يتاليانىڭ جەتەكشى باسىلىمدارىنىڭ ءبىرى Corriere della Sera قۇرامىنا كىرەتىن COOK گاسترونوميالىق جۋرنالى قازاقستانعا ارنالعان اۋقىمدى رەپورتاج جاريالادى. ماتەريالدا الماتى ەلىمىزدىڭ مادەني جانە گاسترونوميالىق ورتالىعى رەتىندە كەڭىنەن تانىستىرىلعان.
جۋرناليستەر الماتى قالاسى تۋريزم باسقارماسى مەن Almaty Tourism Bureau شاقىرتۋىمەن وسى جازدا قازاقستانعا كەلىپ، قالانىڭ گاسترونومياسىمەن، مادەنيەتىمەن جانە تۋريستىك الەۋەتىمەن تانىستى.
رەپورتاجدا الماتى مەن كولساي جانە قايىڭدى كولدەرى، شارىن شاتقالى سىندى ءوڭىردىڭ تابيعي جاۋھارلارى كورسەتىلگەن. بۇل نىساندار قالانىڭ ينفراقۇرىلىمىمەن جانە زاماناۋي گاسترونوميالىق ورىندارىمەن ۇيلەسكەن بىرەگەي تۋريستىك باعىت رەتىندە ۇسىنىلعان.
ماتەريالدا الماتىنىڭ قازىرگى گاسترونومياسىنا ەرەكشە كوڭىل بولىنگەن. ەت، ءتۇرلى ەت دەليكاتەستەرى سىندى ۇلتتىق تاعامدار مەن قىمىز (اشىتىلعان بيە ءسۇتى) ءداستۇرلى تۇردە دە، زاماناۋي قىرىنان دا ۇسىنىلاتىنى ايتىلادى. Neo Nomad cuisine باعىتى دا قامتىلعان. ماقالادا باۋىرساق، قۇرت جانە ىستالعان جىلقى ەتى سەكىلدى تاعامداردىڭ رەسەپتەرى بەرىلىپ، وقىرمانعا قازاق اسحاناسىمەن جاقىنىراق تانىسۋعا مۇمكىندىك جاسالادى.
«Auyl»، «Jinau»، «Sandyq»، «Tary» سىندى مەيرامحانالار مىسالعا كەلتىرىلىپ، ولاردىڭ ۇلتتىق تاعامداردى زاماناۋي تاسىلمەن، جەرگىلىكتى ينگرەديەنتتەردى شەبەر ۇيلەستىرە وتىرىپ ازىرلەيتىنى جازىلعان.
گاسترونوميادان قوسا، رەپورتاجدا ايماقتىڭ شاراپ وندىرىسىنە دە نازار اۋدارىلعان. ىلە الاتاۋىنىڭ باۋرايىندا اسى جايلاۋىندا ورنالاسقان Arba Wine كومپانياسى ءوڭىردىڭ ەرەكشە تابيعي جاعدايىندا ءجۇزىم ءوسىرىپ، جەرگىلىكتى جانە الەمدىك سورتتاردى ۇشتاستىرا وتىرىپ ساپالى شاراپ وندىرەتىنى باياندالادى. يتالياندىق ساراپشىلارمەن بىرلەسكەن جۇمىس، حالىقارالىق ماراپاتتار جانە شاراپ مادەنيەتىنىڭ الماتى ءتۋريزمىنىڭ اجىراماس بولىگىنە اينالا باستاعانى ايتىلادى.
2025 جىلدىڭ العاشقى جارتىجىلدىعىندا الماتىعا كەلگەن يتاليالىق تۋريستەر سانى 2024 جىلدىڭ وسى كەزەڭىمەن سالىستىرعاندا 10،9% وسكەن. بۇل الماتىنىڭ مادەنيەتى مەن گاسترونومياسىنا دەگەن قىزىعۋشىلىقتىڭ ارتقانىن، سونداي-اق حالىقارالىق ب ا ق پەن الەم تۋريستەرىنىڭ نازارىندا ەكەنىن كورسەتەدى.