الماتىداعى روزىباكييەۆ جانە تولە بي كوشەلەرىندە زاڭسىز ستيحيالىق ساۋدانىڭ 75 نۇكتەسى جويىلدى
الماتىدا «تازا قازاقستان» رەسپۋبليكالىق باعدارلاماسى جانە «الماتى - ءبىزدىڭ ورتاق ءۇيىمىز» قالالىق باستاماسى اياسىندا اكىم ەربولات دوسايەۆتىڭ تاپسىرماسى بويىنشا ناۋقان جۇزەگە اسىرىلۋدا، دەپ حابارلايدى aqshamnews.kz.
اتاپ ايتقاندا، المالى اۋدانىندا تولە بي كوشەسىنەن رايىمبەك داڭعىلىنا دەيىن (شىعىس-باتىس باعىتى) روزىباكييەۆ كوشەسى بويىنداعى ۋچاسكەدە جانە پروكوفيەۆتەن تۇرعۇت وزالعا دەيىنگى تولە بي كوشەسىندە، «بارىس - 4»، «جۇلدىز»، «تاستاق» بازارلارى اۋماعىندا ستيحيالىق ساۋدانى جويۋ بويىنشا بەلسەندى جۇمىستار جۇرگىزىلۋدە.
جۇرگىزىلگەن رەيدتەر ناتيجەسىندە ستيحيالىق ساۋدانىڭ 75-تەن استام نۇكتەسى جويىلدى، سونداي-اق 47 تەكشە مەتردەن استام قوقىس شىعارىلدى.
بۇل ۋچاسكەلەردە كيىم مەن اياق كيىم، تۇرمىستىق بۇيىمدار، ەت ونىمدەرى جانە باسقا دا ازىق-تۇلىك تاۋارلارى، سونىڭ ىشىندە ءسۇت ونىمدەرى ساتىلدى. ساۋداگەرلەر رۇقسات قۇجاتتارىنسىز، انتيسانيتاريالىق جاعدايدا جانە اباتتاندىرۋ ەرەجەلەرىن ورەسكەل بۇزا وتىرىپ ساتىلىم جاسادى.
ساۋداگەرلەرمەن الماتى قالاسىن اباتتاندىرۋ ەرەجەلەرىن ساقتاۋ تۋرالى تۇسىندىرمە اڭگىمە جۇرگىزىلدى. ولارعا المالى اۋدانى بازارلارىنىڭ اۋماعىندا ساۋدا ورىندارى ۇسىنىلدى.
اعىمداعى جىلدىڭ باسىنان باستاپ پوليسيا قىزمەتكەرلەرى ق ر اقبتك-نىڭ 204-بابى «بەلگىلەنبەگەن ورىندارداعى ساۋدا» بويىنشا 253 اكىمشىلىك حاتتاما جانە ق ر اقبتك-نىڭ 505-بابى «اباتتاندىرۋ ەرەجەلەرى» بويىنشا 785 حاتتاما ەنگىزدى. بۇل باعىتتاعى جۇمىس جالعاسۋدا.
ەستەرىڭىزگە سالا كەتەيىك، ستيحيالىق ساۋدا فاكتىلەرىن انىقتاۋ جانە جويۋ، سونداي-اق زاڭسىز ورناتىلعان ساۋدا وبەكتىلەرىن بولشەكتەۋ جونىندەگى اۋقىمدى اكسيا 15 ساۋىردە باستالىپ، 2025 جىلدىڭ 1 مامىرىنا دەيىن جالعاسادى. اعىمداعى جىلدىڭ 15 ساۋىرىندە عانا ۋاكىلەتتى ورگاندار پوليسيا دەپارتامەنتىمەن بىرلەسىپ سانكسيالانباعان ساۋدانىڭ 143 جاعدايىن (ق ر اقبتك 204-بابى) جانە اباتتاندىرۋ قاعيدالارىن بۇزۋدىڭ 96-بابىن (ق ر اقبتك 505-بابى) انىقتادى.