«ءبىرتۇتاس تاربيە» باعدارلاماسىنىڭ اياسىندا تۇركسىب اۋدانىنىڭ №59 مەكتەپ-گيمنازياسىندا مەكتەپىشىلىك تەاتر اشىلدى. «تەاتر – ءومىردىڭ ايناسى» دەمەكشى، مەكتەپ تەاترىنىڭ نەگىزگى كورەرمەندەرى وقۋشىلار مەن ۇستازدار، اتا-انالار بولعاندىقتان مەكتەپ تەاترى «اينا» دەگەن اتاۋعا يە بولدى.
تەاتردىڭ جۇمىسى اقيىق اقىنى مۇقاعالي ماقاتايەۆتىڭ «اققۋلار ۇيىقتاعاندا» پوەماسىنىڭ جەلىسىندە جازىلعان پەسالىق قويىلىمممەن باستالدى.
وقۋشىلاردىڭ ساحناداعى شىنايى بەينەسىن كورگەن كورەرمەندەر دە كوزدەرىنە جاس الدى. بۇل بالالاردىڭ اقىننىڭ شىعارماسىن ءتۇسىنىپ، تۇيسىنە بىلگەنىن كورسەتسە كەرەك. قويىلىم بارىسىندا رۋحاني، ادامگەرشىلىك قۇندىلىقتاردى وقۋشىنىڭ بويىنا تەاتر ارقىلى دارىتۋعا بولاتىنىن بايقادىق. ساحنالىق قويىلىم بالا تاربيەسىندەگى تاپتىرمايتىن ەرەكشە تاربيە ءادىسى ەكەنىن دالەلدەدى. ساحنادا اتاقتى ونەر يەلەرىنىڭ ءىزباسارلارى ءوسىپ كەلە جاتقانىن بايقادىق. بۇگىنگى اۋمالى –توكپەلى ۋاقىتتا مەكتەپ وقۋشىلارىن شىنايى رۋحاني بايلىققا، ۇلتتىق قۇندىلىقتارعا ۇيرەتەمىن دەگەن جانعا ونەگەنى ونەردەن باستاعان ابزال دەگىمىز كەلەدى.
مەكتەبىمىزدىڭ قازاق ءتىلى مەن ادەبيەتى ءپانىنىڭ ءمۇعالىمى باقىت اقات قىزى جەتەكشىلىك ەتكەن «اينا» مەكتەپىشىلىك تەاترى ءالى تالاي ساحنادا قازاق ونەرىن دامىتۋعا اتسالىسادى دەگەن ويدامىز.
