رەپرودۋكتيۆتى دەنساۋلىعى دا نازاردا بولۋى كەرەك. ارتىق سالماق، دۇرىس تاماقتانباۋ بەدەۋلىككە اسەر ەتەدى. جاستارعا جىنىستىق ساۋاتتىلىقتى مەكتەپتەن باستاپ ۇيرەتۋ ماڭىزدى.