5 قاڭتار كۇنى تاڭەرتەڭ 20 مىڭ ادام قالا ورتالىعىنا قاراي بەت الدى
16 قاڭتاردا وتكەن بريفينگتە قانات تايمەردەنوۆ مەگاپوليستە بولعان جاعدايدى ايتىپ، ازاماتتاردى قاۋىپسىزدىك شارالارىن ساقتاۋعا جانە ارانداتۋشىلىققا بوي الدىرماۋعا شاقىردى، دەپ حابارلايدى Almaty-akshamy.kz.
3 قاڭتاردا قالادا ەلدىڭ باتىسىنداعى ميتينگىلەردى قولداۋ ماقساتىندا زاڭسىز شەرۋلەر ءوتتى. قالانىڭ ءار جەرىندە 200-دەن 2 مىڭعا دەيىن ازامات جينالدى. ولارمەن تۇسىندىرمە الدىن الۋ جۇمىستارى جۇرگىزىلدى. شەرۋشىلەر تاراپىنان ورەسكەل زاڭ بۇزۋشىلىقتار بولعان جوق.
4 قاڭتار كۇنى «الماتى ارەنا» مۇز سارايىنىڭ جانىنا 2 مىڭعا جۋىق ادام جينالدى. سونداي-اق شىعىس اينالما جولىنىڭ ماڭىندا زاڭسىز اكسيا ۇيىمداستىرىلدى. قالانىڭ باسقا بولىكتەرىندە 5 مىڭعا دەيىن ادام شىقتى. قاتىسۋشىلار سانى ارتا باستادى.
رىسقۇلوۆ، ساين، شىعىس اينالما جولى مەن تولە بي كوشەلەرىنىڭ بويىندا جولداردى جاۋىپ، كولىك قوزعالىسىن جابۋ ارەكەتى جاسالدى.
شەرۋشىلەرگە لاڭكەستەر، ەكسترەميستەر مەن قىلمىسكەرلەر قوسىلىپ، بيلىككە قارسى كۇش كورسەتىپ، اكىمدىكتى باسىپ الۋعا شاقىردى.
گارنيزوننىڭ بارلىق جەكە قۇرامى جاساقتالدى، قالاعا قوسىمشا پوليسيا بولىمشەلەرى مەن ۇلتتىق ۇلاننىڭ اسكەري قىزمەتكەرلەرى ورنالاستىرىلدى، ستراتەگيالىق نىساندار مەن تىرشىلىكتى قامتاماسىز ەتۋ وبەكتىلەرىن كۇزەتۋ كۇشەيتىلدى. تۇسكى ۋاقىتتا كەمىندە 10 مىڭ ادام باسىپ الىنعان مۋنيسيپالدىق كولىكتەردىڭ كومەگىمەن قورشاۋدى بۇزىپ، قالا اكىمشىلىگىن باسىپ الۋعا تىرىستى. ەكى ارەكەتى ءساتسىز بولعان سوڭ، نارازىلار الاڭنان شىعىپ كەتتى. كەتىپ بارا جاتىپ ولار قىزمەتتىك جانە ءورت ءسوندىرۋ ماشينالارىن ورتەپ، "جەدەل جاردەم" كولىكتەرىن زاقىمداعان.
5 قاڭتار كۇنى تاڭەرتەڭ 20 مىڭ ادام قالا ورتالىعىنا قاراي بەت الدى. ساندىق ارتىقشىلىق پەن قارۋدى پايدالانىپ، بىرنەشە قورعانىس شەبىن بۇزىپ ءوتىپ، رەسپۋبليكا الاڭىنا جەتىپ، اكىمدىك عيماراتىن باسىپ الدى.
قالانىڭ ءارتۇرلى اۋداندارىندا سودىرلار توپتارى وق جاۋدىرىپ، قالانى قيراتىپ، قارۋ-جاراق دۇكەندەرىن باسىپ الىپ، بەي-بەرەكەت وق جاۋدىرىپ، كەزدەيسوق ءوتىپ بارا جاتقانداردى ءولتىرىپ، ساۋدا ورتالىعىندا بۇلىكتەر جاساي باستادى. سول كۇنى كەشكە الماتى اكىمى ب. ساعىنتايەۆتىڭ كورتەجىنە وق اتىلدى. قازاقستان رەسپۋبليكاسىنىڭ پرەزيدەنتى الماتىدا توتەنشە جاعداي ەنگىزدى.
قاڭتاردىڭ 5-ىنەن 6-سىنا قاراعان ءتۇنى سودىرلار پوليسيا ءبولىمىن، المالى، جەتىسۋ، اۋەزوۆ، بوستاندىق اۋداندىق بولىمشەلەرىن باسىپ الماق بولعان.
قارۋ-جاراق پەن اسكەري تەحنيكانى تارتىپ الۋ ماقساتىندا قورعانىس مينيسترلىگىنىڭ اسكەري بولىمدەرىنە شابۋىل جاساۋ ارەكەتى جاسالدى. الماتىنىڭ حالىقارالىق اۋەجايى باسىپ الىندى.
قاڭتاردىڭ 6-سى مەن كۇنى بۇگىنگە دەيىن كۇش قۇرىلىمدارى لاڭكەستىككە قارسى وپەراسيا جۇرگىزۋدە.
«ازاماتتاردى ءماجبۇرلى شەكتەۋلەرگە شىدامدىلىقپەن قاراۋدى سۇرايمىن، سابىرلىق ساقتاۋعا، اسىرەسە انتيتەررورلىق وپەراسيالار جۇرگىزىلىپ جاتقان جەرلەردە قاۋىپسىزدىك شارالارىن ساقتاۋعا شاقىرامىن. ارانداتۋشىلىققا بوي الدىرماي، بارلىق كۇدىكتى فاكتىلەر مەن ادامداردى پوليسياعا حابارلاڭىز، سول ارقىلى قالامىزداعى ءتارتىپتى قالپىنا كەلتىرۋدە قۇقىق قورعاۋ ورگاندارىنا ۇلكەن كومەك كورسەتەسىز»، - دەدى قانات تايمەردەنوۆ الماتىلىقتارعا.