حالىققا ءقاۋىپ جوق.
تجد وبلىستىڭ قازىرگى احۋالىنان حاباردار ەتتى، دەپ حابارلايدى Almaty-akshamy.kz
تالعار وزەنىندەگى سۋ شىعىنى تومەندەدى. وزەندە كەزەكشىلىك جانە مونيتورينگ جالعاسىپ جاتىر. حالىققا ءقاۋىپ جوق.
21 شىلدە كۇنى الماتى وبلىسىندا جاۋىن-شاشىن سالدارىنان سۋ دەڭگەيى كوتەرىلگەن ەدى. تالعار وزەنى بويىنداعى ۇلكەن پوليانا ولشەۋ ستانساسىنىڭ مالىمەتىنشە، بيىك تاۋلى ايماقتاردا جاۋعان جاۋىن-شاشىن سالدارىنان سول تالعار وزەنىندەگى سۋ دەڭگەيى سەكۋندىنا 18 تەكشە مەترگە كوتەرىلگەن.
سونىمەن قاتار 21 شىلدەدە ساعات 21:00-دە الماتى وبلىسى تجد كەزەكشى بولىمىنە ورمان شارۋاشىلىعى قىزمەتكەرلەرىنەن ەڭبەكشىقازاق اۋدانىنداعى ەسىك وزەنىنىڭ باسسەينىندە سەل اعىنىنىڭ قالىپتاسۋى سالدارىنان تاس جولدىڭ توسەمى شايىلىپ كەتۋىنە بايلانىستى ورمانشىنىڭ ۇيىندە 9 ادام دەمالۋشى جانە 1 ورمانشى جول قاتىناسىنسىز قالعانى تۋرالى حابارلاما كەلىپ ءتۇستى.
كۇندىز ولار ورمانشىنىڭ ۇيىندە بولعان، بايلانىس بولمادى. حابارلاما كەلىپ تۇسكەن ساتتەن باستاپ الماتى وبلىسى تجد جەدەل-قۇتقارۋ جاساعىنىڭ جانە رەسپۋبليكالىق جەدەل-قۇتقارۋ جاساعىنىڭ كۇشتەرى مەن قۇرالدارىنان 11 ادام مەن 3 بىرلىك تەحنناسى جۇمىلدى. جەدەل توپ قۇرىلدى. جول توسەمىن سۋ شايىپ وتكەندىكتەن ول جەرگە جەتۋدىڭ جالعىز مۇمكىندىگى جاياۋ بارۋ ەدى.
"ءتۇنى بويى قۇتقارۋشىلار 9 ادامنان تۇراتىن تۋريستەر توبى مەن ورمان شارۋاشىلىعى قىزمەتكەرىن ىزدەستىردى. 22 شىلدەدە ساعات 05:45-تە رەسپۋبليكالىق جەدەل-قۇتقارۋ جاساعى مەن تجد ىزدەستىرۋ توبى تۋريستەر توبى مەن ورمان شارۋاشىلىعى قىزمەتكەرى تۇرعان ورمانشىنىڭ ۇيىنە جاياۋ جەتتى. تۋريستەرگە مەديسينالىق جانە باسقا كومەك قاجەت ەمەس. تۋريستەردىڭ ايتۋىنشا، ولار ورمانشىنىڭ ۇيىندە بىرنەشە كۇن بولۋدى جوسپارلاپ وتىر"، - دەپ حابارلادى الماتى وبلىسى تجد.
جامبىل اۋدانىندا تاعى ءبىر ىزدەستىرۋ-قۇتقارۋ جۇرگىزىلدى. 21 شىلدەدە ساعات 23:50-دە جامبىل اۋدانىنىڭ بەسمويناق اۋىلىندا تجد جانە ق ر تجم رەسپۋبليكالىق جەدەل-قۇتقارۋ جاساعىنان 11 ادام مەن 2 بىرلىك تەحنيكا ءتورت ادام ىزدەستىردى. ءوتىنىش بەرۋشىنىڭ سوزىنشە، ولار 21 شىلدە كۇنى تاڭەرتەڭ الماتىدان تاۋعا شىعىپ كەتكەن جانە بايلانىسقا شىقپادى. قۇتقارۋشىلار ىزدەدى. 22 شىلدەدە تاڭەرتەڭ دەمالۋشىلار ۇيالى بايلانىس ارنالارى ارقىلى بايلانىسقا شىقتى. مەديسينالىق كومەك قاجەت ەمەس. ىزدەۋ-قۇتقارۋ جۇمىسى اياقتالدى. جاعداي تۇراقتى.
الماتى وبلىسىنىڭ تجد ازاماتتاردى اۋا رايىنىڭ وزگەرۋىن باقىلاۋعا جانە ساقتىق شارالارىن ساقتاۋعا شاقىرادى.