الماتى پوليسياسى تەرروريزمگە قارسى قاۋىپسىزدىك شارالارىن كۇشەيتۋدى ەسكە سالدى.
شاعىن جانە ورتا كاسىپكەرلىك سۋبەكتىلەرىن تەكسەرۋگە ءموراتورييدىڭ اياقتالۋىن ەسكەرە وتىرىپ، تەرروريستىك تۇرعىدان وسال وبەكتىلەردىڭ، ونىڭ ىشىندە ءىرى ساۋدا ورتالىقتارىنىڭ، عيبادات ورىندارى مەن قوعامدىق تاماقتانۋ نىساندارىنىڭ تەرروريزمگە قارسى قاۋىپسىزدىگىنىڭ جاي-كۇيىنە جوسپارلى تەكسەرۋ جۇرگىزىلدى.
«پوليسيانىڭ ءتيىستى بولىمشەلەرى تەرروريزمگە وسال نىسانداردى، تەرروريزمگە قارسى قورعاۋدى باقىلاۋدى ۇيىمداستىرۋ باعىتىندا تۇراقتى جۇمىس جاساپ، ولاردىڭ باسشىلارى مەن يەلەرىنە ءتۇسىندىرۋ جۇمىستارىن جۇرگىزەدى. تەرروريزمگە وسال نىسانداردىڭ ينجەنەرلىك-تەحنيكالىق بەرىكتىگى مەن تەرروريزمگە قارسى قورعانىسىنىڭ تەرروريزمگە قارسى ءىس-قيمىل سالاسىنداعى زاڭناما تالاپتارىنا سايكەستىگىن تەكسەرەتىن ارنايى جۇمىس توپتارى قۇرىلدى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.
جاقىندا پوليسيا قىزمەتكەرلەرى “Mega Park” ساۋدا ورتالىعىن تەكسەردى. اتاپ ايتقاندا، ورتالىقتىڭ بەينەباقىلاۋ جۇيەلەرى، توتەنشە جاعدايلارعا ارەكەت ەتۋ مەحانيزمى جانە دابىل تۇيمەلەرى تەكسەرىس نىسانى بولدى.
«تقە مەكەمەسىنىڭ ءاربىر قىزمەتكەرى تەرروريستىك ءقاۋىپ تونگەن جاعدايدا ارەكەت ەتۋ الگوريتمىن ءبىلۋى كەرەك. مىسالى، كۇدىكتى زات انىقتالسا، ونى ۇستاۋعا، جىلجىتۋعا، كەز كەلگەن نارسەمەن جابۋعا جانە باسقا دا ارەكەتتەر جاساۋعا قاتاڭ تىيىم سالىنادى. بۇل جاعدايدا سىزگە ءتيىستى قالالىق قىزمەتتەردى ەسكەرتۋ كەرەك. ساۋدا نىساندارىنىڭ ديرەكتورلارىنا تقە وبەكتىلەرىن تەرروريزمگە قارسى قورعاۋ تالاپتارىن ورىنداماعانى ءۇشىن اكىمشىلىك جاۋاپكەرشىلىك قاراستىرىلعانى ەسكەرتىلدى»، – دەدى ناۋاتوۆ.