قىلمىسكەرلەردىڭ قولىنان 2 مىڭعا جۋىق نىسان زارداپ شەكتى
16 قاڭتاردا وتكەن بريفينگتە الماتى پروكۋرورى بەرىك جۇيرىكتايەۆ قالاداعى قوعامدىق قاۋىپسىزدىكتى قالپىنا كەلتىرۋ جۇمىستارى قالاي ءجۇرىپ جاتقانىن ايتتى، دەپ حابارلايدى Almaty-akshamy.kz.
ونىڭ ايتۋىنشا، بارلىق قىلمىستاردى تەرگەۋ ءۇشىن قۇقىق قورعاۋ ورگاندارىنىڭ تاجىريبەلى قىزمەتكەرلەرىنەن تۇراتىن ۆەدومستۆوارالىق تەرگەۋ توبى قۇرىلدى.
«ءبىز لاڭكەستىك ارەكەتتەرگە جانە باسقا دا قىلمىستارعا قاتىسى بار ادامداردى انىقتاۋ جانە ۇستاۋ بويىنشا جۇمىس ىستەپ جاتىرمىز. قوعامدىق قاۋىپسىزدىكتى قالپىنا كەلتىرۋ بويىنشا شارالار قابىلدانۋدا. ءقازىر قۇقىق قورعاۋ ورگاندارى 405 قىلمىستىق ءىستى تەرگەۋدە. سوتتىڭ سانكسياسىمەن 249 ادام قاماۋعا الىندى»، - دەدى ب. جۇيرىكتايەۆ.
ول قالا بويىنشا قىلمىسكەرلەردىڭ قولىنان 2 مىڭعا جۋىق نىسان زارداپ شەككەنىن حابارلادى. تەرگەۋشىلەر باسىم تارتىپپەن زارداپ شەككەن بيزنەس نىساندارىن تەكسەرەدى. وقيعا ورنىنان كوپتەگەن دالەلدەمەلەر، زاتتاي دالەلدەمەلەر جانە قىلمىس ىزدەرى الىنادى. بۇل بانديتتەردىڭ كيىمدەرى، بەينەجازبالار، قىلمىس قۇرالدارى، ونىڭ ىشىندە 127 قارۋ. الىنعان بەينەماتەريالدار قىلمىسقا قاتىسۋشىلاردى انىقتاۋ جانە كەيىننەن سايكەستەندىرۋ ءۇشىن پايدالانىلادى.
«جۇمىس ادام قۇقىقتارى جونىندەگى ۋاكىلمەن، قۇقىق قورعاۋ ۇيىمدارىنىڭ وكىلدەرىمەن، ادۆوكاتتار القاسىمەن جانە كاسىپكەرلەر پالاتاسىمەن تىعىز ءوزارا ءىس-قيمىلدا جۇرگىزىلۋدە. قامالعانداردى ۇستاۋدى تاۋەلسىز باعالاۋ ءۇشىن ولارعا تەرگەۋ يزولياتورلارىنا كىرۋ مۇمكىندىگى قامتاماسىز ەتىلدى»، - دەدى قالا پروكۋرورى.
ونىڭ ايتۋىنشا، ازاماتتاردى جابىرلەنۋشى دەپ تانۋعا ەرەكشە كوڭىل بولىنەدى. بۇل وتەماقى الۋ ءۇشىن ماڭىزدى.
پروكۋرورلار پرەزيدەنتتىڭ تاپسىرمالارىن ورىنداۋ ءۇشىن اۋىر جازا بەرۋگە ارەكەت جاساماعاندارعا جازانى جەڭىلدەتۋ شارالارىن قابىلداۋدا.
«بۇل جەردە قۇقىق بۇزۋشىنىڭ ءىسى جەكە قارالۋدا. ماسەلەن، قالا پروكۋراتۋراسى 71 ادامنىڭ جازاسىن جەڭىلدەتتى، تەرگەۋ يزولياتورىنان 91 ادامدى بوساتتىق. بۇل باعىتتاعى جۇمىستار جالعاسۋدا. پروكۋرورلار قىلمىستىق پروسەستىڭ بارلىق كەزەڭدەرىندە ازاماتتاردىڭ كونستيتۋسيالىق قۇقىقتارىنىڭ ساقتالۋىن قامتاماسىز ەتەدى»، - دەدى ب. جۇيرىكتايەۆ.
ول قالادا تەرروريزمگە قارسى وپەراسيا جالعاسىپ جاتقانىن ەسكە سالىپ، كوپشىلىكتەن شەكتەۋلەر مەن قۇقىقتىق ءتارتىپتى ساقتاۋدى سۇرادى.
«فەيكتەردىڭ تارالۋىنا جول بەرمەۋگە جانە ارانداتۋشىلىققا بوي الدىرماۋعا شاقىرامىن. ءبىراق قۇقىق قورعاۋ ورگاندارى قىزمەتكەرلەرىنىڭ قۇقىقتاردى بۇزۋىنا نەمەسە قياناتىنا تاپ بولساڭىز، پروكۋراتۋراعا حابارلاسىڭىز. كۇندەلىكتى ونلاين قابىلداۋ جۇرگىزەمىز، الەۋمەتتىك جەلىلەردە بارمىز»، - دەدى الماتى پروكۋرورى.