الماتى ازاماتتىق اليانسى قوعامدىق ديالوگتى قالاي نىعايتىپ، تۇراقتى دامۋ ماقساتتارىن قالاي ەنگىزۋدە؟
2024 جىلى الماتى ازاماتتىق اليانسى تۇراقتى دامۋ ماقساتتارى (تدم) بويىنشا قوعامدىق مونيتورينگ ورتالىعىن ىسكە قوستى، دەپ حابارلايدى aqshamnews.kz.
ورتالىق ۇكىمەتتىك ەمەس ۇيىمداردىڭ (ۇەۇ) جوبالارىنىڭ تيىمدىلىگىن تالداۋمەن اينالىسادى. بۇل تۋرالى الماتى ازاماتتىق اليانسىنىڭ ءتوراعاسى كايرجان ابدىحالىكوۆ وڭىرلىك كوممۋنيكاسيالار قىزمەتىندە (وكق) وتكەن باسپا ءسوز كونفەرەنسياسىندا ايتتى.
ۇيىمنىڭ باستى ماقساتى – مەملەكەتتىك قۇرىلىمدار، ۇەۇ جانە ازاماتتار اراسىنداعى ءوزارا ءىس-قيمىلدى دامىتۋ ارقىلى الەۋمەتتىك جانە قوعامدىق ماسەلەلەردى بىرلەسىپ شەشۋگە ىقپال ەتۋ. سونىمەن قاتار، اليانس ەكولوگيا، ينكليۋزيۆتى ءبىلىم بەرۋ جانە قوعامدىق باستامالاردى قولداۋ باعىتىندا دا بەلسەندى جۇمىس جۇرگىزۋدە.
اليانس جۇمىسىنا ءارتۇرلى ۇەۇ مەن بەلسەندى ازاماتتار قاتىسادى. قالانىڭ ماڭىزدى ماسەلەلەرىن تالقىلاۋعا تۇرعىنداردى تارتۋ ءۇشىن قوعامدىق تىڭداۋلار، دوڭگەلەك ۇستەلدەر جانە فورۋمدار ۇيىمداستىرىلادى.
2023 جىلدىڭ ماۋسىم ايىندا الماتىدا «تۇراقتى دامۋ ماقساتتارىن جۇزەگە اسىرۋ» تاقىرىبىندا XIII ازاماتتىق فورۋم ءوتتى. وندا ايماقتاعى تۇراقتى دامۋعا قول جەتكىزۋدىڭ ستراتەگيالارى مەن جولدارى قاراستىرىلدى.
«كەلەسى فورۋم مامىر-ماۋسىم ايلارىندا وتەدى دەپ جوسپارلانۋدا. ول الماتىداعى ازاماتتىق قوعامنىڭ ينستيتۋسيونالدىق ماسەلەلەرى مەن دامۋ پەرسپەكتيۆالارىنا ارنالماق. فورۋم قارساڭىندا وزەكتى تاقىرىپتاردى تالقىلايتىن ءبىرقاتار دوڭگەلەك ۇستەلدەر مەن ديالوگتىق كەزدەسۋلەر وتكىزەمىز. بۇل ديالوگ الاڭدارىنا ءوزارا سىندارلى پىكىر الماسۋ مەن شەشىم ىزدەۋگە جاردەمدەسۋ ماقساتىندا قۇرىلعان ۇيلەستىرۋ كەڭەسى مەن الماتى ساراپشىلار كلۋبى بەلسەندى قاتىسادى»، – دەپ اتاپ ءوتتى ك. ابدىحالىكوۆ.
اليانستىڭ باسىم باعىتتارىنىڭ ءبىرى – ەكولوگيالىق ماسەلەلەردى شەشۋگە جاردەمدەسۋ، ينكليۋزيۆتى ءبىلىم بەرۋدى قولداۋ جانە الەۋمەتتىك وسال توپتاردىڭ قۇقىقتارىن قورعاۋ. مەملەكەت باسشىسىنىڭ باستاماسىمەن قولعا الىنعان «تازا قازاقستان» باعدارلاماسى اياسىندا اليانس ۇەۇ جانە ەرىكتىلەرمەن بىرلەسىپ، قالانى كوگالداندىرۋ جانە اۋماقتاردى تازالاۋ شارالارىن ۇيىمداستىرۋدا. بۇل ءىس-شارالارعا جاستار مەن بەلسەندى ازاماتتار كەڭىنەن تارتىلۋدا.
«الماتى ازاماتتىق اليانسى ازاماتتىق قوعامدى نىعايتۋدا ماڭىزدى ءرول اتقارادى. ول مەملەكەتتىك ورگاندار مەن حالىق اراسىنداعى ديالوگ الاڭى رەتىندە جۇمىس ىستەيدى. ۇيىم مەملەكەتتىك قۇرىلىمداردىڭ اشىقتىعى مەن ەسەپتىلىگىن ارتتىرۋعا ىقپال ەتىپ قانا قويماي، بيلىك پەن قوعام اراسىنداعى ىنتىماقتاستىقتى جاقسارتۋعا باعىتتالعان زاڭنامالىق باستامالاردى ازىرلەۋ جانە ىلگەرىلەتۋ ىسىنە بەلسەنە قاتىسادى»، – دەدى وكق سپيكەرى.
2025 جىلى تدم جۇزەگە اسىرىلۋ مونيتورينگىن جالعاستىرۋ، مەملەكەتتىك ورگاندار مەن ازاماتتىق قوعام جوبالارىنىڭ تيىمدىلىگىن باعالاۋ جوسپارلانىپ وتىر. اسىرەسە، ۇەۇ وكىلدەرىنىڭ ءبىلىمىن جەتىلدىرۋگە، ۆولونتەرلىك قوزعالىستى دامىتۋعا جانە قوعامنىڭ ءارتۇرلى سەكتورلارى اراسىنداعى سەرىكتەستىكتى نىعايتۋعا ەرەكشە نازار اۋدارىلادى. بۇل جۇمىستار تۇراقتى دامۋدىڭ ورتاق ماقساتتارىنا قول جەتكىزۋگە باعىتتالاتىن بولادى.