الماتى مەملەكەتتىك بيزنەس كوللەدجى «جۇمىسشى ماماندىقتارىنىڭ جىلى» اياسىندا، الماتى قالاسى ءبىلىم باسقارماسىنىڭ قولداۋىمەن جانە تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋ باستاماسىن جۇزەگە اسىرۋ ماقساتىندا، بەس جۇلدىزدى InterContinental Almaty قوناق ۇيىندە دۋالدى وقىتۋ ۇلگىسىنىڭ تابىستى ناتيجەلەرىن كورسەتۋگە ارنالعان باسپا ءسوز تۋرىن وتكىزدى.
ءىس-شارا بارىسىندا ەلىمىزدەگى بەدەلدى قوناق ۇيلەردىڭ بىرىندە جۇمىس ىستەپ جۇرگەن تۇلەكتەردىڭ تابىسقا، جەتىستىككە جەتۋ جولىمەن تانىستىق. سونداي-اق، ولار ايگىلى Real Madrid فۋتبول كومانداسى مەن «قايرات» كلۋبى اراسىنداعى تاريحي ماچ كەزىندە اتالمىش قوناق ۇيگە تۇسكەن شەتەلدىكتەرمەن بولعان اسەرلى ساتتەردى ءبولىستى.
"مەن كوللەدجدى «تاماقتاندىرۋدى ۇيىمداستىرۋ» ماماندىعى بويىنشا وقىدىم، بىلىكتىلىگىم – اسپاز. دۋالدى وقىتۋ باعدارلاماسىنىڭ اسەرى ەرەكشە. وندا تەورياعا قاراعاندا تاجىريبە كوبىرەك بولدى. بۇل – ۇلكەن ارتىقشىلىق. سەبەبى ناقتى وندىرىستە جۇمىس ىستەۋ بارىسىندا كاسىبي شەبەرلىگىڭ شىڭدالادى. ۇجىممەن، شەف-اسپازدارمەن بىرگە قويان-قولتىق ەڭبەك ەتۋ ۇلكەن مەكتەپ. ءقازىر مەن جوعارى دەڭگەيلى InterContinental Almaty قوناق ۇيىندە اسپاز بولىپ جۇمىس ىستەيمىن جانە ءوزىمدى ناعىز مامان رەتىندە سەزىنەمىن. تاعامعا قوسىلاتىن ەت، كوكونىس بولسىن، ءبارىنىڭ قالاي كەسىلگەنى، تۋرالعانىنا دەيىن ماڭىزدى. ءتىپتى، تۇزدىعى دا ارتىق نە كەم بولماۋعا ءتيىس. تالعامپاز بولۋ دا ماڭىزدى. ۇزدىكسىز جەتىلۋگە، ءبىلىم الۋعا قۇشتارلىق تا ۇلكەن ءرول اتقارادى. بولاشاقتا وسى كاسىبىمنىڭ شىڭىنا جەتىپ، ناعىز شەبەرى بولعىم كەلەدى"، – دەيدى كوللەدج تۇلەگى، اسپاز دەنيس شيفمان.
ءيا، اتالعان بيزنەس كوللەدجدىڭ تۇلەكتەرى بەس جىل قاتارىنان InterContinental Almaty قوناق ءۇيىنىڭ ءتۇرلى بولىمدەرىندە – ىستىق جانە سۋىق سەحتاردا، كونديتەرلىك جانە بانكەت بولىمدەرىندە تابىستى ەڭبەك ەتۋدە. ولاردىڭ قاتارىندا اسپازدار، شەف-اسپازدار، كونديتەرلەر جانە سەرۆيس مەنەدجەرلەرى بار.
"بيىل كوللەدجدى 589 ستۋدەنت ءبىتىرىپ شىقتى، ولاردىڭ 90%-ى العان ماماندىعى بويىنشا جۇمىسقا ورنالاستى. بۇل – جۇمىس بەرۋشىلەرمەن جۇيەلى ءوزارا ءىس-قيمىلدىڭ جانە پراكتيكالىق باعىتتاعى ءبىلىم بەرۋدىڭ ناقتى ناتيجەسى. ءبىزدىڭ الەۋمەتتىك سەرىكتەستەرىمىزدىڭ، سونىڭ ىشىندە بەس جۇلدىزدى InterContinental Almaty قوناق ءۇيىنىڭ قولداۋىنىڭ ارقاسىندا ستۋدەنتتەر جوعارى دەڭگەيلى قىزمەت كورسەتۋ سالاسىندا تاجىريبە جيناقتاپ، تۇراقتى جۇمىس ورنىن تابۋدا"، – دەپ اتاپ ءوتتى الماتى مەملەكەتتىك بيزنەس كوللەدجىنىڭ ديرەكتورى اينۇر مۇقاجانوۆا.
