21 اقپاندا الماتىدا «Almaty Tech Cup – 2025» – ەڭ ءىرى حالىقارالىق ينجەنەريا جانە روبوتوتەحنيكا چەمپيوناتى باستالادى، دەپ حابارلايدى aqshamnews.kz
21 اقپاندا الماتىدا قالا اكىمى كۋبوگىنا ارنالعان «Almaty Tech Cup - 2025» حالىقارالىق ينجەنەريا جانە روبوتوتەحنيكا چەمپيوناتى باستالادى، دەپ حابارلادى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا «الماتى دارىنى» ورتالىعىنىڭ ديرەكتورى گۇلنۇر كاريمعاجى.
بۇل ورتالىق ازياداعى ەڭ اۋقىمدى تۋرنير، وعان 3 مىڭنان استام قاتىسۋشى، سونىڭ ىشىندە قازاقستان، ءۇندىستان، تۇركيا، موڭعوليا، تۇرىكمەنستان، قىرعىزستان جانە وزبەكستاننان كەلگەن 20 شەتەلدىك كوماندا قاتىسادى.
«بۇل بەدەلدى جارىس جاس ينجەنەرلەر، باعدارلاماشىلار جانە ونەرتاپقىشتار ءۇشىن اسا ماڭىزدى شارا. قاتىسۋشىلار تەك سايىسقا ءتۇسىپ قانا قويماي، ءتۇرلى ينتەراكتيۆتى ءىس-شارالارعا، ينجەنەرلىك كۆەستتەرگە قاتىسىپ، جۇلدەلەر مەن ەستەلىك سىيلىقتارعا يە بولا الادى»، – دەدى ول.
ونىڭ ايتۋىنشا، چەمپيونات 2014 جىلدان بەرى وتكىزىلىپ كەلەدى. وسى ۋاقىت ىشىندە قاتىسۋشى كوماندالار سانى 20-دان 400-گە دەيىن ارتقان. قازاقستاندىق وقۋشىلار حالىقارالىق ارەنادا جوعارى ناتيجەلەر كورسەتىپ كەلەدى. مىسالى، اقش-تا وتكەن چەمپيوناتتا الماتى قۇراماسى 80 كوماندانىڭ ىشىنەن ۇزدىك 10-دىققا ەندى. سونىمەن قاتار، 2022 جىلى جەنيەۆادا، 2023 جىلى سينگاپۋردا، 2024 جىلى افينادا قازاقستاننىڭ جاس ينجەنەرلەرى الەمدىك التىن جۇلدەگە يە بولدى.
2025 جىلعى چەمپيونات روبوتوتەحنيكا، ينجەنەريا جانە درون جارىستارىن قامتيدى، ولاردىڭ ىشىندە Aspan Cyber Race، Aspan Drone Competition، Aspan Whoop Race جانە Aspan Drone Race بار. قاتىسۋشىلار First Lego League (4-16 جاس) جانە First Tech Challenge (16-18 جاس) باعىتتارى بويىنشا ءوز شەبەرلىكتەرىن كورسەتەدى.
باس جۇلدە – الماتى قالاسى اكىمىنىڭ كۋبوگى، ول بارلىق بايقاۋلاردا ەڭ كوپ ۇپاي جيناعان ۇزدىك كومانداعا تابىستالادى. جەڭىمپازدار تەك كۋبوكپەن عانا شەكتەلمەي، ەلىمىزدىڭ ۇزدىك ۋنيۆەرسيتەتتەرىنەن ءبىلىم گرانتتارىنا دا يە بولا الادى.