قازىرگى ۋاقىت انگليا بانكىنە وڭايعا ءتيىپ جاتقان جوق. باعا تومەندەگەن سايىن، ولاردىڭ بەدەلى ءتۇسىپ جاتىر. حالىقتىڭ رەنجيتىندەي ءجونى بار. ويتكەنى كورشىلەس فرانسيا، گەرمانيا مەن يسپانيادا ينفلياسيا دەڭگەيى شامامەن 3 پايىزعا تومەندەگەن،-دەپ حابارلايدى Almaty-akshamy.kz.
ال بىرىككەن كورولدىكتە مامىرداعى 8،8 پايىز دەڭگەيىنەن تۇسپەي تۇر. سۋناك قامسىز ەمەس. ءبىراق ونىڭ مەملەكەتتىك سەكتورداعى جالاقىنى وسىرمەۋ، يپوتەكالىق نەسيەسى بار ازاماتتارعا قوماقتى سومادا كومەك بەرمەۋ سياقتى شەشىمدەرى ابدەن سۇيكىمىن كەتىردى، دەپ جازدى 24.kz. ۇكىمەت باسشىسى پايىزدىق مولشەرلەمەنى 5 پايىزعا دەيىن كوتەرۋدى قولدادى. بۇل 2008 جىلعى قارجى داعدارىسىنان كەيىنگى رەكوردتى كورسەتكىشكە اينالدى.
- سولشىلدار مەن وڭشىلداردىڭ تاراپىنان جاسالىپ جاتقان قىسىمعا قاراماستان ءبىز العان بەتىمىزبەن قايتپايمىز. باسقا ەلدەرگە قاراڭىزدارشى - ولار ينفلياسيانى پايىزدىق مولشەرلەمەنى كوتەرۋ ارقىلى تەجەپ وتىر. ءبىز دە سونداي قادامعا بارۋعا ءماجبۇرمىز. سوندىقتان سابىر ساقتاۋدى سۇرايمىن، -دەيدى ۇلىبريتانيا قارجى ءمينيسترى دجەرەمي حانت.
ساراپشىلار «ينفلياسياعا اسەر ەتىپ وتىرعان بىرنەشە فاكتور بار» دەيدى. بىرىنشىدەن، بريتانيادا 1 جىلدىڭ ىشىندە اۆتوساقتاندىرۋ قۇنى 40 پايىزعا ارتتى. بۇعان كولىك جانە ونى جوندەۋ باعاسىنىڭ كوتەرىلۋى سەبەپ. ەكىنشىدەن، اۋە بيلەتتەرىنىڭ قۇنى 30 پايىزعا كوتەرىلدى. ال ساۋدا، قوناق ءۇي جانە مەيرامحانا بيزنەسىندەگى ادامداردىڭ ونسىز دا تومەن جالاقىسى ءالى وسكەن جوق دەيدى ەكونوميستەر.
وسى ايدا ەۋروايماق ەكونوميكاسىنىڭ ءوسىمى باياۋلاپ قالدى. ويتكەنى ءوندىرىستىڭ قارقىنى باسەڭدەگەن. جالپى ايماقتاعى ينفلياسيا دەڭگەيى 6 پايىز مولشەرىندە قالىپ وتىر. بۇل ۇكىمەتتەر مەجەلەگەن كورسەتكىشتەن 3 ەسە جوعارى.
