الماتى اكىمى دارحان ساتىبالدى الاتاۋ اۋدانىنا جۇمىس ساپارى بارىسىندا العاباس شاعىناۋدانىنىڭ تۇرعىندارىمەن كەزدەستى.
قالا باسشىسى كەزدەسۋگە كەلگەن بارلىق تۇرعىننىڭ ءوتىنىشىن تىڭدادى.
شاعىناۋدان تۇرعىندارى ورتالىق كارىز جۇيەسىنە قوسىلۋ، جارىقتىڭ ءجيى ءسونۋى، جول جوندەۋ جۇمىستارىنىڭ اياقتالۋى جانە ويىن الاڭدارىنىڭ جوقتىعى تۋرالى ماسەلەلەردى كوتەردى.
ەنەرگەتيكا جانە سۋمەن جابدىقتاۋ باسقارماسى باسشىسىنىڭ مىندەتىن اتقارۋشى نۇرباقىت سەرىكباي بايانداعانداي، شاعىناۋداندا 19،9 شاقىرىم سۋ قۇبىرى جانە 27،3 شاقىرىم كارىز جەلىلەرىن تارتۋ اياقتالدى.
جوبانى جۇزەگە اسىرۋ 584 جەكە ءۇيدى نەمەسە 4 مىڭعا جۋىق ادامدى ورتالىق جەلىلەرمەن قامتاماسىز ەتۋگە مۇمكىندىك بەردى. كارىز جەلىلەرىن تولىق ىسكە قوسۋ ءۇشىن باسقارما سورعى ستانسياسىن سالىپ جاتىر. نىسان كەلەسى جىلدىڭ باسىندا پايدالانۋعا بەرىلمەك.
سونداي-اق، تۇرعىنداردى ەلەكتر جارىعىمەن تۇراقتى قامتاماسىز ەتۋ ءۇشىن 70 شاقىرىم جەلى سالىنىپ، 31 ترانسفورماتور ورناتىلدى.
قالانىڭ موبيلدىلىك باسقارماسىنىڭ باسشىسى ساعىندىق تەلىبايەۆ بۇگىندە شاعىناۋداندا 31 شاقىرىم جولعا اسفالت توسەلگەنىن جانە قالعان 900 شاقىرىم جولدا ءتيىستى جۇمىستاردىڭ جۇرگىزىلىپ جاتقانىن ايتتى.
«اسفالتتىڭ جوعارعى قاباتىن توسەۋ جانە جول بەلگىلەردى ورناتۋ سياقتى بارلىق جۇمىس قىركۇيەككە دەيىن اياقتالۋعا ءتيىس. كەلەسى جىلدىڭ باسىندا سورعى ستانسياسىنىڭ قۇرىلىسى اياقتالعان سوڭ بارلىق ءۇي ورتالىق كارىز جۇيەسىنە قوسىلادى. ءبىز ءقازىر قۇرىلىس مەرزىمىن حاتتاماعا ەنگىزدىك، ونىڭ ورىندالۋىن ءجىتى باقىلاۋىما الامىن»، - دەدى دارحان ساتىبالدى.
بۇعان قوسا، قالا باسشىسى الاتاۋ اۋدانىنىڭ اكىمى تالعات مالىبايەۆقا شاعىناۋداندا سانيتارلىق تازالىقتى كۇشەيتۋ، بالالار الاڭدارىن سالۋ مۇمكىندىگىن قاراستىرۋ جانە ينفراقۇرىلىمدىق نىسانداردىڭ بەلگىلەنگەن مەرزىمدە اياقتالۋىن قامتاماسىز ەتۋدى جۇكتەدى.