قحر-عا جۇمىس ساپارى اياسىندا الماتى اكىمى ەربولات دوسايەۆ Tus-Holdings Co. ديرەكتورلار كەڭەسىنىڭ ءتوراعاسى ۆان سزيۋمەن كەزدەستى.
تاراپتار يننوۆاسيا، تەحنولوگيالىق دامۋ جانە ينۆەستيسيالىق جوبالار بويىنشا ىنتىماقتاستىقتىڭ كەلەشەگىن تالقىلادى، دەپ حابارلايدى aqshamnews.kz.
Tus-Holdings Co. – سينحۋا ۋنيۆەرسيتەتى نەگىزىندە قۇرىلعان عىلىمي-تەحنولوگيالىق ينۆەستيسيالىق مەملەكەتتىك-جەكەمەنشىك حولدينگتىك توپ. ونىڭ نارىقتىق كاپيتاليزاسياسى 28 ملرد اقش دوللار. كومپانيانىڭ الەمنىڭ 80-دەن استام قالاسىندا يننوۆاسيالىق تەحنوورتالىقتارى، 200-دەن استام تەحنولوگيالىق ينكۋباتورلارى جانە 400 تەحنوپاركى بار. سونداي-اق، Tus-Holdings Co. بەيجىڭدە «TusPark» جوباسىن جۇزەگە اسىرۋدا. بۇل الەمدەگى ەڭ ءىرى ۋنيۆەرسيتەت جانىنداعى عىلىمي-تەحنولوگيالىق پارك.
كەزدەسۋ بارىسىندا قازاقستاندا بيزنەس-ينكۋباتور، ءبىلىم بەرۋ كلاستەرى جانە عىلىمي پارك قۇرۋ سياقتى جوبالاردى ىسكە اسىرۋ مۇمكىندىگى قاراستىرىلدى.
ەربولات دوسايەۆتىڭ ايتۋىنشا، الماتىدا ەكونوميكانى ءارتاراپتاندىرۋ اياسىندا جوعارى تەحنولوگيالىق وندىرىستەر، كرەاتيۆتى يندۋستريا، IT-سەكتور جانە تۋريزم قارقىندى دامىپ كەلەدى. قالاداعى يندۋستريالدى ايماق پەن «يتپ» اەا بۇگىندە اۆتوموبيل جاساۋ، مەديسينالىق بۇيىمدار ءوندىرىسى، ءعىلىمي-بىلىم بەرۋ جانە اكت (اقپاراتتىق-كوممۋنيكاسيالىق تەحنولوگيالار) سالالارىندا كلاستەرلەر قالىپتاستىراتىن نەگىزگى الاڭدارعا اينالعان.
«وتكەن جىلدىڭ جەلتوقسان ايىندا حالىقارالىق رەيتينگ اگەنتتىگى Fitch الماتى قالاسىنىڭ تاۋەلسىز نەسيەلىك رەيتينگىن «BBB+» دەڭگەيىندە راستادى. بۇل قازاقستان رەسپۋبليكاسىنىڭ «BBB» دەڭگەيىندەگى ەگەمەندىك رەيتينگىنەن جوعارى. الماتىنىڭ جوعارى نەسيەلىك رەيتينگى قارقىندى ەكونوميكالىق دامۋىمەن، جەرگىلىكتى بيۋدجەتتىڭ كىرىستەرىنىڭ ايتارلىقتاي وسۋىمەن جانە تومەن قارىز جۇكتەمەسىمەن بايلانىستى. قازاقستاننىڭ ەڭ ءىرى ەكونوميكالىق ورتالىعى رەتىندە قالامىز جۇڭگو ينۆەستيسيالارى ءۇشىن نەگىزگى حاب بولۋعا دايىن»، – دەدى ەربولات دوسايەۆ.
ءوز كەزەگىندە، Tus-Holdings Co. ديرەكتورلار كەڭەسىنىڭ ءتوراعاسى ۆان سزيۋ «الماتى – قازاقستانداعى ەڭ ينۆەستيسيالىق تارتىمدى وڭىرلەردىڭ ءبىرى» ەكەنىن اتادى. ول كومپانيانىڭ «يتپ» اەا-پەن سەرىكتەستىككە قىزىعۋشىلىق بىلدىرەتىنىن جانە قازاقستاندى عىلىمي جانە تەحنولوگيالىق باستامالاردى جۇزەگە اسىرۋ ءۇشىن بولاشاعى زور نارىق رەتىندە قاراستىراتىنىن ايتتى.
Tus-Holdings Co. وكىلدەرى بيىل ناۋرىز ايىندا قازاقستانعا كەلىپ، جەرگىلىكتى نارىقتى زەرتتەۋ ماقساتىندا كەزدەسۋ وتكىزۋدى جوسپارلاپ وتىر. سونداي-اق، الماتىدا 50/50 ۇلەسىمەن بىرلەسكەن تەحنوپارك اشۋ ماسەلەسى قاراستىرىلادى.
كەلىسسوزدەردىڭ قورىتىندىسىندا ەربولات دوسايەۆ Tus-Holdings Co. وكىلدەرىنە كەزدەسۋگە ۋاقىت بولگەنى ءۇشىن العىس ءبىلدىرىپ، تەحنولوگيالىق كاسىپكەرلىك ەكوجۇيەسىن دامىتۋ اياسىندا ءوزارا ءتيىمدى سەرىكتەستىككە سەنىم ارتاتىنىن ايتتى.