ەلسىز ەر بولمايدى، جۇرتسىز جىگىت بولمايدى.
كەشە قازاقستان رەسپۋبليكاسى ءىىم م.ەسبولاتوۆ اتىنداعى الماتى اكادەمياسىندا كەڭەس وداعىنىڭ باتىرى باۋىرجان مومىش ۇلى اتىنداعى زاماناۋي ينتەراكتيۆتى ءدارىس زالى اشىلدى.
«حالقىمىز باۋىرجانداي باتىر ۇلىن قانشا ماداقتاسا دا، ارتىق بولمايدى. باۋىرجان مومىش ۇلىنىڭ ءدارىس زالىنىڭ الماتى اكادەمياسىندا اشىلۋىنىڭ ەكى سەبەبى بار. بىرىنشىدەن، باۋكەڭ ءوزىنىڭ ەرلىك عۇمىرىنىڭ ءبىر كەزەڭىندە ىشكى ىستەر ورگاندارىندا قىزمەت اتقارعان. ەكىنشىدەن، كەزىندە قازىرگى الماتى اكادەمياسىنىڭ تىڭداۋشىلارىمەن كەزدەسۋلەر وتكىزىپ، ىشكى ىستەر ورگاندارىنىڭ بولاشاق قىزمەتكەرلەرىنە ادال جۇمىس ىستەۋدى اماناتتاعان تۇلعا. باۋىرجان مومىش ۇلى - ءبىز ءۇشىن ەرلىكتىڭ، ءپاتريوتيزمنىڭ ۇلگىسى. “وتان ءۇشىن وتقا تۇسسەڭ، كۇيمەيسىڭ” دەپ باتىر بابامىزدىڭ ءوزى ايتقانداي، بۇل ءدارىس زالى بولاشاق پوليسيا قىزمەتكەرلەرىن ەرلىككە ۇندەپ، وتاندى باۋىرجانشا سۇيۋگە باۋليتىن بولادى. مەملەكەت باسشىسىنىڭ ىشكى ىستەر ورگاندارىنىڭ الدىنا قويعان باستى مىندەتتەرىنىڭ ءبىرى – كۇندەلىكتى پوليسيا قىزمەتىندە زاماناۋي تەحنولوگيالىق قۇرالداردى كەڭىنەن قولدانۋ. وسىعان وراي باۋىرجان مومىش ۇلى اتىنداعى ءدارىس زالى ينتەراكتيۆتى قۇرالدارمەن جابدىقتالدى»، – دەدى ءدارىس زالىنىڭ اشىلۋ سالتاناتىندا ءسوز سويلەگەن اكادەميا باسشىسى ا.سايتبەكوۆ.
قازاقتىڭ باتىر ۇلىنا ارنالعان ءدارىس زالىنىڭ اشىلۋ سالتاناتىنا حالقىمىزدىڭ ۇلى تۇلعالارىنىڭ ءومىرى مەن ەڭبەگىن زەرتتەۋشى عالىم مەكەمتاس مىرزاحمەت ۇلى، ق ر ءىىم كادر ساياساتى دەپارتامەنتىنىڭ باسقارما باسشىسى ق.توقىبايەۆ، باۋىرجان مومىش ۇلىنىڭ كەلىنى، جازۋشى زەينەپ احمەتوۆا، الماتى قالاسى پد باستىعى ارىستانعاني زاپپاروۆ، جامبىل وبلىسى جۋالى اۋدانى اكىمىنىڭ ورىنباسارى انار احمەتوۆا قاتىسىپ، باتىر بابامىزدىڭ ءومىرى مەن ەرلىگى جايلى ءسوز سويلەدى.