بۇگىن، 9 قاڭتاردا الماتىدا قازاقستاندىق اكتەر مۇرات بيسەمبيندى اقتىق ساپارعا شىعارىپ سالۋ ءراسىمى ءوتىپ جاتىر، دەپ حابارلايدى Aqshamnews.kz ءتىلشىسى.
قوشتاسۋ ءراسىمى ساعات 10:00-دە الماتىنىڭ ورتالىق مەشىتىندە (مەكەنجايى: پۋشكين كوشەسى، 16) باستالدى. داتا، ۋاقىت جانە ورىن تۋرالى مالىمەتتى اكتەردىڭ قىزى حابارلاعان.
مۇرات بيسەمبين 54 جاسقا قاراعان شاعىندا دۇنيەدەن ءوتتى. ول وتاندىق كينوداعى رولدەرىمەن كوپشىلىككە كەڭىنەن تانىلىپ، حاريزماسىمەن جانە ەستە قالارلىق ەكراندىق بەينەلەرىمەن كورەرمەننىڭ ىقىلاسىنا بولەنگەن. اسىرەسە «رەكەتير» فيلمىندەگى رۋسلان ءرولى اكتەردىڭ تانىمالدىعىن ارتتىرىپ، ونى قازاقستاندىق كينو ونەرىندەگى ەڭ بەدەلدى تۇلعالاردىڭ بىرىنە اينالدىردى.
مارقۇمنىڭ ارىپتەسى جان بايجانبايەۆتىڭ ايتۋىنشا، اكتەر ءبىر جىلدان استام ۋاقىت ونكولوگيالىق دەرتپەن كۇرەسكەن. سوڭعى كەزدە جاعدايى كۇرت ناشارلاپ، شۇعىل يممۋنوتەراپيا قاجەت بولعانىمەن، دارىگەرلەردىڭ جانە جاقىندارىنىڭ كۇش-جىگەرىنە قاراماستان، ونى امان الىپ قالۋ مۇمكىن بولماعان.
مۇرات بيسەمبين 1972 جىلى 11 قازاندا قىزىلوردادا تۋعان. الدىمەن پوليتەحنيكالىق ينستيتۋتتى اۋىل شارۋاشىلىعىنىڭ ينجەنەر-مەحانيگى ماماندىعى بويىنشا تامامداعانىمەن، كەيىن اكتەرلىك جولدى تاڭداعان. ونەر يەسى وتباسىلى، ءۇش بالانىڭ اكەسى بولعان.