جۇيە ازىرلەۋشىلەردىڭ مالىمەتىنشە، وبلىستىڭ ءار اۋدانىندا جەدەل باسقارۋ ورتالىقتارى قۇرىلادى.
الماتى وبلىسىندا Sergek كامەرالارىن جاپپاي ورناتۋ جوسپارلانىپ وتىر، دەپ حابارلايدى aqshamnews.kz
«بۇل قوعامدىق باقىلاۋعا ارنالعان 9 مىڭنان استام بەينەباقىلاۋ كامەراسى جانە 325 اپپاراتتىق-باعدارلامالىق كەشەن. ءار اۋداندا بەينەباقىلاۋ جۇيەسىن باقىلاۋ، كامەرالاردان مالىمەتتەر جيناۋ جانە توتەنشە جاعدايلاردا پوليسيا ارەكەتتەرىن ۇيلەستىرۋ ءۇشىن جەدەل باسقارۋ ورتالىعى قۇرىلادى»، – دەلىنگەن حابارلامادا.
سونىمەن قاتار، كولىك اعىندارىن تالداۋ، مونيتورينگ جانە بولجاۋ ءۇشىن سيفرلىق ونىمدەردى بەلسەندى قولدانۋ جوسپارلانىپ وتىر.
جامبىل اۋدانىندا 800 كامەرا ورناتىلدى، تالعار اۋدانىندا جۇمىستار جالعاسۋدا. اۋقىمدى جوبانى التى اي ىشىندە جۇزەگە اسىرۋ كوزدەلگەن. جول كەشەندەرىن ورناتۋ ورىندارىن پوليسيا انىقتايدى.