الماتىدا ينجەنەرلىك-كوممۋنيكاسيالىق ينفراقۇرىلىمدى كەڭ اۋقىمدا جاڭارتۋ ءجۇرىپ جاتىر. بۇل جۇمىس اياسىندا جىلۋ، ەلەكتر، سۋ قۇبىرى جانە كارىز جۇيەلەرىن قايتا قۇرۋ، سونداي-اق ستراتەگيالىق ماڭىزى بار سۋقابىلداعىشتار سالۋ جوبالارى قولعا الىنعان. بۇل تۋرالى قالا اكىمىنىڭ ورىنباسارى الماسحان سماتلايەۆ وڭىرلىك كوممۋنيكاسيالار قىزمەتىندە وتكەن بريفينگتە مالىمدەپ، 2025 جىلعى ناتيجەلەر قالا جۇيەلەرىنىڭ تۇراقتىلىعىن ارتتىرۋدا جانە قىس ماۋسىمىنا دايىندىقتا شەشۋشى ءرول اتقارعانىن جەتكىزدى.
الماسحان سماتلايەۆتىڭ ايتۋىنشا، بيىل 39 شاقىرىم جىلۋ جەلىسى مەن 17 قازاندىق جاڭعىرتىلدى. سونىڭ ارقاسىندا جىلۋ جەلىلەرىنىڭ توزۋ دەڭگەيى 56،1%-دان 54،3%-عا، ال قازاندىقتاردىڭ توزۋى 65،1%-دان 62،1%-عا تومەندەدى. ەلەكتر جەلىلەرىن جاڭارتۋ دا قارقىن العان: 221 شاقىرىم جەلى اۋىستىرىلعان، جىل سوڭىنا دەيىن بۇل كورسەتكىش 238 شاقىرىمعا جەتۋگە ءتيىس.
سۋمەن جابدىقتاۋ جۇيەسىن جاڭارتۋ دا قولعا الىنعان: 330،7 شاقىرىم جاڭا سۋ قۇبىرى سالىندى، 60 شاقىرىم جەلى جاڭعىرتىلدى. سونىڭ ناتيجەسىندە سۋ قۇبىرلارىنىڭ توزۋ دەڭگەيى 53،8%-دان 51%-عا تومەندەدى. ال كارىز جۇيەسىندە 306،4 شاقىرىم جەلى سالىندى، 5،5 شاقىرىم قۇبىر جاڭعىرتىلدى، بۇل توزۋ كورسەتكىشىن 49،5%-عا دەيىن ازايتۋعا مۇمكىندىك بەردى.
اكىم ورىنباسارى جاڭا سۋقابىلداۋ نىساندارىنىڭ قۇرىلىسىنا ەرەكشە توقتالدى. ونىڭ ايتۋىنشا، "اقساي" سۋقابىلداعىشى 95%-عا دايىن جانە ول قالانىڭ باتىس جانە تاۋعا جاقىن ايماقتارىنداعى 140 مىڭعا جۋىق تۇرعىندى سۋمەن قامتاماسىز ەتەدى. نىسان 2026 جىلى مامىردا، تاسقىن كەزەڭىنەن كەيىنگى سىناق-رەتتەۋ جۇمىستارىنان سوڭ ىسكە قوسىلادى. "ەرمەنساي" سۋقابىلداعىشى 2026 جىلدىڭ قاراشاسىندا اياقتالىپ، بوستاندىق اۋدانىنىڭ وڭتۇستىك-شىعىس بولىگىنە سۋ بەرەدى.
اپاتتىق جاعدايلار تۋرالى ايتتى كەلە، سماتلايەۆ 13 قاراشا كۇنى الاتاۋ اۋدانىندا بولعان ءىرى ەلەكتر اپاتىن مىسالعا كەلتىردى: گاز قۇبىرىن تارتۋ كەزىندە مەردىگەر 110 كۆ كابەلىن زاقىمداپ، 32 مىڭنان استام تۇتىنۋشى جارىقسىز قالعان. دەگەنمەن، اپات ءبىر تاۋلىكتىڭ ىشىندە تولىق جويىلعان. كەلتىرىلگەن 64 ملن تەڭگە شىعىن تولىق كولەمدە كىنالى كومپانياعا جۇكتەلدى.
اكىمنىڭ ورىنباسارى مەردىگەرلەرگە قويىلاتىن تالاپتاردىڭ كۇشەيگەنىن اتاپ ءوتتى: بىرنەشە كومپانيا ليسەنزياسىنان ايىرىلدى، 30-دان استام سوت تالاپ-ارىزى ازىرلەندى، ال بارلىق تەحنيكالىق كەلىسىم ەندى ءتيىستى باسقارمالارمەن بىرلەسىپ قانا جۇرگىزىلەدى.
"ءبىز جۇمىستى ساپالى ءارى ۋاقىتىندا ورىنداۋعا قابىلەتتى، تاجىريبەلى دە ءتارتىپتى مەردىگەرلەردى قالىپتاستىرىپ جاتىرمىز. الماتىنىڭ ينفراقۇرىلىمى سەنىمدى بولۋعا ءتيىس جانە ونداعان جىلعا ەسەپتەلۋى كەرەك"، — دەدى الماسحان سماتلايەۆ.