ءتىۇشاق اپاتىندا قازا بولعان ەكيپاج مۇشەلەرىنىڭ وتباسىنا وتەماقى تولەنەدى

باتىس قازاقستانداعى تىكۇشاق اپاتىنىڭ حرونولوگياسى بەلگىلى بولدى.

توتەنشە جاعدايلار مينيسترلىگىنىڭ رەسمي وكىلى رۋسلان يمانقۇلوۆتىڭ حابارلاۋىنشا، تىكۇشاق كەشە ساعات تاڭعى 10:40-تا اتىراۋدان ۇشىپ شىققان. «قازترانسويل» كومپانياسىنىڭ تاپسىرىسىمەن كوككە كوتەرىلگەن مي-8 مۇناي قۇبىرلارىن اۋەدەن بارلاپ جۇرگەندە، ورال قالاسىنان 54 شاقىرىمداي اۋماقتا اپاتقا ۇشىراعان. وقىس وقيعا جايلى حابار ورتالىققا 15:48-دە تۇسكەن، دەپ حابارلايدى Almaty-akshamy.kz.

العاشىندا «بورتتا بولعان 6 ادام ءتىرى» دەپ اقپارات تارادى. ويتكەنى جارالانعانداردىڭ ءبىرى ديسپەچەرگە «وزگەلەر دە امان» دەپ حابارلاعان. الايدا، 4 ادامنىڭ قازا تاپقانى بەلگىلى بولدى. تاعى 2-ەۋى جارالانعان. تىكۇشاق زاۋىتتان 2021 جىلى شىعارىلعان. وتكەن ايدا جۇرگىزىلگەن تەحنيكالىق تەكسەرۋ كەزىندە ەشقانداي اقاۋ انىقتالماپتى. ءقازىر قىلمىستىق ءىس قوزعالدى. ارنايى كوميسسيا قۇرىلىپ، كولىكتەگى پوليسيا دەپارتامەنتى اپاتتىڭ سەبەبىن انىقتاپ جاتىر. تەرگەۋدى باس كولىك پروكۋراتۋراسى قاداعالايدى. تىكۇشاقتى قۇراستىرعان رەسەيلىك زاۋىتتىڭ وكىلدەرى دە اپات ورنىنا بارىپ، وقىس وقيعانىڭ سەبەبىن انىقتاۋعا كومەكتەسپەك. ال قازا بولعان ەكيپاج مۇشەلەرىنىڭ وتباسىنا وتەماقى تولەنەدى. بالالارىنا كامەلەت جاسىنا تولعانشا جاردەماقى بەرىلمەك.

«ايتا كەتۋ كەرەك، ەكيپاجدا وتە بىلىكتى، تاجىريبەلى ماماندار بولدى. ولاردىڭ اۋەدە ۇشۋ ساعاتتارى دا از ەمەس. ءارقايسىنىڭ اۆياقۇتقارۋ سالاسىنداعى ەڭبەك ءوتىلى 10 جىلدان كەم ەمەس. ال ءارقايسىنىڭ جالپى ەڭبەك ءوتىلى، جۇمىس تاجىريبەلەرى 30 جىلدان اسادى»، - دەدى ق ر توتەنشە جاعدايلار مينيسترلىگىنىڭ رەسمي وكىلى رۋسلان يمانقۇلوۆ.