ماماندار پاناسىز بالالاردى ىزدەي باستادى.
كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ ماقساتىندا قالا پوليسەيلەرى ارنايى ءىس-شارانى باستادى. اتالمىش شارا قىركۇيەكتىڭ 13-19 ارالىعىندا وتەدى، دەپ حابارلايدى Almaty-akhsamy.kz.
ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، مۇددەلى مەملەكەتتىك ورگانداردىڭ، ۇكىمەتتىك ەمەس ۇيىمداردىڭ، قوعام مەن بۇقارالىق اقپارات قۇرالدارى وكىلدەرىنىڭ قاتىسۋىمەن الماتى قالاسىندا «ءجاسوسپىرىم» جەدەل الدىن الۋ ءىس-شاراسى وتكىزىلۋدە.
«ءىس-شارانىڭ باستى ماقساتى – جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋ، ءبىلىم بەرۋ ۇيىمدارىنىڭ قاتىسۋشىلارى اراسىنداعى قۇقىق بۇزۋشىلىقتاردىڭ جولىن كەسۋ، كامەلەتكە تولماعانداردىڭ قۇقىقتارىن قورعاۋ، ولاردىڭ قۇقىقتىق ساۋاتتىلىعىن ارتتىرۋ سالاسىنداعى اكىمشىلىك قۇقىق بۇزۋشىلىقتاردى انىقتاۋ، سونداي-اق بالالارعا قاتىستى قىلمىستىق قۇقىق بۇزۋشىلىقتاردىڭ الدىن الۋ»، – دەپ حابارلادى الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.
ەستەرىڭىزگە سالا كەتەيىك، بۇعان دەيىن الماتى قالالىق پوليسياسىنىڭ باستىعى جاسوسپىرىمدەر اراسىنداعى قىلمىستىڭ ازايعانى تۋرالى حابارلاعان بولاتىن. قانات تايمەردەنوۆتىڭ ايتۋىنشا، قابىلدانعان شارالاردىڭ ناتيجەسىندە بۇگىندە جاسوسپىرىمدەر اراسىنداعى قىلمىستىڭ 22،4% تومەندەۋى بايقالادى. سونداي-اق كامەلەتكە تولماعاندارعا قارسى جاسالعان قىلمىستار سانى 5،6%-عا تومەندەدى.
«كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ جۇمىستارى ەرەكشە باقىلاۋدا. اعىمداعى جىلدىڭ باسىنان بەرى 417 ءجاسوسپىرىم مەن 375 قولايسىز وتباسى انىقتالىپ، ىشكى ىستەر ورگاندارىنا ەسەپكە الىندى. 12 قيىن ءجاسوسپىرىم ديەۆيانتتى ىس-ارەكەتتى بالالارعا ارنالعان ارنايى ءبىلىم بەرۋ ۇيىمىنا جىبەرىلدى. سونىمەن قاتار 407 كامەلەتكە تولماعاندار قيىن ومىرلىك جاعدايداعى بالالاردى قولداۋ ورتالىعىنا ورنالاستىرىلدى. مۇددەلى مەملەكەتتىك ورگاندار، قوعامنىڭ قاتىسۋىمەن كامەلەتكە تولماعاندار اراسىندا قۇقىق بۇزۋشىلىقتىڭ الدىن الۋ ماقساتىندا جىل باسىنان بەرى 14 جالپىقالالىق جەدەل الدىن الۋ ءىس-شارالارى جۇرگىزىلدى»، – دەپ تۇيىندەدى قانات تايمەردەنوۆ.