قاراعاندىدا 17 جاستاعى ءجاسوسپىرىم ءىرى كولەمدەگى ەسىرتكىمەن قولعا ءتۇستى. ءتارتىپ ساقشىلارىنىڭ مالىمەتىنشە، ول ەسىرتكى قىلمىسىنا قارسى ءىس-شارا بارىسىندا قوقىس پوليگونى ماڭىندا ۇستالعان، دەپ حابارلايدى Aqshamnews.kz قاراعاندى وبلىستىق پوليسيا دەپارتامەنتىنە سىلتەمە جاساپ.
تەكسەرۋ كەزىندە ءجاسوسپىرىمنىڭ قالتاسىنان زاماناۋي گادجەتتەر – iPhone 14 جانە قىلمىستىق ارەكەتكە قاتىستىلىعىن ايعاقتايتىن حات-حابار ساقتالعان iPhone 11 تاركىلەندى. سونىمەن قاتار قارا يزولەنتاعا ورالعان، سالماعى شامامەن 15 گرامم بولاتىن 20 تۇيىنشەك تابىلدى. ساراپتاما بۇل زاتتىڭ سينتەتيكالىق ەسىرتكى – «A-PVP» ەكەنىن انىقتادى.
تەرگەۋ بارىسىندا ول قىلمىسىن مويىنداپ، ءبىر جارىم اي بۇرىن كۋرەر-بۋكمەكەر رەتىندە جۇمىس ىستەي باستاعانىن ايتقان. وسى ۋاقىت ىشىندە قاراعاندى ماڭىنداعى جاسىرىن قويمالاردان 20-40 تۇيىنشەكتەن تۇراتىن ءىرى پارتيانى سەگىز رەت الىپ، اباي، شاحتينسك جانە قاراعاندى قالالارىندا ەسىرتكى تاراتقان.
ءقازىر قىلمىستىڭ بارلىق ءمان-جايىن انىقتاۋعا جانە ەسىرتكى جەلىسىنىڭ باسقا قاتىسۋشىلارىن تابۋعا باعىتتالعان تەرگەۋ امالدارى جۇرگىزىلىپ جاتىر. پوليسيانىڭ ايتۋىنشا، مۇنداي شارالار ايماقتاعى ەسىرتكى قىلمىسىمەن كۇرەستىڭ تيىمدىلىگىن كورسەتەدى.