اتىراۋ وبلىسىندا وتباسىنىڭ جوعالۋى مەن كىسى ءولتىرۋ ءىسى: باستى كۇدىكتى ىزدەۋگە جاريالاندى

اتىراۋ وبلىسىندا قايىن اتا-ەنەسىن ءولتىردى دەگەن كۇدىككە ىلىنگەن سۇلتان سارسەمالييەۆكە ىزدەۋ جاريالاندى. بۇل اقپارات باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىندا شىقتى، دەپ حابارلايدى اqshamnews.kz ءتىلشىسى.

سۇلتان سارسەمالييەۆكە قاتىستى ىزدەستىرۋ ءىسى 8 قاڭتاردا اتىراۋ وبلىسىندا تىركەلگەن. ىزدەۋدى باستاعان – ىشكى ىستەر مينيسترلىگى، ال ىزدەستىرۋ جۇمىستارىن اتىراۋ وبلىستىق پوليسيا دەپارتامەنتى جۇرگىزىپ جاتىر.

جاعدايدىڭ جاي-جاپسارى

66 جاستاعى ماقسوت قارابالين مەن 64 جاستاعى ءناسىپ وتەشقالييەۆا اتىراۋ وبلىسىنداعى جانگەلدين اۋىلىندا تۇرعان. تۋىستارىنىڭ ايتۋىنشا، ەرلى-زايىپتى ءۇشىنشى توپ مۇگەدەكتىگى بار جاندار بولعان، مال شارۋاشىلىعىمەن اينالىسقان جانە تۋعان اۋىلىنان كوپ شىقپاعان. ولاردىڭ ءۇش بالاسى بار: ەكى قىزى جانە ءبىر ۇلى.

25 جەلتوقسان 2025 جىلى وڭىرلىك پوليسياعا تۋىستارىنان بۇكىل وتباسىنىڭ جوعالعانى تۋرالى حابار تۇسكەن. قۇقىق قورعاۋ ورگاندارىنىڭ مالىمەتىنشە، جەرگىلىكتى تۇرعىن ايەل ارىز جازىپ، اعاسى، ونىڭ جۇبايى جانە ەكى ەرەسەك بالاسى – 32 جاستاعى ۇلى ناۋرىز بەن 35 جاستاعى قىزى مەيرامگۇلدىڭ قاراشا ايىنان بەرى بايلانىسقا شىقپاي جۇرگەنىن ايتقان.

كەيىن انىقتالعانداي، وتباسى ۇيدەن بەلگىسىز باعىتقا شىعىپ كەتكەن، سودان بەرى ولاردىڭ قايدا ەكەنى جونىندە ەش اقپارات بولماعان.

پوليسيا ىزدەۋ جاريالاعان ءتورت ەرەسەك ادام:

• وتباسى وتاعاسى؛

• ونىڭ جۇبايى؛

• 32 جاستاعى ۇلى؛

• 35 جاستاعى قىزى.

جوعالعان ەرلى-زايىپتىنىڭ ءمايىتى تابىلدى

6 قاڭتاردا پوليسەيلەر زەينەتكەر ەرلى-زايىپتىنىڭ ءمايىتىن تاپقان. وسىدان كەيىن قۇقىق قورعاۋ ورگاندارى قىلمىستىق ءىس قوزعادى.

الەۋمەتتىك جەلىدە مارقۇمداردىڭ دەنەسى ءوز ۇيلەرىنىڭ اۋلاسىنداعى قورانىڭ ەدەنىنىڭ استىنان تابىلعانى جونىندە اقپارات تارادى. الايدا قۇقىق قورعاۋ ورگاندارى بۇل مالىمەتكە ازىرگە تۇسىنىكتەمە بەرمەگەن.

8 قاڭتاردا ەرلى-زايىپتىنى سوڭعى ساپارعا شىعارىپ سالۋ ءراسىمى ءوتتى. جەرلەۋ اتىراۋ وبلىسى قىزىلقوعا اۋدانىنا قاراستى جانگەلدين اۋىلىندا بولدى. مارقۇمدارمەن قوشتاسۋعا اۋىل تۇرعىندارى كوپ جينالعان. وقيعا ورنىنان ۆيدەونى وتباسىنىڭ قۇداسى ءارى اۋىلداسى بولىسكەن. ولاردى تانىعاندار ماقسوت قارابالين مەن ءناسىپ وتەشقالييەۆانى قاراپايىم، مومىن، ەلگە سىيلى ادامدار بولعانىن ايتادى.

