2025 جىلى مامىر-4 شاعىن اۋدانىندا 12،3 كم سۋ جانە كارىز جۇيەلەرىنىڭ قۇرىلىسىن اياقتاۋ جوسپارلانعان. بۇل تۋرالى الماتى اكىمى ەربولات دوسايەۆ اۋەزوۆ اۋدانىندا تۇرعىندارمەن وتكەن كەزدەسۋدە مالىمدەدى. قالا باسشىسىنىڭ ايتۋىنشا، بۇل جوبا اۋداننىڭ 800-دەن استام تۇرعىنىن ساپالى ينجەنەرلىك جەلىلەرمەن قامتاماسىز ەتەدى.
2025 جىلدىڭ ءساۋىر ايىندا دوستىق شاعىن اۋدانىندا 22 كوشەدە 15،7 كم كارىز جۇيەلەرىن سالۋ جۇمىستارى قايتا جالعاسادى. «بىلتىر رابات، ۆينوگرادوۆ جانە داستان كوشەلەرىندەگى تۇرعىنداردى قامتۋ ءۇشىن جوبانى تۇزەتتىك. بۇل كوشەلەردىڭ اسفالت توسەمى تولىق قالپىنا كەلتىرىلەدى. جۇمىس 2025 جىلدىڭ قازان ايىندا اياقتالادى»، – دەدى ەربولات دوسايەۆ.
بيىل قازان ايىندا ساين-جاندوسوۆ-قارعالى وزەنى-شالياپين كوشەلەرىنىڭ اۋماعىندا 3 مىڭنان استام تۇرعىنعا ساپالى سۋ جانە كارىز جۇيەلەرىن قامتاماسىز ەتۋ ءۇشىن 49 كم ينجەنەرلىك جەلىلەردى سالۋ جۇمىستارىن اياقتاۋ جوسپارلانىپ وتىر.
2024 جىلى 12 كوشە بويىنشا، سونىڭ ىشىندە بۇرىنعى «ۆوسحود»، «سادوۆود» جانە «ۆەتەران» باۋ-باقشا سەرىكتەستىكتەرىندە 12،3 كم سۋ جانە كارىز جۇيەلەرى سالىندى.
سونىمەن قاتار، 2024 جىلى ساين، توقتابايەۆ، چەرەپانوۆ كوشەلەرىندە جانە مامىر-3 جانە 5 شاعىن اۋداندارىندا 30 جىل بۇرىن سالىنعان 4،9 كم جىلۋ جۇيەلەرىن رەكونسترۋكسيالاۋ جۇمىستارى اياقتالدى. بيۆل تامىز ايىندا جەتىسۋ-2 شاعىن اۋدانىندا 1،1 كم جىلۋ جۇيەلەرىن قايتا جاڭعىرتۋ جۇمىستارى اياقتالماق.
جالپى، قالادا ينجەنەرلىك جەلىلەردى جاڭعىرتۋ جانە جاڭارتۋ بويىنشا كەشەندى شارالار قىزۋ ءجۇرىپ جاتىر. وسى شارالاردىڭ ارقاسىندا 2025 جىلى سۋ جۇيەلەرىنىڭ توزۋ دەڭگەيى 52،9%-عا، كارىز جۇيەسىنىڭ توزۋى 53،9%-عا، ەلەكترمەن جابدىقتاۋ جۇيەسىنىڭ توزۋى 63،3%-عا دەيىن تومەندەيدى.