الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى №11 مەكەمەسىندە ق ر كونستيتۋسياسىنىڭ 30 جىلدىعىنا وراي، قازاقستان پارلامەنتى ءماجىلىسى VIII شاقىرىلىمىنىڭ دەپۋتاتى، ەرەجەسىز جەكپە-جەكتەن ق ر ەڭبەك سىڭىرگەن سپورت شەبەرى، ازيا چەمپيونى، ەۋروپا چەمپيونى، ەرەجەسىز جەكپە-جەكتەن الەمنىڭ ەكى دۇركىن چەمپيونى ارداق نازاروۆ جانە مما-دەن الەمنىڭ ەكى دۇركىن چەمپيونى قازبەك اشىممەن، مما-دەن الەمنىڭ ءبىر دۇركىن چەمپيونى اڭسار داۋلەتباي جانە باتىربەك ابىلايمەن كەزدەسۋ ءوتتى.
سپورتشىلار بالالار كولونياسىندا جازاسىن وتەپ جاتقان جاسوسپىرىمدەرمەن “سپورت - دەنساۋلىق كەپىلى” تۋرالى، ال ناشاقورلىقتىڭ قۇردىمعا سۇيرەيتىنى جايىندا ديالوگ ورناتتى.
سونمەن قاتار ءىس-شاراعا الماتى قالاسى جانە جەتىسۋ اۋدانىنىڭ پروكۋراتۋرا وكىلدەرى قاتىستى.
ارداق قۇتتىقوجا ۇلى قازىرگى كۇنگە دەيىن جەتكەن جەتىستىكتەرى، باعىندىرعان بەلەستەرى تۋرالى اڭگىمەلەدى. ول ءومىر جولىن بايانداي وتىرىپ، جاسوسپىرىمدەردى جامان ادەتتەردەن الىس بولۋعا، سالاۋاتتى ءومىر سالتىن ۇستانۋعا شاقىرىپ، قوعامعا پايداسى تيەر جاقسى ازامات بولىپ شىعۋلارىنا تىلەكتەستىگىن ءبىلدىردى.
ءيا، مۇنداي كەزدەسۋلەر جازالى جاسوسپىرىمدەر ءۇشىن اۋاداي قاجەت.
ەكىجاقتى ديالوگ، پىكىر الماسۋ كەشى ق ر پرەمەر-مينيسترىنىڭ وكىمىمەن بەكىتىلگەن "قىلمىستىق-اتقارۋ (پەنيتەنسيارلىق) جۇيەسى مەكەمەلەرىندەگى ساۋىقتىرۋدىڭ 2023-2025 جىلدارعا ارنالعان جول كارتاسىن" ىسكە اسىرۋ اياسىندا ۇيىمداستىرىلدى.
ءىس شارا سوڭىندا مەكەمە باستىعىنىڭ مىندەتىن اتقارۋشى ادىلەت پودپولكوۆنيگى نۇرلان سەرىك ۇلى كەرەبايەۆ مەيماندارعا مەكەمەدەگى جازالى جاسوپىرىمدەردىڭ اتىنان العىسىن ءبىلدىردى.