الماتىدا 2025 جىلعى 28 قاراشادا الماتى قالاسى اكىمدىگىنىڭ قولداۋىمەن جانە "الاتاۋ" ءداستۇرلى ونەر تەاترىنىڭ ۇيىمداستىرۋىمەن قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى، پروفەسسور شورا شامعالي ۇلى سارىبايەۆتىڭ تۋعانىنا 100 جىل تولۋىنا ارنالعان مەرەكەلىك كونسەرت ءوتتى.
مەرەكەلىك شاراعا احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، پروفەسسور جامال ايتقالي قىزى مانكەيەۆا، فيلولوگيا عىلىمدارىنىڭ كانديداتى، عالىمنىڭ قىزى مايرا شورا قىزى، "مىنبەر" سايتى حالىقارالىق "ادام" ينستيتۋتىنىڭ پرەزيدەنتى، ساياساتتانۋشى جانۇزاق اكىم، سونداي-اق ق ر ەڭبەك سىڭىرگەن قايراتكەرى، ءانشى، تەلەجۇرگىزۋشى قاراگوز سۇلەيمەنوۆا قاتىستى.
شارا بارىسىندا اكادەميكتىڭ عىلىمي مۇراسى، ۇلتتىق عىلىم مەن مادەنيەتتەگى ءرولى، قازاق مۋزىكا مادەنيەتىنە قوسقان ۇلەسى جانە شىعارماشىلىق توپتاردى قولداۋداعى ەڭبەگى اتاپ ءوتىلدى. سونداي-اق، پروفەسسور جامال مانكەيەۆا اكادەميكتىڭ تۇركولوگيا مەن قازاق ديالەكتولوگياسىن دامىتۋداعى تاريحي رولىنە توقتالىپ: "شورا شامعالي ۇلى قازاق ديالەكتولوگياسىنىڭ عىلىمي مەكتەبىن قالىپتاستىرعان اسا ءىرى عالىم. ول ۇمىتىلعان كونە سوزدەر مەن ايماقتىق ءتىل ەرەكشەلىكتەرىن جۇيەلەپ، بۇل سالانى دەربەس عىلىمي باعىت رەتىندە دامىتتى"، – دەدى.
ايتا كەتەيىك، 1964 جىلى "قايرات" كومانداسى قۇرىلىپ، اتىن قويۋدا شورا شامعالي ۇلى سارىبايەۆتىڭ ءرولى ەرەكشە بولدى. عالىم شىعارماشىلىق توپتىڭ دامۋىنا، ۇلتتىق ونەردىڭ ىلگەرىلەۋىنە قوسقان ۇلەسىمەن تاريحتا قالدى.
مەرەيتوي اياسىندا اكادەميكتىڭ ءومىرى مەن ەڭبەگىن كورسەتەتىن فوتوسۋرەتتەر، پورترەتتەر، ارحيۆ ماتەريالدارى قويىلعان كورمە ۇيىمداستىرىلدى. كەش سوڭىندا اكادەميكتىڭ اعارتۋشىلىق رۋحىنا ارنالعان كونسەرت ءوتتى. كونسەرتكە ەلىمىزدىڭ تانىمال ونەر شەبەرلەرى جانە "الاتاۋ" ءداستۇرلى ونەر تەاترىنىڭ ءانسامبلى قاتىستى، قازاقتىڭ ءداستۇرلى ان-كۇيلەرى مەن ۇلتتىق ورىنداۋشىلىق ونەردىڭ كورىنىستەرى كورەرمەن نازارىنا ۇسىنىلدى.