ديەتولوگ جانە بالالار ەندوكرينولوگى داريا حايكينا شاي ءىشۋ نورماسى ونىڭ تۇرىنە، كونسەنتراسياسىنا جانە ادامنىڭ دەنساۋلىعىنا بايلانىستى ءارتۇرلى بولاتىنىن ايتتى. دارىگەر بۇل سۋسىننىڭ ادام اعزاسىنا تاۋلىگىنە رۇقسات ەتىلەتىن ءقاۋىپسىز مولشەرىن انىقتادى، - دەپ حابارلايدى Aqshamnews.kz ءتىلشىسى Lenta.ru سايتىنا سىلتەمە جاساپ.
مامان شايدىڭ ادام اعزاسىنا اسەرى جايلى ءبولىستى. دارىگەردىڭ سوزىنشە شايدى بەي-بەرەكەت ىشە بەرۋگە بولمايدى.
- قارا جانە جاسىل شاي – كۇنىنە 3-5 كەسە (600-900 مل) ىشۋگە بولادى.
- اق جانە وولونگ شايلارى – قۇرامىنداعى كوفەين مولشەرى تومەن بولعاندىقتان، كۇنىنە 6 كەسە (1،2 ليتر) ىشۋگە رۇقسات.
- ءشوپ شايلارى – قۇرامىنا بايلانىستى نورماسى ءارتۇرلى. تۇيمەداق شايىن شەكتەۋسىز ىشۋگە بولادى، ال جالبىز شايىن از مولشەردە تۇتىنعان ءجون، ويتكەنى ول قان قىسىمىن تومەندەتۋى مۇمكىن.
شايدى شامادان تىس تۇتىنۋدىڭ ءقاۋپى
- كوفەيننىڭ كوپتىگى ۇيقىسىزدىق پەن مازاسىزدىق تۋدىرۋى مۇمكىن.
مىسالى، كۇشتى قارا شايدا 90 مگ كوفەين بار، ال ءبىر كەسە ەسپرەسسودا 80 مگ كوفەين بولادى. - شاي تەمىر تاپشىلىعىنا اكەلۋى مۇمكىن.
ونىڭ قۇرامىنداعى تانيندەر تەمىردىڭ سىڭۋىنە كەدەرگى كەلتىرەدى. سوندىقتان شايدى تاماقتان كەيىن بىردەن ىشپەي، بىرنەشە ساعاتتان كەيىن ءىشۋ ۇسىنىلادى.
شامادان تىس شاي ءىشۋ بۇيرەككە زيان كەلتىرۋى مۇمكىن
سونداي-اق دارىگەر شايدى شامادان تىس ءىشۋ بۇيرەكتىڭ جۇمىسىنا كەدەرگى كەلتىرۋى مۇمكىن دەيدى.
"شاي قۇرامىنداعى كەيبىر زاتتار بۇيرەكتە تاس تۇزىلۋىنە سەبەپ بولۋى مۇمكىن، سوندىقتان بۇيرەك اۋرۋى بار ادامدارعا اسىرەسە جاسىل شايدان باس تارتقان ءجون" دەپ قوستى مامان.