الماتىدا 2025 جىلى 14 ناۋرىزدان باستاپ «الماتى جاستارى 2025» جەڭىلدەتىلگەن تۇرعىن ءۇي نەسيەلەۋ باعدارلاماسىنا ءوتىنىش قابىلداۋ باستالدى. باعدارلاماعا 35 جاسقا دەيىنگى الماتىلىقتار قاتىسا الادى، ولار باستاپقى جانە قايتالاما نارىقتان باسپانا ساتىپ الۋ مۇمكىندىگىنە يە.
ءوتىنىشتى باعدارلامانىڭ رەسمي سايتىندا ەلەكتروندىق سيفرلىق قولتاڭبا (ەسق) ارقىلى اۆتوريزاسيادان ءوتىپ بەرۋ قاجەت. نەسيە مولشەرى – 20 ملن تەڭگەگە دەيىن، جىلدىق مولشەرلەمە – 5 %، باستاپقى جارنا – 10 %.
«ءوز ءۇيىم – ولەڭ توسەگىم»
«الماتى جاستارى» باعدارلاماسىنا قاتىسۋشىلارىنىڭ ءبىرى جاينا ءابىلعازوۆا الماتىداعى «الاتاۋ» ءداستۇرلى ونەر تەاترىندا جۇمىس ىستەيدى.
– كۇيەۋىمىز ەكەۋىمىز جەكە پاتەرىمىز بولعانىن كوپتەن ارماندادىق، ءبىراق مۇمكىندىگىمىز بولمادى. قالا اكىمدىگىنىڭ قولداۋىنىڭ ارقاسىندا ارمانىمىز ورىندالدى، سول ءۇشىن العىسىم شەكسىز. العاش رەت 2019 جىلى «الماتى جاستارى» باعدارلاماسىنىڭ العاشقى لەگىنە قاتىسىپ، «كوكقاينار» شاعىن اۋدانىنان جالدامالى پاتەر الدىق. بەس جىل بويى ايىنا 4 380 تەڭگە تولەپ وتىردىق»، – دەيدى ول
پاتەر نەبارى 30 شارشى مەتر بولاتىن. ءبىراق سونىڭ ءوزى جەتكىلىكتى ەدى. كەيىن ەگىز بالاسى دۇنيەگە كەلگەندە تۇرعىن ءۇيدى كەڭەيتۋ تۋرالى ويلاي باستاعان.
– ءبىز جالدامالى پاتەردە تۇرعان كەزدە باستاپقى جارناعا اقشا جيناپ، «الماتى جاستارى» باعدارلاماسىنا قاتىسۋعا مۇمكىندىك الدىق. اقىرى، قاراپايىم ارلەۋدەگى پاتەردى 23 ملن تەڭگەگە ساتىپ الدىق، ونىڭ 18 ميلليونى – بانك نەسيەسى، – دەيدى جاينا ءابىلعازوۆا. – نەگىزى ءوز ءۇيىمىزدىڭ بولعانىن ارماندادىق، سوندىقتان قانداي دا ءبىر تۇرعىن ءۇي باعدارلاماسىنا قاتىساتىنىمىزدى ويلاپ، جاقسى نەسيە تاريحىن ساقتاۋعا تىرىستىق. بىلتىر جالاقىمىز دا جەتكىلىكتى دەڭگەيدە بولدى، سوندىقتان تولەم قابىلەتىمىزدى وڭاي راستاپ، باسپانا الدىق.
الماتىلىق تۇرعىننىڭ ايتۋىنشا، باستاپقىدا جۇبايىمەن بىرگە «ناۋرىز» باعدارلاماسى بويىنشا قۇجات تاپسىرعان. الايدا ول كەزدە جۇمىس ىستەيتىن جاستاردىڭ «الماتى جاستارى» ارقىلى باسپانا الۋ مۇمكىندىگى بار ەكەنىن بىلمەگەن.
– «ناۋرىز» باعدارلاماسى بويىنشا ىرىكتەۋدەن وتكەن كەزدە «الماتى جاستارى» باعدارلاماسىندا جۇمىس ىستەيتىن جاستار ساناتى قوسىلعانىن بىلدىك. قۇجات تاپسىردىق، مۇمكىندىكتى پايدالانىپ، قاتەلەسپەدىك. مۇندا پايىزدىق مولشەرلەمە 4%-عا تومەن بولدى، – دەيدى جاينا.
