سايراندى كوركەيتۋ، 4 جاڭا قوعامدىق كەڭىستىك قۇرۋ، 141 اۋلاعا جوندەۋ جۇرگىزۋ: اۋەزوۆ اۋدانى قالاي وزگەرۋدە
2025 جىلدىڭ ماۋسىم ايىندا الماتىنىڭ اۋەزوۆ اۋدانىندا ءتورت جاڭا قوعامدىق كەڭىستىكتىڭ قۇرىلىسى اياقتالادى. بۇل تۋرالى الماتى اكىمى ەربولات دوسايەۆ اۋەزوۆ اۋدانىنىڭ تۇرعىندارىمەن كەزدەسۋ بارىسىندا مالىمدەدى.
«2025 جىلدىڭ ماۋسىم ايىندا 4 قوعامدىق كەڭىستىكتى كوركەيتۋ جۇمىستارىن اياقتاۋدى جوسپارلاپ وتىرمىز: اقساي-4 جانە 12-شاعىن اۋداندارىنداعى سكۆەرلەر، مامىر-4 جانە جەتىسۋ-3 شاعىن اۋداندارىنداعى جاياۋ جۇرگىنشىلەر ايماقتارى. بۇل جوبالار اياسىندا جاڭا بالالار جانە سپورت الاڭدارى، كوشە جيھازدارى، دەمالىسقا ارنالعان كۇركەلەر ورناتىلىپ، جارىقتاندىرۋ جاڭارتىلادى جانە جاسىل جەلەكتەر ەگىلەدى»، – دەدى الماتى اكىمى.
كورىكتەندىرۋدىڭ نەگىزگى جوبالارىنىڭ ءبىرى – اۋەزوۆ اۋدانىن دا قامتيتىن سايران كولىن جاڭارتۋ جۇمىستارى.
«2024 جىلدىڭ سوڭىندا نەگىزگى قۇرىلىس جۇمىستارى اياقتالدى، ال بيىلعى مامىر ايىندا جوبانىڭ سوڭعى كەزەڭى ءتامامدالادى. سايران كولى قالا تۇرعىندارى مەن قوناقتارى ءۇشىن ەڭ تارتىمدى دەمالىس ورىندارىنىڭ بىرىنە اينالادى دەپ سەنەمىن»، – دەدى ەربولات دوسايەۆ.
سونىمەن قاتار، وتەگەن باتىر جانە جۇبانوۆ كوشەلەرى «قاسبەتتەن قاسبەتكە دەيىن» قاعيداتى بويىنشا كوركەيتىلىپ، كوگالداندىرىلۋدا. بۇل كوشەلەردە دەمالىس پەن سپورتقا ارنالعان جايلى ايماقتار جاسالىپ، بەينەباقىلاۋ كامەرالارى، شامدار، قوقىس جاشىكتەرى مەن بالالار ويىن الاڭدارى ورناتىلادى. سونداي-اق، جاياۋ جۇرگىنشىلەر مەن اۆتوتۇراق ايماقتارى كورىكتەندىرىلەدى. جوبانى 2025 جىلدىڭ قازانىنا دەيىن اياقتاۋ جوسپارلانعان.
«حالىق قاتىساتىن بيۋدجەت» باعدارلاماسى بەلسەندى تۇردە جۇزەگە اسىرىلۋدا. 2024 جىلى جالپى سوماسى 2،8 ملرد تەڭگە بولاتىن 57 جوبا ىسكە اسىرىلدى. 2025 جىلى 30 جوبانى جۇزەگە اسىرۋ ءۇشىن قالا بيۋدجەتىنەن 2 ملرد تەڭگە ءبولىندى. تۇرعىنداردان تۇسكەن 727 ءوتىنىمنىڭ ىشىنەن داۋىس بەرۋ ناتيجەسىندە 30 جوبا تاڭدالدى، ونىڭ 20-سى قوعامدىق كەڭىستىكتەردى كوركەيتۋگە، ال 10-ى اۋلالاردى جوندەۋگە باعىتتالعان.
سونىمەن قاتار، اۋەزوۆ اۋدانىندا اۋلالاردى كۇردەلى جوندەۋ جۇمىستارى جالعاسۋدا. 2024 جىلى جالپى سوماسى 1،6 ملرد تەڭگەگە 23 اۋلاعا كۇردەلى جوندەۋ جۇرگىزىلدى، ال 115 اۋلادا 470 ملن تەڭگە كولەمىندە اعىمداعى جوندەۋ جۇمىستارى جاسالدى. 2025 جىلدىڭ مامىر ايىندا تاعى 23 اۋلانى كۇردەلى جوندەۋمەن جانە 118 اۋلانى اعىمداعى جوندەۋمەن قامتۋ جوسپارلانىپ وتىر، ال بۇل جۇمىستار 2025 جىلدىڭ قىركۇيەگىندە اياقتالادى.