پرەسس-تۋر كەزىندە قوناق ۇيدەگى زاماناۋي وندىرىستىك ورىندار كورسەتىلىپ، وندا كوللەدج تۇلەكتەرى العان بىلىمدەرى مەن داعدىلارىن ءتيىمدى قولدانىپ جۇرگەنىن باياندادى. سونداي-اق، قوناق ءۇي وكىلدەرى جاس مامانداردى وندىرىستىك ورتاعا بەيىمدەۋ، كاسىبي ءوسۋ مەن تالىمگەرلىك باعدارلامالارى تۋرالى تاجىريبەلەرىمەن ءبولىستى. ال ءبىز ءوز كەزەگىمىزدە ەڭبەك نارىعىندا سۇرانىسقا يە بىلىكتى مامانداردىڭ دايارلىعىنىڭ جوعارى دەڭگەيىنە جانە دۋالدى وقىتۋدىڭ تيىمدىلىگىنە كوز جەتكىزدىك. الماتى قالاسىنداعى تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋدىڭ ناقتى ناتيجەلەرىمەن تولىق تانىسىپ، كوللەدج بەن الەۋمەتتىك سەرىكتەستەردىڭ بىلىكتى كادرلاردى دايارلاۋعا قوسىپ وتىرعان ۇلەسىنىڭ زور ەكەنىن باعامدادىق.
"اسپاز بولۋدى مەكتەپتە وقىپ جۇرگەندە ارمانداعانمىن. مەنىڭشە، بولاشاقتا كىم بولاتىنىڭدى قاتەلەسپەي تاڭداي ءبىلۋ كەرەك. سەبەبى، ىستەگەن ءىسىڭ ساعان قۋانىش، ءلاززات سىيلاسا عانا جەتىستىككە جەتەسىڭ. وسى قاعيدانى بىزگە كوللەدج ديرەكتورىنىڭ وقۋ-وندىرىستىك جۇمىس جونىندەگى ورىنباسارى ۇلجالعاس كامال قىزى جانە وزگە دە ۇستازدارىم ىلعي قايتالاپ، سانامىزعا قۇيىپ وتىرادى. مەن ءقازىر وسى قوناق ۇيدە تاجىريبەدەن ءوتىپ ءجۇرمىن. كوبىنە سۇيىق، سورپا تاعامىن، تۇزدىقتار ازىرلەيمىن. جالاقى تولەنەدى. شاكىرتاقى دا الامىن. وسىلايشا ادال كاسىپتىڭ نانى دا ءتاتتى بولاتىنىن سەزىنىپ ءجۇرمىز. وقىعانىڭدى ىسپەن ۇشتاستىرۋ مۇلدەم باسقا نارسە، كوپ تاجىريبە جيناپ ءجۇرمىن. مۇندا ءوزىمىزدىڭ كوللەدجدىڭ تۇلەگى، ارداگەر-مامان مويسەيەۆا ولگا كونستانتينوۆنانىڭ دا قامقورلىعى شەكسىز. ۇلكەن ۇجىممەن ارالاسۋ، ادامي قارىم-قاتىناستىڭ دا ادەبىن مەڭگەرۋ – ءبارى-بارى ءبىزدىڭ مىقتى مامان بولىپ شىعۋىمىزعا جول اشىپ بەردى. بىزگە تەك ادال جۇمىس ىستەۋ عانا قالىپ تۇر"، – دەيدى كوللەدجدىڭ 2-كۋرس ستۋدەنتى رامازان تۇرعانبەك.
وسى رەتتە ايتا كەتسەك، الماتى مەملەكەتتىك بيزنەس كوللەدجى ەلىمىزدەگى سالالىق ۇزدىك وقۋ ورىندارىنىڭ ءبىرى رەتىندە ءوز ۇستانىمىن نىق ساقتاپ كەلەدى. مۇنداي جەتىستىك – الەۋمەتتىك سەرىكتەستىككە جانە كاسىبي مامانداردى دايارلاۋداعى ورتاق جاۋاپكەرشىلىككە نەگىزدەلگەن ەڭبەكتىڭ ناتيجەسى.
InterContinental Almaty – الماتى مەملەكەتتىك بيزنەس كوللەدجىنىڭ نەگىزگى الەۋمەتتىك سەرىكتەستەرىنىڭ ءبىرى ءارى قازاقستاندىق قوناقجايلىلىق يندۋسترياسىنىڭ بەدەلدى وكىلى. مۇندا جوعارى دەڭگەيدەگى سەرۆيس، زاماناۋي ستاندارتتار جانە حالىقارالىق تاجىريبە ۇيلەسىم تاپقان. قوناق ۇيدە ماڭىزدى ىسكەرلىك جانە مادەني ءىس-شارالار وتكىزىلەدى، ءتۇرلى ەلدەردىڭ دەلەگاسيالارى مەن مارتەبەلى مەيماندار قابىلدانادى. وسىنداي سەرىكتەسپەن بىرلەسە جۇمىس ىستەۋ – كوللەدج ستۋدەنتتەرى ءۇشىن كاسىبي تاجىريبە مەن الەمدىك دەڭگەيدەگى مامانداردان ۇيرەنۋدىڭ ۇلكەن مۇمكىندىگى ەكەنى ءسوزسىز.