TikTok جەلىسىندە كەڭ تاراپ جاتقان TYLA ەسىمدى ءارتىستىڭ ءانىن ەستىگەن بولارسىز؟ الەۋمەتتىك جەلىنى اشا قالساڭ، مىڭ بۇرالا بيلەپ جاتقان جاستاردى كورەسىڭ. ءتىپتى ءان اۆتورىنىڭ ءوزى دە ترەند بولىپ تارالعان بيگە بەينە ءتۇسىرىپ، باعالاپ جاتىر. ال ءدال وسى الەم بيلەپ جاتقان ترەندتىڭ اۆتورى قازاق قىزى دەسەم سەنەسىز بە؟ 21 جاستاعى قاراعاندىلىق ارۋ ميلليونداعان جۇرتتىڭ سۇيىكتى بيىنە اينالعان ترەندى تاراتتى. اqshamnews.kz ءتىلشىسى ونىمەن تىلدەسىپ، اڭگىمە تارقاتتى.
قاراعاندىدان شىققان قارشاداي قىز قالاي الەمدى "بيلەتتى"؟
البينا وسپانوۆا - قاراعاندى قالاسىنىڭ تۋماسى. ول جاستايىنان شىعارماشىلىققا قىزىعىپ، ونەردەن شابىت الىپ وسكەن قىز.
"ەس بىلگەلى بيمەن اينالىسامىن. ونەردى، شىعارماشىلىقتى سۇيەمىن"، – دەيدى ول.
ءقازىر البينا بي ۇيرەتىپ، ءوز حورەوگرافيالارىن قويىپ، الەۋمەتتىك جەلىگە كونتەنت تۇسىرەدى. بۇگىندە ول نازارىن بي ونەرىنە بۇرىپ، ترەند كونتەنت جاساۋعا جانە جەكە جوبالارىن دامىتۋعا دەن قويعان.
سونىمەن قاتار، ول مودەل رەتىندە Bacca Models اگەنتتىگىمەن جۇمىس ىستەيدى. ءتىپتى مودەلدىك كەلىسىمشارت بويىنشا كورەيادا دا بولىپ قايتقان. مۋزىكا، ونەر، مودا الەمىن ءجىتى قاداعالاپ، ءتۇرلى ەلدەردىڭ مادەنيەتى مەن ءتىلىن زەرتتەۋگە قىزىعادى.
"بىرنەشە مينۋت ىشىندە قويىلعان بي ەدى"
TYLA انىنە تۇسىرىلگەن ترەندتىڭ تاريحى توسىننان تۋعان. بۇل تۋرالى البينا بىلايشا اڭگىمەلەدى.
"بۇل ترەند مۇلدە جوسپارسىز تۋدى. TikTok-تى قاراپ وتىرعاندا TYLA-نىڭ ءالى تولىق شىقپاعان جاڭا ءانىنىڭ ءۇزىندىسى كەزدەسە كەتتى. اۋەندى تىڭداپ وتىرىپ، بيتكە جاقسى تۇسەتىن قيمىل قوسقىم كەلدى. شامامەن بىرنەشە مينۋت ىشىندە قوزعالىستاردى ويلاپ تاۋىپ، ۆيدەونى ءتۇسىردىم دە، ەشتەڭە ويلاماي جۇكتەپ جىبەردىم"، – دەيدى البينا.
وسىلايشا "ويدا جاقتا تۋعان ترەند" از ۋاقىت ىشىندە ءتۇرلى ەلگە تاراپ، ۆيرۋسقا اينالادى.
TYLA مەن ونىڭ كومانداسى قالاي بايقادى؟
العاشىندا البينا ەشقانداي عالامدىق ەففەكت كۇتپەگەن.
"شىنىمدى ايتسام، بۇل ترەند وسىلاي بۇكىل الەمگە جايىلادى دەپ ويلاعان جوقپىن. العاشقى بەلگىلەر شىققاندا “مىنە، ماكسيمۋم وسى شىعار” دەپ ويلادىم. ءبىراق بىرنەشە كۇننەن كەيىن ءتۇرلى ەلدەردەن، ءتۇرلى تانىمال بيشىلەر مەن ايدولداردان ۆيدەولار شىعا باستادى. بۇل مەن ءۇشىن ءبىر شەتىنەن وتە جاعىمدى اسەر قالدىرىپ، ءبىر شەتىنەن قاتتى تولقىتتى"، – دەيدى البينا.
تالايدى تاڭعالتقان ترەند TYLA-نىڭ ءوزىن دە، كومانداسىن دا اينالىپ وتپەدى. ءارتىستىڭ ءوزى دە ۆيدەولاردى كورىپ، بەلگىلەپ، لايك باسقان. ءتىپتى ءقازىر ول كونسەرتتەرىندە البينا شىعارعان ءبيدى بيلەپ ءجۇر.
"ولار مەنىڭ ۆيدەومدى كوردى، مۇمكىن ەسىندە دە ساقتاپ قالعان شىعار. كومانداسىنىڭ ترەندتى بايقاپ، رەاكسيا ءبىلدىرۋى - مەنىڭ شىعارماشىلىعىم ءۇشىن ۇلكەن جەتىستىك"، – دەيدى ول.
ەڭ ۇلكەن قۋانىش – جاقىندارىنىڭ رەاكسياسى.
"بارلىعى مەن ءۇشىن شىن قۋاندى. وتباسىم مەنى ماقتان تۇتىپ، ال دوستارىم مەنىمەن بىرگە وتىرىپ الىپ مونيتورينگ جاساپ، “قاي ايدولدار سەنىڭ ترەندىڭدى بيلەپ جاتىر ەكەن؟” دەپ بىرگە قاراپ وتىردى. ءارقاشان قولداپ، بىرگە قۋانعاندارى ءۇشىن ولارعا وتە ريزامىن"، – دەيدى ول.
البينانىڭ ارمانى نە؟
البينانىڭ ەندىگى ماقساتى – ءوزىن بي يندۋسترياسىندا الەمدىك دەڭگەيدە تانىتۋ.
"تانىمال ارتىستەرمەن، ءىرى كومپانيالارمەن جۇمىس ىستەگىم كەلەدى. كوبىرەك حورەوگرافيا، ترەند ويلاپ تاۋىپ، الەمدىك كوميۋنيتي ىشىندە اتى بار، ءستيلى مەن ۆايبى بىردەن تانىلاتىن ادام بولسام دەيمىن"، – دەيدى ول.
سونىمەن قاتار، ول ءوزىن كونتەنت جاساۋشى رەتىندە دە دامىتۋدى كوزدەيدى: بيلەر، ۆلوگتار، شابىت بەرەتىن جوبالار تۇسىرگىسى كەلەدى.
"قىسقاسى، شىعارماشىلىعىمدى كورسەتىپ، ءوزىمدى دامىتۋعا مۇمكىندىك بەرەتىن كەز كەلگەن ۇسىنىستان قاشپايمىن. كوبىرەك ەل كورگىم كەلەدى، ءتىل ۇيرەنگىم كەلەدى، بي ارقىلى الەممەن تىلدەسكىم كەلەدى"، – دەيدى البينا.