قازاقستان كاسىپكەرلەرى تۇڭعىش رەت حالىقارالىق ىرىمشىك بايقاۋىنا قاتىسادى

بۇل حالىقارالىق كونكۋرسقا قازاقستاننان بۇرىن سوڭدى ەشكىم قاتىسپاعان.

ماڭعىستاۋلىق «جەتى لاق» فەرماسى Mondial du fromage-2023 حالىقارالىق ىرىمشىك بايقاۋىنا قاتىسادى، دەپ حابارلايدى Almaty-akshamy.kz

ماڭعىستاۋ وبلىسى اكىمىنىڭ باسپا ءسوز قىزمەتىنىڭ اقپاراتىنا ساي، قازاقستاندىقتار كونكۋرس ۇيىمداستىرۋشىلارىنان العاش رەت اككرەديتاسيا الدى.

2020 جىلدان باستاپ جۇمىس ىستەيتىن «جەتى لاق» فەرماسى ءتۇپقاراعان اۋدانىنداعى اقشۇقىر اۋىلىندا ورنالاسقان.

كاسىپكەرلەر پاستەرلەنگەن ەشكى ءسۇتىن، يوگۋرت، ايران، سۇزبە، قايماق جانە ىرىمشىكتىڭ 12 ءتۇرىن شىعارادى.

كوبزيەۆتەر وتباسى ايىنا 3،5 توننا ەشكى ءسۇتىن وندىرەدى. فەرما 10 گا جەردى الىپ جاتىر، ونىڭ ءتورت گەكتارى ەشكى وسىرۋگە ارنالسا، قالعان ايماقتا جەم-شوپ قويماسى مەن ءسۇت وڭدەۋ سەحى ورنالاسقان.

«بيىل ءبىز ءوندىرىستى دامىتۋعا باعىتتالعان قايتارىمسىز 5 ملن تەڭگە گرانت ۇتىپ الدىق. سونىمەن قاتار، «اۋىل اماناتى» باعدارلامالارىنىڭ قاتىسۋشىلارىمىز. اۋىل شارۋاشىلىعى كاسىپورنىن ءوز اقشاڭا دامىتۋ وتە قيىن، وسى تۇرعىدا مەملەكەت اۋىل شارۋاشىلىعى وندىرۋشىلەرىنە كوڭىل ءبولىپ، قولداۋ كورسەتىپ وتىرعانى قۋانتادى. بيىلعى جىلى ءبىز ءۇشىن ماڭىزدى وقيعا Mondial du fromage-2023 حالىقارالىق ىرىمشىك بايقاۋىنا قاتىسۋ. وندا ءبىز ءوز ونىمدەرىمىزدى تانىستىرامىز. ايتا كەتۋ كەرەك، ەلىمىز تاۋەلسىزدىك العالى بەرى قازاقستان العاش رەت الەمدىك ىرىمشىك جاساۋشىلار بايقاۋىنا ءوز ونىمدەرىن ۇسىناتىن بولادى»، - دەدى ىرىمشىك دايىنداۋشى الەكساندرا گريگولوۆا.

فرانسۋزدىق Le Mondial du fromage بايقاۋى قىركۇيەك ايىنىڭ 10-12 ارالىعىندا تۋر قالاسىندا وتەدى.

ەۋروپادا وتەتىن بۇل حالىقارالىق ءىس-شارا - ءسۇت ونىمدەرىن شىعارۋشى كاسىپكەرلەردىڭ ءوز ونىمدەرىن ۇسىنا الاتىن جوعارى دەڭگەيدەگى الاڭ.