الماتىداعى دوستىق ۇيىندە «قىران ەلىم – قازاقستانىم» اتتى عىلىمي-تاجىريبەلىك كونفەرەنسيا ءوتتى.
جيىن رەسپۋبليكا كۇنى مەن قازاقستان رەسپۋبليكاسىنىڭ مەملەكەتتىك ەگەمەندىگى تۋرالى دەكلاراسيانىڭ قابىلدانعانىنا 35 جىل تولۋىنا ارنالدى.
ءىس-شارانىڭ ماقساتى – مەملەكەتتىك ەگەمەندىك تۋرالى دەكلاراسيانىڭ تاريحي ماڭىزىن ايقىنداۋ، قازاقستاندىق ءپاتريوتيزمدى نىعايتۋ، ۇلتتىق قۇندىلىقتاردى دارىپتەۋ جانە ەلدىڭ بىرلىگى مەن تاۋەلسىزدىگى يدەيالارىن قوعامدا ودان ءارى ورنىقتىرۋ.
كونفەرەنسياعا قازاق كسر جوعارعى كەڭەسىنىڭ XII شاقىرىلىم دەپۋتاتتارى، قوعام جانە مەملەكەت قايراتكەرلەرى، الماتى قالالىق ءماسليحاتىنىڭ دەپۋتاتتارى، قوعامدىق كەڭەس مۇشەلەرى، ەتنومادەني بىرلەستىكتەر مەن ازاماتتىق قوعام وكىلدەرى قاتىستى.
الماتى قالاسى اكىمىنىڭ ورىنباسارى ازامات قالدىبەكوۆ ءوز سوزىندە تاريحي جادىنى ساقتاۋدىڭ ماڭىزدىلىعىنا توقتالدى:
– بۇگىن ءبىز ەلىمىزدىڭ تاريحىنداعى اسا ماڭىزدى كەزەڭدى ەسكە الۋ ءۇشىن جينالىپ وتىرمىز. 1990 جىلدىڭ 25 قازانىندا مەملەكەتتىك ەگەمەندىك تۋرالى دەكلاراسيا قابىلداندى. بۇل قۇجات تاۋەلسىز مەملەكەتتىڭ قالىپتاسۋ جولىنداعى العاشقى ءارى شەشۋشى قۇقىقتىق اكت بولدى.
بۇگىنگى مىندەتىمىز – پاتريوتتىق سانانى كۇشەيتىپ، ۇلتتىق قۇندىلىقتاردى دارىپتەۋ جانە قوعامدى ەل بىرلىگى مەن تاۋەلسىزدىگى يدەيالارىنىڭ اينالاسىنا بىرىكتىرۋ. تەك بىرلىك ارقىلى عانا ەگەمەندىكتىڭ مۇراتىن لايىقتى جالعاستىرىپ، حالقىمىزدىڭ وركەندەۋىن قامتاماسىز ەتە الامىز. بارشاڭىزدى رەسپۋبليكا كۇنىمەن جانە دەكلاراسيانىڭ قابىلدانۋ مەرەيتويىمەن شىن جۇرەكتەن قۇتتىقتايمىن! ەلىمىزگە بەرەكە، بىرلىك جانە تابىس تىلەيمىن، – دەدى ول.
سونداي-اق، ءىس-شارادا ماڭىزدى ءسوز سويلەگەن اكادەميك، بەلگىلى عالىم اسقار جۇمادىلدايەۆ بۇل كۇننىڭ ءوز ءومىرى مەن كاسىبي جولىندا ەرەكشە ماڭىزعا يە ەكەنىن اتاپ ءوتتى:
– تاۋەلسىزدىك دەگەنىمىز – تەك ساياسي ەركىندىك ەمەس، ول – جاۋاپكەرشىلىك. ءبىلىم مەن عىلىمعا، كەلەر ۇرپاقتىڭ بولاشاعىنا دەگەن جاۋاپكەرشىلىك.
مەن ءۇشىن بۇل مەرەيتويدىڭ ورنى بولەك. دەكلاراسيا قابىلدانعان جىلى ەڭ جاس عىلىم دوكتورى رەتىندە جاس عالىمدار كەڭەسىنىڭ اتىنان دەپۋتاتتىققا العاش سايلاندىم. ەل تاريحى دالەلدەگەندەي، تەك ءبىلىم مەن ينتەللەكتكە سۇيەنىپ، ءداستۇر مەن يننوۆاسيانى ۇشتاستىرۋ ارقىلى عانا ەگەمەندىگىمىزدى نىعايتا الامىز. سوندىقتان بۇگىنگى كونفەرەنسيا تەك وتكەنگە تاعزىم ەمەس، بولاشاققا باعىتتالعان جاڭا يدەيالار مەن باستامالاردىڭ باستاۋى بولسىن، – دەدى اسقار جۇمادىلدايەۆ.
ءىس-شارا اياسىندا قازاقستان رەسپۋبليكاسى پرەزيدەنتى ءارحيۆى ارنايى تاقىرىپتىق كورمە ۇيىمداستىردى. وندا مەملەكەتتىك ەگەمەندىك تۋرالى دەكلاراسيانىڭ قابىلدانۋى مەن تاۋەلسىز قازاقستاننىڭ قالىپتاسۋ كەزەڭدەرىنە قاتىستى بىرەگەي قۇجاتتار، فوتوسۋرەتتەر جانە سيرەك ماتەريالدار قويىلدى.
«قىران ەلىم – قازاقستانىم» كونفەرەنسياسى تاۋەلسىزدىك، بىرلىك جانە جاسامپازدىق يدەيالارىن دارىپتەي وتىرىپ، ۇرپاقتار ساباقتاستىعىن پاش ەتكەن تاعىلىمدى ءىس-شارا بولدى.