بۇگىن، 18 ناۋرىز – «ناۋرىزناما ونكۇندىگىندەگى» ۇلتتىق كيىم كۇنى. مەملەكەتتىك قۋىرشاق تەاترى بۇل ەرەكشە كۇنگە وراي جاس كورەرمەندەرگە تارتىمدى مادەني باعدارلاما ۇسىندى. حالقىمىزدىڭ ۇلتتىق كيىمى مەن ءداستۇرىن، قولونەرى مەن مادەنيەتىن ناسيحاتتاۋدىڭ مۇنداي ءادىسى كورەرمەننىڭ كوڭىلىنەن شىقتى.
تەاتر زالىندا «ۇلتتىق كيىم – ۇلتتىق مۇرا» اتتى كورمە اشىلىپ، ۇلتتىق كيىم ۇلگىلەرى، ۇلتتىق ناقىشتاعى قۋىرشاقتار مەن ساندىك اشەكەيلەر ۇسىنىلدى. باستى ماقساتى جاس ۇرپاقتىڭ ۇلتتىق قۇندىلىقتارعا قىزىعۋشىلىعىن ارتتىرىپ، مادەني مۇراعا دەگەن قۇرمەتىن جوعارلاتۋدى كوزدەيدى. بالالار حالقىمىزدىڭ ساندىك ونەرىمەن، ءداستۇرلى ويۋ-ورنەكتەرىمەن تانىسىپ، ۇلتتىق كيىمدەردىڭ ەرەكشەلىگىن تاماشالادى.
«ناۋرىز قۇپياسى» – تانىمدىق سپەكتاكل
ەرەكشە كورمەمەن قاتار تەاتر ءوزىنىڭ جاس كورەرمەندەرىنە «ناۋرىز قۇپياسى» اتتى قويىلىم ۇسىندى. بۇل سپەكتاكل قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ بەكىتكەن «ناۋرىزناما» تۇجىرىمداماسى نەگىزىندە ازىرلەنگەن. وندا ميفولوگيالىق كەيىپكەرلەر – قىدىر اتا، كۇن مەن ءتۇن، سونداي-اق شىعىس كۇنتىزبەسىندەگى جىل يەلەرىنىڭ وبرازى سومدالدى. جارقىن وبرازدار، قىزىقتى سيۋجەت پەن ينتەراكتيۆتى ەلەمەنتتەر بالالار ءۇشىن ەرەكشە اسەرلى ءارى تانىمدىق مانگە يە بولدى.
بۇگىنگى مەرەكەگە ارنايى «جىل، ون ەكى اي» قويىلىمىن ساحنالادىق. ءار كەيىپكەردىڭ ەرەكشەلىگىن اشىپ، كورەرمەنگە تۇسىنىكتى ءارى تارتىمدى ەتىپ جەتكىزۋگە تىرىستىق. بالالارعا قىزىقتى ءارى جەڭىل قابىلداناتىن قويىلىم ازىرلەدىك دەپ ويلايمىن، – دەيدى سپەكتاكل جايىندا قويىلىم رەجيسسەرى ءارى تەاتر ءارتىسى شوحان قۇلنازاروۆ.
مەملەكەتتىك قۋىرشاق تەاترىنىڭ ۇلتتىق كيىم كۇنىنە ارناعان مادەني شاراسى جەتكىنشەك كورەرمەنگە حالقىمىزدىڭ باي رۋحاني الەمىنە تەرەڭىرەك سۇڭگىپ، مول اسەر الۋىنا مۇمكىندىك بەردى.
