الماتى №4 قالالىق كلينيكالىق اۋرۋحاناسىندا «ومىرگە ءۇمىت سىيلا» قايىرىمدىلىق ناۋقانى اياسىندا دونور كۇنى ءوتتى.
ءىس-شارا رەسپۋبليكا كۇنىنە وراي ۇيىمداستىرىلىپ، دونورلىق مادەنيەتتى دامىتۋ مەن قان قۇيۋدى قاجەت ەتەتىن ناۋقاستاردى قولداۋعا باعىتتالدى.
ناۋقانعا اۋرۋحانانىڭ 60 قىزمەتكەرى - دارىگەرلەر، مەدبيكەلەر جانە اكىمشىلىك ءبولىم قىزمەتكەرلەرى قاتىستى.
بارلىعى 30 ليتردەن استام قان جانە ونىڭ كومپونەنتتەرى جينالدى. قان اۋىر جاراقات العان، انەميا، وتادان كەيىنگى اسقىنۋ جانە دونورلىق كومەكتى قاجەت ەتەتىن وزگە دە جاعدايمەن كۇرەسىپ جاتقان ناۋقاستاردى امان الىپ قالۋعا باعىتتالاتىن بولادى.
«ءبىز ءۇشىن دونور بولۋ - جاي عانا ءراسىم ەمەس، كاسىبي ءارى ادامي بورىشىمىزدىڭ كورىنىسى. ءارقايسىمىز سىن ساعاتتا جاتقان ناۋقاس ءۇشىن ءبىر بىرلىك قاننىڭ قانشالىقتى ماڭىزدى ەكەنىن جاقسى تۇسىنەمىز»، - دەيدى پاسيەنتتەردى قولداۋ جانە ىشكى اۋديت قىزمەتىنىڭ جەتەكشىسى دياس داۋلەتبايەۆ.
قان تاپسىرار الدىندا بارلىق قاتىسۋشى تەراپيەۆتىڭ قابىلداۋىنان ءوتىپ، قان قىسىمىن ولشەتىپ، زەرتحانالىق تەكسەرۋدەن ءوتتى. ءىس-شارا الماتى قالالىق قان ورتالىعى ماماندارىنىڭ باقىلاۋىمەن ۇيىمداستىرىلدى.
№4 قالالىق كلينيكالىق اۋرۋحانادا مۇنداي ءىس-شارانى وتكىزۋ يگى داستۇرگە اينالعان. كلينيكا باسشىلىعىنىڭ ايتۋىنشا، ۇجىمدىق دونورلىق ءوزارا قولداۋ مادەنيەتىن قالىپتاستىرىپ، ءاربىر ادامنىڭ ءومىردى قۇتقارۋعا ۇلەس قوسىپ جاتقانىن سەزىندىرەدى.
«ءار تامشى قان - ءبىر ومىرگە مۇمكىندىك. دونور كۇنى - ءدال ءقازىر ءومىر ءۇشىن كۇرەسىپ جاتقان جاندارعا ءۇمىت سىيلاۋدىڭ ءبىر جولى»، - دەپ اتاپ ءوتتى №4 قكا ۇجىمى.
كلينيكا دونورلىق ناۋقاندى تۇراقتى تۇردە جالعاستىرۋدى جوسپارلاپ وتىر.