ساۋد ارابياسى كوروناۆيرۋستان كەيىن سوڭعى 3 جىلدا العاش رەت قاجىلىققا كوپ ادام قابىلداي باستادى. الايدا ەكونوميكالىق داعدارىس كوپتەگەن مۇسىلماننىڭ مەككەگە بارۋىنا تۇساۋ بولىپ تۇر. مىسىردا جاز باستالعالى جىلدىق ينفلياسيا 40 پايىزعا ارتتى. قاجىلىققا ۇشاقپەن بارۋ بيلەتى، تاماق جانە قوناق ۇيدە تۇرۋ قۇنى قىمباتتادى. ءبىراق مەككەگە جەتۋدىڭ باسقا جەڭىلدەۋ جولدارى شىعىپ جاتىر. ماسەلەن، مىسىردىڭ ىشكى ىستەر مينيسترلىگى مەملەكەتتىك لوتەرەيا ويناتۋعا كىرىستى. ونى ۇتقان ادام قاعباعا 5 جارىم مىڭ دوللارعا بارىپ قايتادى. ال كەيبىر تۇرعىندار بيلەتى ارزان اۆتوبۋسپەن بارىپ جاتىر. قاجىلىققا جولى تۇسكەندەردىڭ قۋانىشىندا شەك جوق.
بليس:
- مەن 6 جىلدان بەرى قاجىلىققا بارۋعا ءوتىنىش بەرىپ كەلگەنمەن. ءبىراق كەزەك تيمەي قويعان ەدى. بيىل باعىم جاندى.
- اۋە بيلەتى 175 مىڭ مىسىر فۋنتى تۇرادى دەپ ەستىدىم. بۇل 5 مىڭ دوللاردان اسادى. ونداي اقشا مەنىڭ ءۇش ۇيىقتاسام تۇسىمە كىرمەيدى. ال اۆتوبۋسپەن بارساڭ، 4 مىڭداي دوللار كەتەدى. سوعان اقشا جيناپ جاتىرمىن.
مىسىرداعى تاعى ءبىر قيىندىق - شەتەل ۆاليۋتاسى وتە تاپشى. ءتىپتى كوپتەگەن بانكتەر قولما-قول اقشا الۋعا شەكتەۋ قويىپ تاستاعان. اقش-تا قىمباتشىلىق دەڭگەيى تومەندەسە دە، مەجەلى 2 پايىزدىق مولشەرلەمەگە ءالى جەتە الماي وتىر. ءتىپتى فەدەرالدىق ساقتىق قور جۇيەسى بيىل پايىزدىق مولشەرلەمەنى تاعى كوتەرەمىز دەيدى. ماماندار ونسىز ەكونوميكاعا جان بىتپەيدى دەپ اقتالىپ الەك.
- ينفلياسيا وتكەن جىلدىڭ ورتاسىنان بەرى بىرنەشە رەت تومەندەدى. ءبىراق ەكونوميكا ءالى ەڭسەسىن تىكتەي الماي كەلەدى. ءيا، باعانىڭ تۇراقتىلىعىنا فەدەرالدىق ساقتىق قور جۇيەسى جاۋاپ بەرەدى. الايدا پايىزدىق مولشەرلەمەنى كوتەرمەي، ەڭبەك نارىعىندا وڭدى وزگەرىس بولادى دەپ ايتا المايمىز،-دەيدى اقش فەدەرالدىق رەزەرۆتىك قور جۇيەسنىڭ ءتوراعاسى دجەروم پاۋەلل.
الەم ەلدەرىنىڭ ەكونوميكاسىنا تالداۋ جاسايتىن «ترەيديڭ ەكونوميكس» (Trading Economics) ۇيىمىنىڭ سوڭعى مالىمەتى بويىنشا، ەڭ ۇلكەن قىمباتشىلىق ءقازىر ۆەنەسۋەلادا بولىپ جاتىر. بۇل ەلدەگى جىلدىق ينفلياسيا دەڭگەيى 429 پايىزدان اسىپ كەتكەن. ەكىنشى ورىندا تاعى ءبىر وڭتۇستىك امەريكالىق ەل - ارگەنتينا تۇر. سونداي-اق ينفلياسيا ليۆان مەن يراندا دا وتە جوعارى. جالپى ساراپشىلار پايىزدىق مولشەمەلەردى كوتەرۋ 1 جىلدان كەيىن تيىمدىلىگىن كورسەتەدى دەيدى.