قازاقستاندا التىنعا سۇرانىس جوعارى، ءبىراق ونىڭ باعاسى مەن ساقتالۋ ادىستەرى جايلى كوپشىلىك تولىق اقپاراتقا يە ەمەس. الەۋمەتتىك جەلىلەردە ءجيى كەزدەسەتىن پىكىرلەردەن التىننىڭ باعاسى مەن ونى ساقتاۋ جولدارىنا قاتىستى سۇراقتاردىڭ كوبەيگەنىن بايقاۋعا بولادى، دەپ حابارلايدى aqshamnews.kz
التىننىڭ باعاسى جانە ەرەكشەلىگى
التىن — وتە قىمبات مەتالل، جانە ونىڭ باعاسى تۇراقسىز بولىپ تۇر. قازاقستان ۇلتتىق بانكىنىڭ رەسمي سايتىندا 1 گرامم تازا التىننىڭ قازىرگى باعاسى 44 685 تەڭگە دەپ كورسەتىلگەن. بۇل التىننىڭ ارنايى سىرعا-ساقينا تۇرىندەگى اشەكەيلەردەن ايتارلىقتاي ايىرماشىلىعى بار، سەبەبى ول وتە تازا التىن (سىناماسى 999،9).
وتاندىق بانكتەردە ساتىلاتىن التىن قۇيمالاردىڭ سالماعى 5 گرامنان باستالىپ، 100 گرامعا دەيىن بارادى. ەگەر التىن قۇيمالارىن ساتىپ العىڭىز كەلسە، تومەندەگى باعالارعا نازار اۋدارايىق:
- 5 گرامم — 223 425 تەڭگە
- 10 گرامم — 446 850 تەڭگە
- 20 گرامم — 893 700 تەڭگە
- 50 گرامم — 2 234 250 تەڭگە
- 100 گرامم — 4 468 500 تەڭگە
بۇل كورسەتكىشتەر التىندى ساقتاۋ مەن ساتىپ الۋدىڭ قانشالىقتى قىمبات ءارى كۇردەلى ەكەنىن كورسەتەدى.
التىندى قالاي ساقتاۋ كەرەك؟
اركىم التىندى قالاي جانە قايدا ساقتايتىنىن ءوزى شەشەدى. ۇيدە شاعىن سەيفتە ساقتاۋعا دا مۇمكىن، ءبىراق بۇل ءتاسىل تولىق ءقاۋىپسىز دەپ ايتۋ قيىن. ەگەر التىندى ءقاۋىپسىز جەردە ساقتاۋ قاجەت بولسا، ەڭ سەنىمدى ءادىس — بانكتەگى ۇياشىق. ءبىراق بۇل قىزمەت اقىلى جانە بارلىق بانكتەردە قولجەتىمدى ەمەس.
قازاقستانداعى ءبىرقاتار بانكتەر سەيفتەردى ۇسىنادى. ءبىراق ولار ءارتۇرلى باعادا جانە كولەمدە بولادى. كەيبىر بانكتەردە سەيفتەردىڭ مەحانيزمى مەن كولەمىنە قاراي باعا وزگەرىپ وتىرادى:
- مەحانيكالىق سەيف (1 كۇنگە — 400 تەڭگە، 1 ايعا — 5 000 تەڭگە، 1 جىلعا — 39 000 تەڭگە)
- بيومەتريالىق باقىلاۋى بار سەيف (1 كۇنگە — 1 000 تەڭگە، 1 ايعا — 10 000 تەڭگە، 1 جىلعا — 50 000 تەڭگە)
سەيفتەر كولەمى بويىنشا دا ءارتۇرلى:
- كىشى سەيف (بيىكتىگى 100 مم دەيىن)
- ورتاشا سەيف (بيىكتىگى 101-294 مم دەيىن)
- ۇلكەن سەيف (بيىكتىگى 295-600 مم دەيىن)
مىسالى، بىرنەشە التىن قۇيمانى ساقتايتىن كىشى سەيفتىڭ قۇنى 1 كۇنگە 400 تەڭگە، ال جىلىنا 39 000 تەڭگە بولۋى مۇمكىن.
التىن — سەنىمدى ينۆەستيسيا ما؟
التىندى ينۆەستيسيا رەتىندە قاراستىرۋعا بولادى، ءبىراق ونىڭ باعاسى تۇراقتى ەمەس. ول بىردە ءوسىپ، بىردە ءتۇسىپ وتىرادى، ءبىراق ۇزاق مەرزىمدە التىن ادەتتە قىمباتتايدى. سوڭعى ءۇش جىلداعى التىننىڭ باعاسىن قاراستىرايىق:
- 2021 جىلى جەلتوقساندا 1 گرامم التىن — 24 000 تەڭگە
- 2022 جىلى جەلتوقساندا 1 گرامم التىن — 26 000 تەڭگە
- 2023 جىلى جەلتوقساندا 1 گرامم التىن — 29 000 تەڭگە
- 2024 جىلى جەلتوقساندا 1 گرامم التىن — 40 000 تەڭگە
بۇگىنگى كۇنى 1 گرامم التىننىڭ ناقتى قۇنى — 44 685 تەڭگە. دەمەك، سوڭعى 3 جىلدا 1 گرامم التىننىڭ قۇنى مينيمۋم 20 000 تەڭگەگە وسكەن.
ەگەر ءسىز 2021 جىلى 480 000 تەڭگەگە 20 گرامم التىن ساتىپ الساڭىز، بۇگىنگى كۇنى ونىڭ قۇنى 893 700 تەڭگە بولار ەدى.
التىندى ساتىپ الۋ مەن ساقتاۋ — قىمبات ءارى جاۋاپكەرشىلىكتى تالاپ ەتەتىن پروسەسس. ول نارىقتاعى وزگەرىستەرگە بايلانىستى قۇنىن جوعارىلاتۋى مۇمكىن، ءبىراق اركىم ءۇشىن التىنعا سالىنعان ينۆەستيسيانىڭ تابىستى بولاتىنىنا كەپىلدىك جوق. سوندىقتان التىنعا اقشا سالۋعا تۇرا ما، جوق پا — ونى اركىم ءوز قاجەتتىلىكتەرىنە جانە قارجىلىق مۇمكىندىكتەرىنە قاراي شەشۋى كەرەك.