الاتاۋ اۋدانىندا كوپبالالى وتباسىلاردان باستاپ، زەينەتكەرلەر مەن ەرەكشە قاجەتتىلىكتەرى بار ازاماتتارعا دەيىنگى ءتۇرلى ساناتتاعى تۇرعىنداردى قامتيتىن كەشەندى الەۋمەتتىك قولداۋ باعدارلاماسى جۇزەگە اسىرىلىپ جاتىر. بۇل تۋرالى الماتى قالاسى الاتاۋ اۋدانىنىڭ اكىمى تالعات مالىبايەۆ وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا ايتتى، دەپ حابارلايدى aqshamnews.kz
اكىمنىڭ ايتۋىنشا، اۋداننىڭ جۇمىسپەن قامتۋ جانە الەۋمەتتىك باعدارلامالار ءبولىمى ارقىلى ءومىر ءسۇرۋ ساپاسىن ارتتىرۋ مەن قيىن جاعدايدا قولداۋ كورسەتۋگە باعىتتالعان 13 مەملەكەتتىك قىزمەت كورسەتىلەدى. ولاردىڭ قاتارىنا تۇرعىن ءۇي كومەگى، ساۋىقتىرۋ مەن وڭالتۋ تولەمدەرى، سونداي-اق كوممۋنالدىق تاريفتەردىڭ وسۋىنە بايلانىستى بەرىلەتىن وتەماقىلار كىرەدى.
بيىل:
• 93 وتباسىعا جالپى 3،3 ملن تەڭگە كولەمىندە تۇرعىن ءۇي كومەگى كورسەتىلگەن؛
• 461 وتباسى 157،1 ملن تەڭگە كولەمىندە اتاۋلى الەۋمەتتىك كومەك العان؛
• 651 زەينەتكەر جالپى سوماسى 17،9 ملن تەڭگە بولاتىن الەۋمەتتىك كومەككە يە بولعان.
قارت ادامدار مەن مۇگەدەكتىگى بار ازاماتتاردىڭ دەنساۋلىعى مەن ءال-اۋقاتىنا ەرەكشە كوڭىل ءبولىنىپ وتىر. بيىل 350 زەينەتكەر مەن 592 مۇگەدەك ازاماتتى كۋرورتتىق ەمدەۋگە جىبەرۋ جوسپارلانعان. بۇل ماقساتقا 323 ملن تەڭگە بولىنگەن.
سونداي-اق، توتەنشە جاعدايدان زارداپ شەككەن ءبىر تۇرعىنعا 786 مىڭ تەڭگە كولەمىندە ءبىر رەتتىك كومەك كورسەتىلگەن.
كوممۋنالدىق تاريفتەردىڭ وسۋىنە بايلانىستى وتەماقى تولەۋ دە ماڭىزدى باعىتتاردىڭ ءبىرى. بۇل كومەكتى 15 589 ادام العان. جالپى 152 ملن تەڭگە بولىنگەن.
ارداگەرلەر دە نازاردان تىس قالعان جوق:
• اقپان ايىندا 464 اۋعان سوعىسى ارداگەرىنە 46 ملن تەڭگە؛
• 9 مامىر كۇنى 895 ارداگەرگە 94،3 ملن تەڭگە كولەمىندە قولداۋ كورسەتىلدى.
ەرەكشە قاجەتتىلىكتەرى بار ادامداردى قولداۋ باعىتىندا دا اۋقىمدى جۇمىس جۇرگىزىلىپ جاتىر:
• 127 ادامعا جالپى 26 ملن تەڭگەگە قولاربالار بەرىلدى؛
• 394 ادام 49 ملن تەڭگە كولەمىندە پروتەزدىك كومەك الدى؛
• 2 522 ادامعا تەگىن گيگيەنالىق قۇرالدار تاراتىلىپ، وعان 490 ملن تەڭگە جۇمسالدى؛
• 334 ادام تەحنيكالىق وڭالتۋ قۇرالدارىمەن قامتاماسىز ەتىلىپ، بۇل باعىتقا 56،6 ملن تەڭگە ءبولىندى.
بۇعان قوسا، مۇمكىندىگى شەكتەۋلى ازاماتتارعا كومەكتەسەتىن 1 000 جەكە كومەكشىنىڭ ەڭبەكاقىسىنا اۋدان بيۋدجەتىنەن 500 ملن تەڭگە بولىنگەن.
وسىلايشا، الاتاۋ اۋدانى ءوز تۇرعىندارىنا ناقتى قامقورلىق كورسەتىپ، الەۋمەتتىك قولداۋدى جۇيەلى تۇردە جۇزەگە اسىرىپ وتىر.