الماتىدا جىل باسىنان بەرى 570 مىڭنان استام جاستىڭ باسىن قوسقان 500-دەن اسا ەكولوگيالىق ءىس-شارا ۇيىمداستىرىلدى. بۇل تۋرالى قالانىڭ جاستار ساياساتى باسقارماسىنىڭ وكىلدەرى حابارلادى.
30 ماۋسىم مەن 30 قىركۇيەك ارالىعىندا بارلىق اۋداندا كوشپەلى «EcoQala Fest» فەستيۆالى ءوتىپ، وعان 6 مىڭنان استام جاس قاتىستى. ال #تازاSnap، #EcoSortChallenge جانە #EcoStyleDay اتتى ونلاين چەللەندجگە 7 مىڭنان استام ادام قوسىلدى.
جاستار جاڭا فورماتتاعى جوبالارعا بەلسەندى قاتىسقان: «Jastar Talks» اتتى تاقىرىپتىق پودكاستقا 500 ەرىكتى اتسالىسسا، «Ecoباقىلاۋ» رەيدتەرى بارىسىندا سانيتارلىق نورمانى بۇزعان 800-دەن اسا جاعداي مەن 45 رۇقساتسىز قوقىس ورنى انىقتالدى. سونداي-اق، 28 ءىرى سەنبىلىك پەن 100-گە جۋىق ارنايى ەكولوگيالىق اكسيا ۇيىمداستىرىلدى.
«تازا قازاقستان» اكسياسى اياسىندا ستۋدەنتتەر، بەلسەندىلەر مەن كوميۋنيتي ورتالىقتاردىڭ رەزيدەنتتەرى پلاستيك قالدىق جيناپ، ارت-نىساندار جاساپ، 14 مىڭنان استام پلاستيك قاقپاقتان ورىندىقتار جاسادى. سونىمەن قاتار جاس سۋرەتشىلەر اراسىندا ەكولوگيا تاقىرىبىندا بايقاۋلار، ەكولوگتارمەن كەزدەسۋلەر، جوو-دا دارىستەر، پىكىرتالاستار مەن چەللەندجتەر ءوتىپ، 12 مىڭنان استام جاستى قامتىدى.
اتقارىلعان جۇمىستار ناتيجەسىندە 120 گەكتاردان استام جەر تازارتىلىپ، 200 توننادان اسا قوقىس جينالدى. بۇل يگى باستاما قالانىڭ سانيتارلىق جاعدايىن جاقسارتىپ، جاستار اراسىندا ەكولوگيالىق مادەنيەتتىڭ دامۋىنا ىقپال ەتتى.