مەديسينالىق ءبولىم جۇمىسىن باستادى
Smart Health University City سەنىمگەرلىك باسقارۋىنداعى الماتى قالاسىنىڭ №1 قالالىق كلينيكالىق اۋرۋحاناسىندا جۇقپالى اكۋشەرلىك ءبولىم اشىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اۋرۋحانانىڭ باسقارما ءتوراعاسى ەرنەست قالييەۆتىڭ ايتۋىنشا، قالاداعى ەپيدەميولوگيالىق احۋالدىڭ ناشارلاۋىنا بايلانىستى بيىلعى جىلدىڭ 20 قاڭتارىنان باستاپ، جۇقپالى اكۋشەرلىك بولىمشەسى اشىلدى.
«اكۋشەرلىك ءبولىم جۇكتى ايەلدەرمەن، بوسانعان ايەلدەرمەن جانە 22 اپتادان 36 اپتاعا + 6 كۇنگە دەيىنگى جۇكتىلىك كەزىندە كوروناۆيرۋس ينفەكسياسى بار بوساناتىن ايەلدەرمەن جۇمىس ىستەيدى. 80 توسەك-ورىنمەن جابدىقتالعان، ونىڭ ىشىندە ەرەسەكتەرگە ارنالعان 8 رەانيماسيا توسەگى جانە بولەك اكۋشەرلىك وپەراسيالىق بولمەسى، جاڭا تۋىلعان نارەستەلەرگە ارنالعان 6 كەرەۋەتتىك رەانيماسيا ءبولىمى بار. بوسانۋ بولىمشەسىن قامتاماسىز ەتۋ مەن جابدىقتاۋعا الماتىداعى بارلىق پەرزەنتحانالار مەن كوپسالالى اۋرۋحانالار ۇلكەن كومەك كورسەتتى»، - دەدى الماتىداعى №1 قالالىق كلينيكالىق اۋرۋحانانىڭ باسقارما ءتوراعاسى، باس دارىگەرى ەرنەست قالييەۆ.
اۋرۋحانادا كومپيۋتەرلىك توموگرافيا، ۋلترادىبىستىق دياگنوستيكا، سپيروگرافيا جۇرگىزىلەدى. ەمدەۋ مەكەمەسى ورتالىقتاندىرىلعان مەديسينالىق وتتەگىمەن قامتاماسىز ەتىلگەن. COVID-19 جۇقتىرعان جۇكتى ايەلدەر مەن ولاردىڭ جاڭا تۋعان نارەستەلەرى مامانداندىرىلعان كومەككە مۇقتاج بولۋى مۇمكىن جانە №1 قالالىق كلينيكالىق اۋرۋحانانىڭ اكۋشەرلىك بولىمشەسى ولاردىڭ مۇنداي كومەكتى الۋىن قامتاماسىز ەتەدى. اكۋشەرلىك بولىمشەسىنىڭ باسشىسى ساۋلە قابىلوۆانىڭ ايتۋىنشا، الماتى قالاسىنىڭ بارلىق پەرزەنتحاناسى مەن دەنساۋلىق ساقتاۋ مەكەمەسى، 3ء-شى دەڭگەيلى پەريناتالدىق كومەكتى (ياعني، شالا تۋىلعان وتە جاس نارەستەلەر مەن اۋىر جۇكتى ايەلدەر مەن بوسانعان ايەلدەرگە) ۇيىمداستىرۋعا جان-جاقتى كومەك كورسەتتى.
« كوروناۆيرۋس جۇكتى ايەلدەردىڭ مەرزىمىنەن بۇرىن بوسانۋىنا اكەلۋى مۇمكىن. سونىمەن قاتار، COVID-19، اسىرەسە، جۇكتى جانە جاڭادان بوسانعان ايەلدەرگە ءتان سترەسس پەن الاڭداۋشىلىق دەڭگەيىن ارتتىرادى جانە وسىنداي كەزدە مەديسينا ماماندارى جۇكتى ايەلدەردىڭ قاجەتتىلىكتەرىنە جاۋاپ بەرۋدە ساۋاتتى جانە جاۋاپتى بولۋى كەرەك ەكەندىگىن ەسكەرۋ ماڭىزدى»، - دەيدى ساۋلە قابىلوۆا.