الماتى پوليسياسىنا جارىلعىش زات تۋرالى جالعان حابارلاما بەرگەن وقۋشىنىڭ اتا-اناسى جاۋاپقا تارتىلدى.
تەلەفون تەرروريستى 14 جاستاعى ءجاسوسپىرىم بولىپ شىقتى. ەكسترەميزمگە قارسى كۇرەس باسقارماسىنىڭ مالىمەتىنشە، 2009 جىلى تۋعان ر.ەسىمدى ازامات الەۋمەتتىك جەلى ارقىلى ءوزىنىڭ تانىسىنا مەكتەبىنە جارىلعىش زات قويۋدى جوسپارلاپ جۇرگەنىن ايتىپ قورقىتقان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل تۋرالى پوليسياعا 2 قازان كۇنى ساعات 10:43-تە سيگنال كەلىپ ءتۇستى. جەدەل جانە ارنايى ءىس-شارالار كەشەنى جۇرگىزىلىپ، ناتيجەسىندە ءاتى-جونى بەلگىسىز ادام انىقتالدى. جاس جىگىتتىڭ سوزىنشە، جالعان حابارلاما جىبەرۋ ارقىلى ول دوسىن مازاق قىلماق بولعان. بۇل ءازىل ءۇشىن ءجاسوسپىرىمنىڭ اتا-اناسى جاۋاپقا تارتىلدى. ولاردىڭ ۇستىنەن ق ر اقبتك-نىڭ 127-بابى بويىنشا اكىمشىلىك ءىس قوزعالدى. جينالعان اكىمشىلىك ماتەريال كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنا جولداناتىن بولادى»، – دەدى الماتى قالالىق پد ەكسترەميزمگە قارسى كۇرەس باسقارماسىنىڭ باستىعى دارحان ءابىقۇلوۆ.
سونداي-اق پوليسيا مۇنداي زاڭسىز ارەكەتتەر توتەنشە جاعدايلار مەن قۇقىق قورعاۋ ورگاندارىنىڭ ايتارلىقتاي كۇشتەرى مەن رەسۋرستارىن جۇمساۋعا اكەپ سوعاتىنىن ەسكە سالدى. ايتا كەتەرلىگى، كىنالى ادام جاۋاپقا تارتىلۋمەن قاتار، سوت شەشىمىمەن جالعان قوڭىراۋ شالعانى ءۇشىن شىعىندى تولىعىمەن تولەيدى. سونداي-اق پد-دا ق ر قك-نىڭ 273-بابىنىڭ تالاپتارىنا سايكەس تەرروريزم اكتىسى تۋرالى جالعان حابارلاۋ بەس جىلعا دەيىن باس بوستاندىعىنان ايىرۋعا جازالاناتىنىن ەسكە سالدى.