ەلىمىزدە قانشا مال سۋعا كەتتى؟

سۋ باسۋ وڭىرلەرىندە قابىلدانىپ جاتقان شارالار ناتيجەسىندە 60،0 مىڭنان استام اۋىل شارۋاشىلىعى جانۋارلارى ءقاۋىپسىز ۋچاسكەلەرگە كوشىرىلدى.

ونىڭ ىشىندە: اقمولا وبلىسى – 18،8 مىڭ باس، قوستاناي وبلىسى – 12،9 مىڭ باس، اقتوبە جانە اتىراۋ وبلىستارىندا – 10 مىڭ باستان كوپ، بقو – 4،5 مىڭ باس، قاراعاندى وبلىسى – 1،5 مىڭ باس، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنە سىلتەمە جاساپ. 

سونىمەن قاتار، سۋ تاسقىنى سالدارىنان مال ءولىمى ورىن الدى، جەدەل دەرەكتەر بويىنشا رەسپۋبليكانىڭ جەتى وڭىرىندە سانى 5 711 باستى قۇرادى، ونىڭ ىشىندە ءىقم – 1 137، ۇساق مال – 4 051، جىلقى – 457 جانە باسقا دا اۋىل شارۋاشىلىعى جانۋارلارى.

العاشقى كۇندەردەن باستاپ، سۋ باسقان اۋماقتارداعى ەپيزووتيالىق جاعدايدىڭ ناشارلاۋىنا جول بەرمەۋ ماقساتىندا مينيسترلىكتىڭ رەسپۋبليكالىق ەپيزووتياعا قارسى وتريادى وبلىس اكىمدىكتەرىمەن بىرلەسىپ شىعىن بولعان جانۋارلار ولەكسەلەرىن جيناۋ جانە جويۋ جۇمىستارىن جۇرگىزۋدە. جالپى ءىس-شارالاردى جۇرگىزۋ ءۇشىن ءتيىستى 90 بىرلىك تەحنيكا، قىزمەتكەرلەر شتاتى جانە جويۋ شارالارى ءۇشىن قاجەتتى دەزينفەكسيالىق زاتتار بار.

بۇگىنگى تاڭدا 1013 باس، سونىڭ ىشىندە ءىقم -133، ۇم – 809 جانە جىلقى – 64 ورتەلىپ جويىلدى.

اۋىل شارۋاشىلىعى ءمينيسترى، جەتەكشىلىك ەتەتىن ۆيسە-مينيستر جانە ۆەتەريناريالىق باقىلاۋ جانە قاداعالاۋ كوميتەتىنىڭ باسشىسى سۋ باسقان اۋماقتارعا باردى. ال قازىرگى ۋاقىتتا اشم قۇرىلىمدىق بولىمشەلەرى اۋىل شارۋاشىلىعى باعىتىندا جۇمىستى ۇيلەستىرۋ ءۇشىن سۋ تاسقىنىنان زارداپ شەككەن ايماقتاردا ءجۇر.

اۋىل شارۋاشىلىعى جانۋارلارىنىڭ يەلەرىنە وتەماقى تولەۋگە قاتىستى: سايكەس الگوريتم ازىرلەندى، حالىققا جانە زالال انىقتاۋ جونىندەگى كوميسسيانىڭ نازارىنا جەتكىزىلەدى.

جالپى، سۋ تاسقىنىنىڭ سالدارىن بولدىرماۋ جانە جويۋ ماسەلەلەرى، سونداي-اق ەپيزووتيالىق جاعداي مينيسترلىكتىڭ تۇراقتى باقىلاۋىندا.