دارحان ساتىبالدى تۇركسىب اۋدانىنداعى ءبىرقاتار ونەركاسىپ نىسانىن ارالادى. جۇمىس ساپارى بارىسىندا الماتى كوپىر قۇرىلىمدارى زاۋىتىنا، «Almaty Mai» كاسىپورنى جانە «405 اۆياجوندەۋ زاۋىتىنا» باردى.
ەڭ اۋەلى اكىم 1963 جىلى ىرگەتاسى قالانعان الماتى كوپىر قۇرىلىمدارى زاۋىتىنا باردى. قازىرگى تاڭدا كاسىپورىن جول، كوپىر، توننەل، اۋەجاي جانە ءتۇرلى وندىرىستىك نىسانداردىڭ قۇرىلىسىنا ارنالعان 360-تان استام تەمىربەتون ءونىمىن شىعارادى.
زاۋىتتا 450 ادام ەڭبەك ەتەدى. زاۋىت ەۋروپالىق ستاندارتتارعا سايكەس كوپىر بلوكتارىن جانە جاڭا ۇلگىدەگى تەمىرجول شپالدارىن شىعاراتىن يننوۆاسيالىق جەلىلەردى ىسكە قوسقان.
دارحان ساتىبالدى مۇنداي كاسىپورىندار قالانىڭ عانا ەمەس، تۇتاس ەلدىڭ كولىك ينفراقۇرىلىمىن دامىتۋدا ستراتەگيالىق ماڭىزى زور ەكەنىن ايتتى.
ودان كەيىن اكىم «Almaty Mai» زاۋىتىندا بولدى. بۇل كاسىپورىن مايلى داقىلداردى وڭدەۋمەن قاتار، وسىمدىك مايى، مارگارين جانە باسقا دا ونىمدەر شىعارادى. ءوندىرىس تاۋلىگىنە 500 توننا راپس پەن 450 توننا قىتايبۇرشاق وڭدەي الادى.
2025 جىلى قاڭتار-شىلدە ايلارىندا ءوندىرىس كولەمى 96،5 مىڭ توننادان استى. زاۋىتتا 474 ادام جۇمىس ىستەيدى. ونىمدەرى ورتالىق ازيا ەلدەرىنە جانە قىتايعا ەكسپورتتالادى.
اكىمنىڭ ايتۋىنشا، وسىنداي ءوندىرىس ورىندارىنىڭ دامۋى الماتىنىڭ ازىق-تۇلىك قاۋىپسىزدىگىن ارتتىرىپ، جاڭا ەكسپورتتىق مۇمكىندىكتەرگە جول اشادى.
قالا باسشىسى ساپار سوڭىندا 85 جىلدىق تاريحى بار «405 اۆياجوندەۋ زاۋىتى» اكسيونەرلىك قوعامىن دا كورىپ شىقتى. مۇندا ازاماتتىق جانە قوس ماقساتتاعى اۋە تەحنيكاسىنا كۇردەلى جوندەۋ، جاڭعىرتۋ جانە تەحنيكالىق قىزمەت كورسەتىلەدى، سونداي-اق، ليسەنزيالىق نەگىزدە تىكۇشاق ءوندىرىسىن جولعا قويۋ جوبالارى جۇزەگە اسىرىلىپ جاتىر.
كاسىپورىندا 550-دەن استام مامان ەڭبەك ەتەدى، ونىڭ ىشىندە 350-دەن استامى ينجەنەر مەن تەحنيك. الداعى ۋاقىتتا جوعارى تەحنولوگيالىق سالادا قوسىمشا 150 جۇمىس ورنىن اشۋ جوسپارلانعان.
«405 اۆياجوندەۋ زاۋىتى» اق-نىڭ اتقارىپ وتىرعان جۇمىستارىنىڭ ماڭىزدىلىعىن جانە كاسىپورىننىڭ ەلدىڭ قورعانىس-ونەركاسىپ كەشەنى ءۇشىن ستراتەگيالىق ءمانىن ەسكەرە وتىرىپ، الماتى اكىمىدىگى تاراپىنان جان-جاقتى قولداۋ كورسەتىلەدى»، – دەدى دارحان ساتىبالدى.
ساپار قورىتىندىسىندا -الماتى اكىمى تۇركسىب اۋدانىنداعى ونەركاسىپتىك كاسىپورىنداردىڭ تۇراقتى ءوسىم كورسەتىپ، قالا ەكونوميكاسىنا ايتارلىقتاي ۇلەس قوسىپ وتىرعانىن جەتكىزدى.
«مۇنداي ءوندىرىس وشاقتارى – الماتىنىڭ يندۋستريالىق دامۋىنىڭ بەرىك تىرەگى. مۇندا جاڭا جۇمىس ورىندارى اشىلىپ، يننوۆاسيا ەنگىزىلۋدە، ەكسپورتتىق الەۋەت ارتىپ كەلەدى. ءبىزدىڭ مىندەتىمىز – وسى كاسىپورىندارعا قولداۋ كورسەتىپ، ولاردىڭ ودان ءارى جاڭعىرۋىنا جاعداي جاساۋ»، – دەدى دارحان ساتىبالدى.