الماتىدا 250 ورىندىق جاڭا زاماناۋي ستۋدەنتتىك جاتاقحانا اشىلدى. نىسان جەكە ينۆەستيسيالار ەسەبىنەن سالىنعان. بۇل مەگاپوليستەگى ستۋدەنتتىك ينفراقۇرىلىمدى دامىتۋعا ارنالعان اۋقىمدى باعدارلامانىڭ ءبىر بولىگى ءارى الماتىنىڭ وڭىردەگى جەتەكشى ءبىلىم ورتالىعى رەتىندەگى مارتەبەسىن كەزەڭ-كەزەڭىمەن نىعايتىپ كەلە جاتقانىن ايقىن كورسەتەدى.
جاتاقحانا تولىقتاي قازىرگى ستاندارتتارعا ساي. عيماراتتا ستۋدەنتتەردىڭ قاۋىپسىزدىگىن قامتاماسىز ەتەتىن بەيناباقىلاۋ جۇيەسى ورناتىلعان. ءار بولمەدە جەكە سانيتارلىق توراپ، تۇرمىستىق تەحنيكا جانە وزدىگىنەن اس ازىرلەۋگە ارنالعان جابدىقتار قاراستىرىلعان. مۇندا تەك تۇرۋعا عانا ەمەس، سونىمەن قاتار وقۋعا جانە دەمالۋعا دا جاعداي جاسالعان. وسىلايشا جاڭا تۇرعىن ورىندارى ستۋدەنتتەر ءۇشىن بارىنشا قولايلى ءارى ءقاۋىپسىز ورتا ۇسىنادى.
العاشقى ستۋدەنتتەردىڭ لەگى قونىستانا باستادى. بۇل جاتاقحانادا بىردەن ءۇش ءىرى جوعارى وقۋ ورنىنىڭ جاستارى تۇرادى: ءال-فارابي اتىنداعى قازاق ۇلتتىق ۋنيۆەرسيتەتى، «تۇران» ۋنيۆەرسيتەتى جانە حالىقارالىق اقپاراتتىق تەحنولوگيالار ۋنيۆەرسيتەتى (حاتۋ).
– الماتىدا جاڭا ستۋدەنتتىك جاتاقحانانىڭ اشىلۋى – ستۋدەنتتەرگە قولايلى وقۋ مەن تۇرمىس جاعدايىن قامتاماسىز ەتۋ جونىندەگى پرەزيدەنت تاپسىرماسىن ورىنداۋداعى ماڭىزدى قادام. ءبىز بۇگىن ورىن تاپشىلىعى ماسەلەسىن شەشىپ قانا قويماي، جاستارىمىزدىڭ بولاشاعىنا ءارى قالانىڭ دامۋىنا قىزمەت ەتەتىن زاماناۋي ينفراقۇرىلىم قالىپتاستىرىپ جاتىرمىز، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
مۇنداي جوبالاردى جۇزەگە اسىرۋدا مەملەكەتتىك قولداۋ ماڭىزدى ءرول اتقارادى. بۇگىندە ەكى تەتىك جۇمىس ىستەيدى: جاڭا جاتاقحانا سالعان جاعدايدا التى جىل بويى ءار ستۋدەنتكە 230 اەك كولەمىندە شىعىن وتەلەدى، ال عيماراتتى قايتا جاڭعىرتقان جاعدايدا سەگىز جىل بويى 92 اەك كولەمىندە تولەم قاراستىرىلعان.
جاڭا وقۋ جىلى باستالعانعا دەيىن الماتىدا تاعى ءۇش زاماناۋي جاتاقحانا اشىلادى. ولاردىڭ جالپى سىيىمدىلىعى 1100-دەن استام ورىنعا ەسەپتەلگەن. جىل سوڭىنا دەيىن 15 جاڭا نىسان پايدالانۋعا بەرىلىپ، 6 مىڭنان استام ستۋدەنت قوسىمشا ورىنمەن قامتىلادى.
قازىرگى تاڭدا قالادا 120-دان استام جاتاقحانا جانە شامامەن 60 حوستەل جۇمىس ىستەيدى. ولاردىڭ ءبىر بولىگى ستۋدەنتتەردى ۋاقىتشا ورنالاستىرۋ باعدارلاماسىنا تارتىلعان. ءار جوعارى وقۋ ورنىندا ستۋدەنتتەردىڭ تۇرمىستىق ماسەلەلەرى مەن شاعىمدارىن قابىلدايتىن جەدەل ورتالىقتار بار.
جاڭا جاتاقحانانىڭ اشىلۋى الماتىنىڭ ستۋدەنتتىك باسپانا ماسەلەسىن شەشۋدەگى تاعى ءبىر ناقتى قادامى بولدى. قالا تەك اعىمداعى قاجەتتىلىكتەردى جەدەل قامتاماسىز ەتىپ قانا قويماي، بولاشاققا دا ورىن قورىن قالىپتاستىرىپ وتىر.
الماتى دالەلدەپ وتىر: ءبىزدىڭ قالادا ستۋدەنت بولۋ – جايلى ءارى زاماناۋي ورتادا وقۋ، ءومىر ءسۇرۋ جانە بولاشاق قۇرۋ دەگەن ءسوز.