جاڭا 55 شارشى مەترلىك پاتەردىڭ يەلەرى ءقازىر جوندەۋ جۇمىستارىن اياقتاپ، كوشۋگە دايىندالىپ جاتىر. ولار جاڭا باسپانانى قالاي جايلى ەتىپ جاساعانىن، ءتىپتى ۇلدارىنا وينايتىن جەر جاساپ بەرگەنىن ايتىپ، قۋانىشىن جاسىرا المادى.
– ءۇيىڭنىڭ وزىڭدىكى بولعانى وتە ماڭىزدى. كوپشىلىك ءبىزدىڭ ورنىمىزدا بولسا، جالدامالى پاتەردى جەكەشەلەندىرۋدى دۇرىس شەشىم دەيتىن ەدى. ءبىراق پاتەرىمىز وتە تار بولاتىن. بالالار دۇنيەگە كەلگەن سوڭ ەڭ الدىمەن، ولاردىڭ جاعدايىن ويلايسىڭ. ەڭ باستىسى، ەندى ۇلدارىمىز بىزبەن بىرگە پاتەردەن پاتەرگە كوشىپ جۇرمەي، ءوزىنىڭ جەكە بولمەسىندە ءبىلىپ الى، ويناي الادى، – دەيدى جاينا ءابىلعازوۆا
جاڭا پاتەر – جاڭا ءومىر
تاعى ءبىر الماتىلىق باقىتتى پاتەر يەسى – قازاق ءتىلى ءپانىنىڭ ءمۇعالىمى ارايلىم بەردىبەك.
– مەنىڭ ەشقاشان ءوز ءۇيىم بولعان ەمەس. ۇزاق ۋاقىت تۋىستارىممەن بىرگە تۇردىم. ال ءوز ءۇيىڭنىڭ بولعانى قانداي جاقسى. بۇرىن مۇنداي نارسەنى ارمانداۋعا دا قورقاتىنمىن، ءبىراق ءوزىمنىڭ شاڭىراعىم، وتباسىم، بالالارىم بولعانىن قاتتى قالايتىنمىن، – دەيدى ول.
ارايلىم ءاردايىم تۇرعىن ءۇي باعدارلامالارىنا قۇجات جيناۋعا ارىپتەستەرىنە كومەكتەسىپ جۇرەتىن. ءبىر كۇنى ونىڭ باسشىسى ءوزىنىڭ دە ءوتىنىش بەرىپ كورۋىن ايتقان.
– باسىندا سەنبەدىم، ءبىراق تاۋەكەلگە بەل بۋدىم، ءبارى ويداعىداي بولدى. شىنىمدى ايتسام، ءۇي الماق تۇگىلى، ءوتىنىشىمدى دە قاراستىرادى دەپ ويلامادىم، – دەپ قۋانىشىن ءبولىستى ارايلىم.
قالاي بولعاندا دا ول ءقازىر جاڭا شاڭىراعىن جايلى ەتىپ جابدىقتاۋعا كىرىسىپ كەتكەن، وعان ۋاقىت جەتكىلىكتى. ارايلىم تۇرمىسقا شىققان، ءقازىر دەكرەتتىك دەمالىستا.
– ارينە، پاتەرىم ۇلكەن ەمەس. ويتكەنى مەن ونى العان كەزدە ءالى تۇرمىسقا شىقپاعان ەدىم. دەگەنمەن ينتەرەر كەڭ ءارى جايلى. ەگەر كىرەبەرىستى ەسەپكە الساق، ەكى بولمەلى سياقتى كورىنەدى، – دەيدى ول. ارايلىمنىڭ ايتۋىنشا، «الماتى جاستارى» باعدارلاماسى ارقاسىندا قولايلى شارتپەن باسپانا ساتىپ الدىم. باعدارلاما ەرتەڭگى كۇنگە سەنىمدىلىك بەرىپ، جاڭا بەلەسكە قادام باسۋدا ماڭىزدى ءرول اتقاردى.