الاتاۋ اۋدانىندا دەنساۋلىق ساقتاۋ ينفراقۇرىلىمىن دامىتۋ مەن حالىقتىڭ الەۋمەتتىك وسال توپتارىن كەشەندى قولداۋ نەگىزگى باعىتتىڭ بىرىنە اينالدى. اۋدان اكىمدىگى جاڭا مەديسينالىق نىساندار عانا سالىپ قويماي، وتباسىلاردى، قارتتاردى، مۇمكىندىگى شەكتەۋلى ازاماتتاردى قولدايتىن الەۋمەتتىك باستامالاردى جۇزەگە اسىرۋعا دا ەرەكشە كوڭىل ءبولىپ وتىر. بۇل تۋرالى اۋدان اكىمى تالعات مالىبايەۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مالىمدەدى، دەپ حابارلايدى aqshamnews.kz
2024 جىلدىڭ جەلتوقسانىندا قاراسۋ شاعىناۋدانىندا ءبىر اۋىسىمدا 200 ادام قابىلداي الاتىن العاشقى مەديسينالىق-سانيتارلىق كومەك ورتالىعىنىڭ قۇرىلىسى اياقتالدى. بۇل نىسان شالعايدا ورنالاسقان تۇرعىندارعا قولايلى بولدى. تامىز ايىندا سايالى شاعىناۋدانىندا ءدال وسىنداي تاعى ءبىر ورتالىقتى سالىپ بىتپەك. تاۋلىگىنە 200 ادام قابىلدايتىن جاڭا نىساننىڭ قۇرىلىسىنا 2،1 ميلليارد تەڭگە ءبولىنىپتى.
مەديسينالىق ينفراقۇرىلىمدى دامىتۋمەن قاتار، اۋداندا مەملەكەتتىك الەۋمەتتىك تاپسىرىس اياسىندا الەۋمەتتىك جوبالار دا قارجىلاندىرىلىپ جاتىر. «باقىتتى وتباسى» وتباسىن قولداۋ ورتالىعى كوپ بالالى جانە از قامتىلعان ايەلدەرگە اقپاراتتىق كومەك كورسەتىپ، وتباسى ءال-اۋقاتىن نىعايتۋعا باعىتتالعان ترەنينگتەر مەن كۋرستار وتكىزەدى. بەلسەندى ۇزاق ءومىر ءسۇرۋ ورتالىعى قارت ادامداردىڭ ءومىر ساپاسىن ارتتىرۋعا باعىتتالعان.
«شىڭعا ورلەۋ» الەۋمەتتىك كلۋبى ەگدە جاستاعى تۇرعىنداردى قوعامدىق ومىرگە ارالاستىرۋعا كومەكتەسىپ، ولاردىڭ كورگەن-تۇيگەنىن كوپ بالالى جانە از قامتىلعان وتباسىلاردان شىققان باستاۋىش سىنىپ وقۋشىلارىنا جەتكىزۋدى جوسپارلاعان. «Ten Qogam» ورتالىعى مۇمكىندىگى شەكتەۋلى ادامدارمەن جۇمىس ىستەپ، ولاردىڭ ءومىر ساپاسىن جاقسارتۋعا جانە كاسىبي الەۋەتىن اشۋعا جاردەمدەسەدى. تاعى ءبىر جوبا — ءداستۇرلى قولونەردى دامىتۋ ورتالىعى — الەۋمەتتىك وسال توپتاعى ايەلدەرگە قولونەردى ۇيرەتۋگە كىرىستى.