الماتىدا قىسقى قاۋىپسىزدىكتى قامتاماسىز ەتۋ شارالارى كۇشەيتىلدى: ارنايى تەحنيكالار پاركى رەكوردتىق 1030 بىرلىككە دەيىن ۇلعايتىلدى، كوشە تازالاۋعا 2700-دەن استام جۇمىسشى جۇمىلدىرىلدى، زاماناۋي قار ەرىتەتىن پۋنكتتەر ىسكە قوسىلىپ جاتىر، ال "الماتى تازالىق" العاش رەت تاۋلىك بويى جۇمىس ىستەيتىن ءۇش اۋىسىمدىق جۇيەگە ءوتتى. بۇل تۋرالى قالا اكىمىنىڭ ورىنباسارى الماسحان سماتلايەۆ وڭىرلىك كوممۋنيكاسيالار قىزمەتىندەگى بريفينگتە ايتتى.
الماتىدا العاشقى قار 4-5 قاراشادا جاۋدى جانە سوڭعى جىلدارداعى ەڭ قالىڭ قار بولدى: تاۋلى ايماقتا قاردىڭ قالىڭدىعى 50 سانتيمەتردەن استى، قالا ىشىندە شامامەن 20 سانتيمەترگە جەتتى. كۇننىڭ كۇرت سۋىتۋىنا جانە قاردىڭ كوپ جاۋعانىنا قاراماستان، كوممۋنالدىق قىزمەت ماگيسترالدار مەن اۋلا اۋماقتارىنداعى قاردى تەزدەتىپ كۇرەدى. 3 مىڭ تەكشە مەتردەن استام قار شىعارىلىپ، 1،5 مىڭ توننادان استام كوكتايعاققا قارسى ماتەريالدار پايدالانىلدى.
اكىم ورىنباسارىنىڭ ايتۋىنشا، بيىل العاش رەت قار ەرىتەتىن ستانسيالار ىسكە قوسىلا باستادى. اۋەزوۆ اۋدانى اۋماعىنداعى العاشقى پۋنكت تاۋلىگىنە 1200 تەكشە مەتر قار ەرىتە الادى. ەكىنشى بەكەت بوستاندىق اۋدانىندا جىل سوڭىنا دەيىن كانادالىق تەحنولوگيا نەگىزىندە ىسكە قوسىلىپ، تاۋلىگىنە 4 مىڭ تەكشە مەترگە دەيىن قار ەرىتەدى. 2026 جىلى مەدەۋ جانە المالى اۋداندارىندا تاعى ەكى كەشەن اشىلادى.
"الماتى تازالىق" ءۇشىن بيىلعى جىل ەرەكشە ماڭىزدى بولدى: كاسىپورىن قىزمەتكەرلەرىنىڭ سانى 1560 ادامنان 3169 ادامعا دەيىن كوبەيدى، ال جول سالاسىنداعى جۇمىسشىلار 638 ادامنان 2000 ادامعا دەيىن ارتتى. تەحنيكالار پاركى العاش رەت مىڭ بىرلىكتەن اسىپ، 330 جاڭا تەحنيكا ساتىپ الىندى. جۇمىس كەستەسىنىڭ ءۇش اۋىسىمعا كوشۋى تۇنگى جانە ەرتە تاڭعى تازارتۋ جۇمىستارىن جۇيەلى جۇرگىزۋگە مۇمكىندىك بەردى.
بۇعان قوسا، قىزمەتكەرلەرگە ارنالعان جاعداي جاقساردى: مودۋلدىك پۋنكتتەر سالىندى، بازالار جاڭارتىلدى، 112 ورىندىق جاتاقحانا ءبولىندى جانە كاسىپورىننىڭ جاڭا تۇرعىن قورىنان قوسىمشا 262 ورىن قاراستىرىلدى.
"ءبىز اۋا رايىنا تاۋەلدى ەمەسپىز. قار قاي ۋاقىتتا جاۋسا دا، قالا دايىن تۇرۋى كەرەك. ءقازىر جەدەل ارەكەت ەتۋ جۇيەسى تاۋلىك بويى جۇمىس ىستەيدى، ال جاڭا قار ەرىتەتىن پۋنكتتەر كوشەلەردى تازارتۋ جۇمىسىن ايتارلىقتاي جەدەلدەتەدى"، – دەدى الماسحان سماتلايەۆ.
سونداي-اق، ول كەلەسى جىلدان باستاپ قالادا "ءبىر اۋدان – ءبىر مەردىگەر" مودەلى ەنگىزىلەتىنىن، بۇل اۋداندىق كوشەلەردى تازالاۋدىڭ ساپاسى مەن جاۋاپكەرشىلىگىن كۇشەيتەتىنىن اتاپ ءوتتى.