پرەزيدەنتكە ءماجىلىستىڭ اعىمداعى قىزمەتى تۋرالى باياندالدى، دەپ حابارلايدى Aqshamnews.kz ءتىلشىسى اقورداعا سىلتەمە جاساپ.
ءماجىلىس ءتوراعاسى ەرلان قوشانوۆتىڭ ايتۋىنشا، دەپۋتاتتار مەملەكەت باسشىسىنىڭ ەلدى دامىتۋ جونىندەگى جولداۋلارى مەن تاپسىرمالارىن ۋاقتىلى ءارى ساپالى زاڭنامالىق تۇرعىدا قامتاماسىز ەتۋگە باسا ءمان بەرىپ وتىر.
قازىرگى تاڭدا 15 زاڭ قابىلدانىپ، سەناتقا جولداندى، پالاتانىڭ قاراۋىندا 77 زاڭ جوباسى بار. بيىلعى جىلدىڭ اياعىنا دەيىن قۇرىلىس جانە سيفرلىق كودەكستەر، سونداي-اق "بانك قىزمەتى تۋرالى" زاڭدى قابىلداۋ جوسپارلانعان. سونىمەن بىرگە سايلاۋ، تۇتىنۋشىلاردىڭ قۇقىقتارىن قورعاۋ، قۇقىقبۇزۋشىلىقتىڭ الدىن الۋ تۋرالى زاڭ جوبالارى پىسىقتالىپ جاتىر.
دەپۋتاتتار جەرگىلىكتى مەملەكەتتىك جانە ءوزىن-وزى باسقارۋ تۋرالى زاڭناماعا تۇزەتۋلەر ەنگىزۋگە، سونداي-اق كرەاتيۆتى يندۋستريا، عىلىمي زەرتتەۋ اۋماقتارىن دامىتۋ، تاريحي-مادەني مۇرا نىساندارىن قورعاۋ، باعباندىق شارۋاشىلىق سەرىكتەستىكتەردى مەملەكەتتىك قولداۋ بويىنشا زاڭ جوبالارىنا باستاماشى بولدى.
زاڭ شىعارۋ جۇمىسى جۇرتشىلىقتىڭ، ساراپشىلاردىڭ جانە ب ا ق وكىلدەرىنىڭ قاتىسۋىمەن اشىق جۇرگىزىلۋدە. بارلىق ساياسي پارتيالاردىڭ فراكسيالارى ءوز ەلەكتوراتىنىڭ سۇرانىسىنا سايكەس ۇسىنىستارىن بەلسەندى تۇردە ەنگىزىپ جاتىر. ماڭىزدى زاڭ جوبالارى قوعامدىق پالاتانىڭ وتىرىستارىندا قارالادى.
مەملەكەت باسشىسىنىڭ جاساندى ينتەللەكتىگە قاتىستى باستامالارىن ىسكە اسىرۋعا بەلسەندى اتسالىسىپ كەلە جاتقانىن ايتتى. قىركۇيەك ايىنىڭ سوڭىندا ءماجىلىس «جاساندى ينتەللەكت تۋرالى» زاڭ قابىلداپ، سەناتقا جولدادى. سونىمەن قاتار قازاقستاندىق جانە شەتەلدىك ساراپشىلاردىڭ قاتىسۋىمەن پارلامەنتتىك تىڭداۋ وتكىزىلدى.
دەپۋتاتتاردىڭ جانە ەنەرگەتيكا مينيسترلىگىنىڭ باستاماسىمەن اقتاۋدا مۇناي-گاز سالاسىنداعى ماشينا جاساۋ ءىسىن دامىتۋ فورۋمى ءوتتى. مۇناي-گاز سەكتورىنداعى ساتىپ الۋلاردا قازاقستاندىق ۇلەستى جۇيەلى تۇردە ارتتىرۋ جايلى شەشىم قابىلداندى. دەپۋتاتتار مۇنى ۇدايى باقىلاۋدا ۇستايدى.
ەلىمىزگە موڭعوليا ۇلى مەملەكەتتىك حۋرالىنىڭ جانە ماجارستان مەملەكەتتىك جينالىسىنىڭ ءتوراعالارى رەسمي ساپارمەن كەلدى. كوپتەگەن ەلدىڭ پارلامەنتتەرىمەن دوستىق توپتارى بەلسەنە قىزمەت اتقارۋدا، زاڭ شىعارۋ سالاسىندا تاجىريبە الماسۋ جولعا قويىلعان جانە مەملەكەتارالىق جوبالاردى قولداۋ بويىنشا جۇمىس جۇرگىزىلۋدە.
دەپۋتاتتار ۇقشۇ پارلامەنتتىك اسسامبلەياسى، تۇركپا، تمد پارلامەنتارالىق اسسامبلەياسى جانە باسقا دا كوپجاقتى ۇيىمدار اياسىندا تابىستى قىزمەت اتقارىپ كەلەدى.