سونىمەن قاتار تاعى ەكى ادامنىڭ – وتباسىنىڭ ۇلكەن قىزى مەن ورتاڭعى ۇلىن ىزدەۋ جۇمىستارى ءالى دە جالعاسىپ جاتىر.

وتباسىنىڭ كىشى قىزى قايدا؟ پوليسيا نە دەيدى

قازاقستاندىقتاردى تولعاندىرعان نەگىزگى سۇراقتاردىڭ ءبىرى – وتباسىنىڭ كىشى قىزىنىڭ قايدا ەكەنى بولدى.

"ۇلكەن قىزى مەن ۇلى 25 جەلتوقساننان بەرى ىزدەۋدە. وتباسىنىڭ كىشى قىزى مەن كۇيەۋ بالاسى ەلدەن تىس جەردە ەكەنى انىقتالدى. الايدا تۋىستارىنان ولاردىڭ جوعالعانى تۋرالى ارىز تۇسكەن جوق. سوعان قاراماستان، قۇقىق قورعاۋ ورگاندارى ءتيىستى تەكسەرۋ شارالارىن باستادى"، – دەلىنگەن اتىراۋ پد جاۋابىندا.

پوليسيا مالىمەتىنشە، كۇيەۋ بالاسى مەن كىشى قىزدارىنىڭ بەس بالاسى بار. قازىرگى تاڭدا بالالار كۇيەۋ بالاسىنىڭ تۋىستارىنىڭ قاراۋىندا.

سونىمەن بىرگە پوليسيا كىشى قىزدىڭ بۇل ءىس بويىنشا مارتەبەسى "كۇدىكتى" رەتىندە قاراستىرىلمايتىنىن ناقتىلادى.

باستى كۇدىكتى كىم: پوليسيا جانە تۋىستار بولجامى

8 قاڭتاردا پوليسيا اتىراۋ وبلىسى ماحامبەت اۋدانىنىڭ 29 جاستاعى تۇرعىنىن رەسمي تۇردە ىزدەۋگە جاريالادى. تەرگەۋ نۇسقاسىنا سايكەس، قىلمىسقا وسى ادامنىڭ قاتىسى بولۋى مۇمكىن. ءقازىر قۇقىق قورعاۋشىلار ونىڭ سىبايلاستارى بار-جوعىن دا تەكسەرىپ جاتىر.

الايدا ول كەزدە پوليسيا كۇدىكتى ادامنىڭ وتباسىنىڭ كۇيەۋ بالاسى ەكەنىن ناقتىلاماعان.

ال مارقۇمداردىڭ تۋىستارى كۇدىكتى رەتىندە ءدال كۇيەۋ بالانى اتايدى. قازا تاپقانداردىڭ تۋىسى اسەل مۇقانعالييەۆا كىشى قىز بەن ونىڭ كۇيەۋى كورشى ماحامبەت اۋىلىندا تۇرعانىن ايتقان.

تۋىسىنىڭ سوزىنشە، كۇيەۋ بالا جوعالعانداردى سوڭعى كورگەن ادام بولۋى مۇمكىن:

"اۋىل تۇرعىندارى كۇيەۋ بالانىڭ ءىنىم مەن ءسىڭلىمدى تاكسيگە وتىرعىزىپ، الىپ كەتكەنىن كورگەنىن ايتتى. سوندىقتان ءبىز كۇدىكتى دەپ – كۇيەۋ بالامىزدى ويلايمىز. ول جالعىز ارەكەت ەتپەگەن بولۋى مۇمكىن، باسقا ادامدار دا بولۋى ىقتيمال"، – دەگەن اسەل مۇقانعالييەۆا.

ونىڭ ايتۋىنشا، بۇعان دەيىن ەرلى-زايىپتى مەن كۇيەۋ بالا اراسىندا ۇلكەن كيكىلجىڭ بولماعان، وتباسىنىڭ باسقا مۇشەلەرىمەن دە ەلەۋلى جانجال تىركەلمەگەن.

سونداي-اق مۇقانعالييەۆا كەي تۋىستارىنىڭ ايتۋىنشا، كىشى قىز بەن كۇيەۋ بالا بوسانعاننان كەيىنگى دەپرەسسيانى ەمدەتۋ ءۇشىن اتىراۋعا كەتكەن بولۋى مۇمكىن دەگەن بولجام بارىن جەتكىزدى. بۇل اقپاراتتىڭ رەسمي راستاماسى جوق.