قازاقستان ءىىم ينتەرپول ۇلتتىق ورتالىق بيۋروسى كريمينالدىق پوليسيا قىزمەتكەرلەرىمەن بىرلەسىپ، الماتى قالاسىنىڭ حالىقارالىق اۋەجايىندا حالىقارالىق ىزدەۋدە جۇرگەن قحر ازاماتتارىن ۇستادى.
ۇستالعانداردىڭ ءبىرى قىتايدىڭ قۇقىق قورعاۋ ورگاندارىمەن ىزدەستىرىلگەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
ول حاربين قالاسى داولي اۋدانىنىڭ بازارىندا 100-دەن استام ساتۋشىدان اقشا بوپسالاعان. قىلمىسكەر ۆەتنامنان شىعىپ، قازاقستانعا كاتار ارقىلى كىرمەك بولعان.
ال ەكىنشى ەر ادامدى ساۋد ارابياسىنىڭ قۇقىق قورعاۋ ورگاندارى ەر-رياد قالاسىنداعى ايگىلى دۇكەندەردەن اسا ءىرى مولشەردە زەرگەرلىك بۇيىمداردى ۇرلاعانى ءۇشىن ىزدەۋگە جاريالاعان. كەلتىرىلگەن شىعىن 200 مىڭ اقش دوللارىنان اسادى. قازىرگى تاڭدا قىلمىسكەرلەر قاماۋعا الىندى، ولاردى ەكستراديسيالاۋ ماسەلەسى شەشىلىپ جاتىر.